చూడగానే నోట్లో రసాలూరించే కొబ్బరి లౌజు..ఇంట్లోనే ఈజీగా ఎలా చేసుకోవాలంటే

భారతీయ పండుగలు, శుభకార్యాలు అనగానే ముందుగా మనకు గుర్తుకొచ్చేవి సాంప్రదాయ పిండి వంటలు. వీటిలో కొబ్బరి లౌజు (కొబ్బరి బర్ఫీ) కు ఒక ప్రత్యేక స్థానం ఉంది. కొబ్బరి, చక్కెరతో తయారుచేసే ఈ తీపి వంటకం కేవలం రుచిలో మాత్రమే కాకుండా, ఆరోగ్య పరంగా కూడా ఎన్నో ప్రయోజనాలను అందిస్తుంది. మన తెలుగు రాష్ట్రాల్లో దీన్ని సాధారణంగా కొబ్బరి లౌజు అని పిలుస్తారు. ఇది తయారు చేయడం చాలా సులభం, ఎక్కువ సమయం పట్టదు. ఇంట్లో లభించే సాధారణ పదార్థాలతోనే దీన్ని చేసుకోవచ్చు. కొబ్బరి లౌజు తయారీకి కావలసిన పదార్థాలు, తయారీ విధానం ఇక్కడ చూడండి.

కొబ్బరి లౌజు తయారీకి కావాల్సిన పదార్థాలు

-కొబ్బరి
-చక్కెర
-యాలకలు
-నెయ్యి
-నీళ్లు

కొబ్బరి లౌజు తయారీ విధానం

-ముందుగా ఒక ముదురు పచ్చి కొబ్బరికాయను ముక్కలుగా చేసుకోవాలి.

-తర్వాత మిక్సీ గిన్నెలో కొబ్బరి ముక్కలన్నీ వేసి బరకగా గ్రైండ్ చేసుకోవాలి.

-ఇప్పుడు 10 యాలకలను దంచి పక్కన పెట్టుకోండి.

-తర్వాత ఓ ట్రే తీసుకొని దాని అంచులకు,సైడ్స్ కి నెయ్యి రాసుకోండి.

-ఇప్పుడు మిక్సీలో వేసి చేసుకున్న కొబ్బరి తురుము కొలుచుకోండి. ఎందుకంటే దీనికి సమానంగా చక్కెర వేసుకోవాలి. ఒక ముదురు కొబ్బరికాయ అయితే సాధారణంగా రెండున్నర కప్పుల తరుము వస్తుంది.

-ఇప్పుడు స్టవ్ మీద అడుగు మందంగా ఉండే గిన్నె పెట్టి అందులో 2 కప్పుల చక్కెర వేసి, అరకప్పు నీళ్లు పోసి కలుపుతూ ఓ లేత తీగ పాకం రానివ్వాలి.

-ఇప్పుడు కొబ్బరి తురుమును అందులో వేసి తక్కువ మంట మీద కలుపుతూ తెల్లని నురగ పాకం వచ్చేదాకా మరగనివ్వాలి.

-ఇప్పుడు అందులో యాలకల పొడి, కొద్దిగా నెయ్యి వేసి కలిపేశాక స్టవ్ ఆపేయండి.

-ఇప్పుడు ఈ మిశ్రమం మొత్తాన్ని నెయ్యి రాసి ఉంచిన ట్రేలో పోసేయండి. తర్వాత వెంటనే చాకుతో కొబ్బరి మిశ్రమానికి గాట్లు పెట్టుకొన్నాక కనీసం 2 గంటల పాటు చల్లారనివ్వాలి.

-తర్వాత దాన్ని ముక్కలుగా బయటకు తీసుకోండి. అంతే రసాలూరించే కొబ్బరి లౌజు రెడీ.