సైకిలింగ్ తో మీకు చేకూరే ప్రయోజనాలు?

Diet Fitness

oi-Nageswara

By B N Sharma

Published: Thursday, July 5, 2012, 11:09 [IST]

నేటి రోజులలో ఉద్యోగాలు చేసే వారికి సైకిల్ వాహనం ఒక కొత్త రవాణాగా ఉంది. పర్యావరణాన్ని రక్షించండి...అంటూ వచ్చిన ఉద్యమం తర్వాత, కొంతమంది తెలివైనవారు సైకిల్ తొక్కటానికి ఇష్టపడుతున్నారు. అధిక మైలేజీలనిచ్చే బైక్ లు లేదా సుఖాలనిచ్చే కార్లు కూడా పక్కన పెట్టేస్తున్నారు. టీనేజర్ల దగ్గరనుండి మధ్య వయసు వారివరకు నేడు సైకిలింగ్ అనేది ఒక ఫ్యాషన్ అయి కూచుంది. కొంతమంది పర్యావరణం పేరుతో సైకిలింగ్ చేస్తే మరి కొందరు శరీరం ఆరోగ్యంగా ఉంటుందని చేస్తున్నారు. మరి సైకిలింగ్ అనేది మీకు ఎలా ఆరోగ్యాన్ని చేకూరుస్తుందో చూడండి.

సైకిలింగ్ చేయటం వలన వచ్చే ప్రయోజనాలు
కండరాలు బలపరుస్తుంది - సైకిలు తొక్కితే అది మీ శారీరక కండరాలను బలపరచి మంచి శక్తి కలిగిస్తుంది. ప్రత్యేకించి శరీరంలోని క్రింది భాగాలు అంటే, నడుము, తొడలు, పిరుదులు, పిక్కలు, పాదాలు లోని కండరాలు బలపడతాయి. బద్ధకంగా ఉందా? మీ సైకిల్ తీసుకొని ఒక రౌండ్ వేయండి. బద్ధకం వదిలిపోతుంది. మీరు తాజాగా ఉండటమే కాదు, శక్తిని కూడా పొదుతారు. దీనికి కారణం మీ శరీరంలోని జీవక్రియ పెరుగుతుంది.కండరాలు పటుత్వం సంతరించుకుంటాయి. ఈ వాహనంలో ప్రధానంగా గల ప్రయోజనాలు ఇవి.

శరీర బరువు తగ్గేటందుకు సహకరిస్తుంది - సైకిల్ తొక్కటం వలన బరువు త్వరగా తగ్గవచ్చు. అది మీలోని కేలరీలు ఖర్చు చేసి, కొవ్వు నిల్వలు కరిగిస్తుంది. వేగంగా కనుక సైకిల్ తొక్కితే, అసలు మీరు బరువు ఎక్కే ప్రసక్తి లేదు. కనుక సైకిల్ తొక్కే వారైతే, ఆహారం బాగా తగ్గించాల్సిన పని అసలే లేదు.
కీళ్ళ నొప్పులకు వ్యాయామం - కండరాలు బలపడటమే కాక, సైకిల్ తొక్కితే మీ కీళ్ళ నొప్పులు కరూడా మాయమవుతాయి. కీళ్ళ నొప్పులు తగ్గించాలంటే ఇది మంచి పరిష్కారం. మందులు వేయాల్సిన పనిలేదు. రెగ్యులర్ గా సైకిల్ తొక్కి దాని ప్రభావం చూడండి.

గుండె ఆరోగ్యానికి మంచిది - సైకిలు తొక్కటం గుండెకు మంచి వ్యాయామం అని కూడా చెపుతారు.
అది మీ శరీరంలోని రక్తప్రసరణ మెరుగుపరుస్తుంది. గుండె రక్తనాళాలలో బ్లాకేజీ లేకుండా చేస్తుంది. రీసెర్చి మేరకు, ప్రతిరోజూ 30 నిమిషాలు సైకిలింగ్చేస్తే అది గుండె జబ్బులను 50 శాతం వరకు నివారిస్తుందని వెల్లడైంది.

ఒత్తిడి తగ్గుతుంది - కొద్ది కిలోమీటర్ల పెడలింగ్ మీ శరీరంలో జీవప్రక్రియ అధికం చేస్తుంది. ఒత్తిడి, మానసిక వేదనలను తగ్గిస్తుంది. భాగస్వామితో భంగపడ్డారా? బాస్ తిట్టిపోశాడా? వెంటనే సైకిల్ ఎక్కి కొంత ప్రయాణించండి. ప్రకృతి అందాలు ఆస్వాదిస్తూ కొంత దూరం సైకిల్ తొక్కారంటే, మీలోని ఒత్తిడి, మరియు డిప్రెషన్ వంటివి దూరం అవుతాయి.
.
శ్వాస మెరుగుపరుస్తుంది - సైకిలింగ్ చేసేటపుడు మీరు అధికంగా గాలి తీసుకోవడం, వదలడం వంటివి చేస్తారు.గట్టిగా శ్వాస తీయడం, వదలడం మీలోని మలినాలను విసర్జిస్తుంది. వేగంగా సైకిల్ తొక్కితే అది మీ శ్వాసను పెంచి గుండెను కాపాడుతుంది.

సైకిల్ తొక్కటం వలన వచ్చే ప్రయోజనాలలో ఇవి కొన్ని. కనుక, మీ స్పోర్ట్ షూస్ వేసేయండి, సౌకర్యవంతమైన దుస్తులు ధరించండి, తేలికగా సైకిల్ పై ప్రయాణించండి.అయితే, సైకిల్ తోపాటు ఒక బాటిల్ నీరు, టవల్ కూడా వెంట పెట్టుకు వెళ్ళండి. ఎందుకంటే, సైకిలింగ్ లో చెమట అధికంగా పడుతుంది. పొట్టలో నీరు అధికంగా నింపవలసి వస్తుంది. కొత్తగా సైకిల్ తొక్కే వారికి కాలి పిక్కలు కొద్ది రోజులు నొప్పులు పెడతాయి. అటువంటపుడు తొక్కే దూరం తగ్గించండి. క్రమేణా దూరం, వేగం పెంచుతూ గట్టి శరీరాన్ని, ఆరోగ్యాన్ని కలిగి వుండండి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.