Heart Health: గుండె ఆరోగ్యం మెరుగుపడాలంటే ఈ వ్యాయామాలు చేయండి

ఏరోబిక్ వ్యాయామం:

ఏరోబిక్ వ్యాయామం రక్త ప్రసరణను మెరుగుపరుస్తుంది. దీని ఫలితంగా రక్తపోటు, హృదయ స్పందన రేటు తగ్గుతుంది. వీటితో పాటు ఏరోబిక్ వ్యాయామం చేస్తే శరీరం ఫిట్ గా ఉంటుంది. ఏరోబిక్స్ తో టైప్ 2 డయాబెటిస్ ప్రమాదం తగ్గుతుంది. ఇప్పటికే డయాబెటిస్ ఉంటే రక్తంలో గ్లూకోజ్ ని నియంత్రించడంలో సహాయపడుతుంది.

రోజూ కనీసం 30 నిమిషాల పాటు, వారానికి కనీసం 5 రోజులు ఏరోబిక్స్ చేస్తే మంచి ఫలితం ఉంటుంది.

బ్రిస్క్ వాకింగ్, రన్నింగ్, స్విమ్మింగ్, సైక్లింగ్, జంపింగ్ రోప్, హార్ట్ పంపింగ్ లాంటివి ఏరోబిక్ వ్యాయామాల కిందకు వస్తాయి.

రెసిస్టెన్స్ ట్రైనింగ్:

రెసిస్టెన్స్ ట్రైనింగ్ శరీరంపై నిర్దిష్ట ప్రభావాన్ని చూపుతుంది. కొవ్వును ప్రభావవంతంగా తగ్గిస్తుంది. ఏరోబిక్ వ్యాయామాలు, రెసిస్టెన్స్ ట్రైనింగ్ కలయిక వల్ల చెడు కొలెస్ట్రాల్ పోయి మంచి కొలెస్ట్రాల్ పెరుగుతుందని అధ్యయనాల్లో తేలింది.

వారంలో కనీసం రెండు రోజులు వరుసగా రెసిస్టెన్స్ ట్రైనింగ్ చేయాలని అమెరికన్ కాలేజ్ ఆఫ్ స్పోర్ట్స్ మెడిసిన్ సిఫార్సు చేస్తోంది. బరువులు ఎత్తడం, రెసిస్టెన్స్ బ్యాండ్లతో పుషప్స్, పులప్స్, స్క్వాట్స్ లాంటివి రెసిస్టెన్స్ ట్రైనింగ్ కిందకు వస్తాయి.

స్ట్రెచింగ్, ఫ్లెక్సిబిలిటీ, బ్యాలెన్స్:

స్ట్రెచింగ్, ఫ్లెక్సిబిలిటీ వర్కౌట్స్ గుండె ఆరోగ్యానికి దోహదం చేయవు. వాటి వల్ల మస్క్యులోస్కెలెటల్ ఆరోగ్యానికి ప్రయోజనం చేకూరుతుంది. కీళ్ల నొప్పులు, తిమ్మిరి, కండరాల సమస్య నుండి విముక్తి పొందవచ్చు.

రోజూ వ్యాయామం చేయడానికి ముందు ఆ తర్వాత తప్పనిసరిగా స్ట్రెచింగ్, ఫ్లెక్సిబిలిటీ, బ్యాలెన్స్ వర్కవుట్స్ తప్పనిసరిగా చేయాలని నిపుణులు సూచిస్తున్నారు.