దగ్గు, జలుబు, జ్వరం లకు ఇంటి పరిష్కారం?

Diet Fitness

oi-Nageswara

By B N Sharma

Published: Thursday, April 5, 2012, 10:47 [IST]

సాధారణంగా మన ఇళ్ళలో కొత్తిమీరను అధికంగా వాడుతూంటాం. చాలా వంటకాలలో సువాసన, రుచి కొరకు కొత్తిమీర వాడతారు. సువాసన రుచి మాత్రమే కాక కొత్తిమీర వేసి తయారు చేసిన వంటకం చూడటానికి కూడా ఎంతో ఆకర్షణీయంగా వుంటుంది. కొత్తిమీర ఒక ప్రధానమైన ఔషధంగా కూడా చెప్పాలి. ఎన్నో ఆరోగ్య ప్రయోజనాలు కలిగిస్తుంది. ప్రత్యేకించి తెలుగువారి ఇండ్లలో ప్రతిరోజూ దీని వినియోగం కూరలు, సాంబార్, చారు మొదలైన వాటిలో విరివిగా వుంటుంది. కొత్తిమీర వాడకం లేని వంటలు వీరికి లేవనే చెప్పాలి. ఈ మొక్కను పెంచటం కూడా చాలా సులభంగా వుండటంతో, ప్రతి ఇంటి పెరటి తోటలో ఏ కూరగాయ చెట్టు వేసినా వేయకపోయినా, కొత్తిమీర, కరివేపాకు వంటి ఔషధ ప్రయోజనాలుకల మొక్కలు వేసి వాటి ప్రయోజనాలను పొందుతూనే వుంటారు.

ఈ మొక్కనుండి తీసిన విత్తనాలను ధనియాలు అంటారు. ధనియాలను కూడా ఎన్నో ఆరోగ్య ప్రయోజనాలకు వాడతారు. ధనియాల కషాయం దగ్గు, జలుబుల కు చికిత్సగా మంచి పరిష్కారంగా ఆయుర్వేద వైద్యులు సూచిస్తారు. కొత్తిమీర వాసన ఎంతో బాగుంటుంది. పచ్చని, ఆకులు, పచ్చని పండ్లతో వుంటుంది అవి పక్వానికి వస్తే గోధుమరంగులోకి తిరుగుతాయి. ఈ మొక్క మెడిటర్నేనియన్ ప్రాంతంనుండి మన దేశానికి వచ్చింది. సాధారణంగా కొత్తిమీర, ఉష్ణ ప్రదేశాలలోని నల్ల రేగడినేలలో బాగా పెరుగుతుంది.

కొత్తిమీర ఆకులలో ప్రొటీన్లు, కొవ్వు, మినరల్స్, పీచు, కార్బోహైడ్రేట్లు, నీరు వుంటాయి. మినరల్స్, విటమిన్లు పరిశీలిస్తే వాటిలో విటమిన్ సి, కాల్షియం, ఫాస్పరస్, ఐరన్, కెరోటీన్, ధయామైన్, రిబోఫ్లావిన్, నయాసిన్, సోడియం, పొటాషియం, ఆక్సాలిక్ యాసిడ్ లు వుంటాయి. కొత్తిమీర ఆకు ఎంతో ఉత్తేజాన్నిస్తుంది. టానిక్ ల వలే పనిచేస్తుంది. అవి పొట్ట గడబిడను దూరం చేస్తాయి. బలపరుస్తాయి. మంచి జీర్ణక్రియకు తోడ్పడతాయి.

మూత్ర సంబంధిత సమస్యలు, జ్వరం, వంటి వాటికి చికిత్సలో ఈ ఆకులను వాడవచ్చు. అంతేకాదు, మంచి కామోద్రేకాలు కలగాలంటే కూడా కొత్తిమీర ఆకులు, ధనియాలు వంటివి వాడతారు. సాధారణంగా చలికాలంలో శ్వాస కోశం, ఊపిరితిత్తులలో ఏర్పడే కళ్ళె కొత్తిమీర ఆకుల వాడకంతో తగ్గించుకోవచ్చు. ధనియాలు కషాయంగా వాడి, దగ్గు, జలుబు, జ్వరం వంటివి తగ్గించి శరీరానికి మంచి చల్లదన్నాన్ని కలిగించవచ్చు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.