ఒక్కసారి ఈ పచ్చడి తింటే ఇంకే పచ్చడీ నచ్చదు.. ఇడ్లీ, దోశెలలోకి కేక..ఎలా చేసుకోవాలంటే

రోజూ తినే ఇడ్లీ, దోశెలలోకి అవే రొటీన్ కొబ్బరి, పల్లీ పచ్చళ్లు తిని తిని బోర్ కొట్టేసిందా? అయితే ఈసారి కాస్త భిన్నంగా, కారంగా, పుల్లగా, ఎంతో రుచికరంగా ఉండే వెల్లుల్లి చింతపండు పచ్చడిని ట్రై చేయండి. దీని ఘాటైన రుచి, అద్భుతమైన సువాసన మీ బ్రేక్ ఫాస్ట్ ని మరో స్థాయికి తీసుకెళ్తాయి. తయారు చేయడం చాలా సులభం, కానీ రుచి మాత్రం అమోఘం. వంట రాని వాళ్లు కూడా దీనిని చాలా ఈజీగా తయారు చేయవచ్చు. ఈ పచ్చడి వారం రోజుల దాకా నిల్వ ఉంటుంది. నోరూరించే వెల్లుల్లి చింతపండు పచ్చడి ఎలా తయారుచేసుకోవాలో ఇక్కడ చూడండి.

కావాల్సిన పదార్థాలు
-వెల్లుల్లి రెబ్బలు - 15
-సాంబార్ ఉల్లిపాయలు చిన్నవి - 7
-ఎండు మిరపకాయలు - 7 (మీ కారానికి తగినట్లు)
-చింతపండు - పెద్ద నిమ్మకాయంత
-కరివేపాకు - రెండు రెమ్మలు
-నువ్వుల నూనె - 4 టీస్పూన్లు
-కాశ్మీరీ కారం - 2 టీస్పూన్లు
-పసుపు - చిటికెడు
-ఇంగువ - పావు టీస్పూన్
-ఉప్పు - రుచికి సరిపడా
తాళింపు కోసం:
-నువ్వుల నూనె - 1 టీస్పూన్
-ఆవాలు - అర టీస్పూన్
-మినపప్పు - 1 టీస్పూన్
-కరివేపాకు - ఒక రెమ్మ

తయారీ విధానం

-ముందుగా ఓ బాండీని స్టవ్ మీద పెట్టి 3 టీస్పూన్ల నువ్వుల నూనె వేసి వేడి చేయాలి. నూనె వేడెక్కాక వెల్లుల్లి రెబ్బలు, చిన్న ఉల్లిపాయలు వేసి దోరగా వేయించాలి.

-ఉల్లిపాయలు రంగు మారుతున్నప్పుడు ఎండు మిరపకాయలు, చింతపండు, కరివేపాకు, రుచికి సరిపడా ఉప్పు వేసి బాగా కలపాలి. చింతపండు మెత్తబడే వరకు పచ్చివాసన పోయి, మంచి సువాసన వచ్చేంత వరకు తక్కువ మంట మీద వేయించుకోవాలి.

-ఇప్పుడు కాశ్మీరీ కారం పొడి, ఇంగువ వేసి మరో నిమిషం పాటు వేయించి పచ్చి వాసన పోయాక స్టవ్ ఆపేయాలి. ఈ మిశ్రమాన్ని పూర్తిగా చల్లారనివ్వాలి.

-చల్లారిన మిశ్రమాన్ని ఒక మిక్సీ జార్‌ లోకి తీసుకుని, చిటికెడు పసుపు, మిగిలిన 2 టీస్పూన్ల నువ్వుల నూనె కూడా వేయాలి. అవసరాన్ని బట్టి కొద్దికొద్దిగా నీళ్లు చేర్చుకుంటూ మరీ జారుగా కాకుండా కాస్త గట్టిగా, మెత్తని పేస్ట్‌ లా గ్రైండ్ చేసుకోవాలి.

-ఇక చివరిగా తాళింపుతో ఈ పచ్చడికి మరింత రుచిని తీసుకోండి. అదే బాండీలో టీస్పూన్ నూనె వేసి ఆవాలు, మినపప్పు వేసి చిటపటలాడనివ్వాలి. ఆ తర్వాత కరివేపాకు వేసి, ఈ తాళింపును రుబ్బి పెట్టుకున్న పచ్చడిలో కలపాలి. అంతే నోరూరించే ఘుమఘుమలాడే వెల్లుల్లి చింతపండు పచ్చడి సిద్ధం. వేడివేడి ఇడ్లీ, దోశె, లేదా ఊతప్పంతో తింటే ఆహా, ఆ రుచే వేరు.