బీర పొట్టు నువ్వు పచ్చడి: ఆహా ఏమి రుచి తినరా మైమరచి..!

Ridge Gourd Chutney: ఈ రోజు మనం బీర పొట్టు నువ్వు పచ్చడి గురించి తెలుసుకోబోతున్నాం. రోజూ పప్పు, సాంబార్లు తిని తిని నోరు చెడిపోయింటే, కాస్త వరైటీగా పచ్చళ్ళు తయారుచేసుకోవచ్చు.

పచ్చళ్ళల్లో వివిధ రకాలున్నాయి. అయితే చాలా సింపుల్ గా తయారుచేసుకునే పచ్చడి బీర పొట్టు నువ్వుల పచ్చడి. ఈ రెండు పదార్థాలు కూడా చాలా ప్రధానమైనవి. ఈ రెండు ఆరోగ్య పరంగా శరీరానికి ఎన్నో లాభాలను అందిస్తాయి. ముఖ్యంగా ఫైబర్ కంటెంట్ తో పాటు నువ్వుల్లో ఉండే ఐరన్ క్యాల్షియం రెండూ కూడా ఆరోగ్యానికి చాలా ముఖ్యమైన పోషకాలు. కాబట్టి రుచికి రుచి..ఆరోగ్యానికి ఆరోగ్యం.

ఇంకెందుకు ఆలస్యం బీర పొట్టు నువ్వుల పచ్చడి ఎలా తయారుచేయాలో తెలుసుకుని, రుచి చూసి టేస్ట్ ఎలా ఉందో మీ అభిప్రాయాన్ని మాతో పంచుకోండి.

కావాల్సిన పదార్థాలు:

బీరకాయ పొట్ట: 1 cup
నువ్వులు: 1 tbsp
పచ్చిమిర్చి: 5-10(మీ రుచికి సరిపడా వేసుకోవచ్చు)
ఎండు మిర్చి: 3(మద్యకు కట్ చేసుకోవాలి)
పసుపు: 1/2 tsp
ఉప్పు: 1tsp(రుచికి సరిపడా)
చింతపండు: నిమ్మకాయ సైజ్ అంత(నీళ్ళలో నానబెట్టుకోవాలి)
కొత్తిమీర: కొద్దిగా తరిగిపెట్టుకోవాలి
కరివేపాకు: రెండు రెమ్మలు

పోపుకోసం:

ఎండుమిర్చి: 2
నూనె: 2 tsp
ఆవాలు: 1tsp
శెనగపప్పు: 1tsp
ఉద్దిపప్పు: 1tsp
జీలకర్ర: 1tsp
కరివేపాకు: రెండు రెమ్మలు

తయారుచేయు విధానం:

1. ముందుగా స్టౌ ఆన్ చేసి, పాన్ పెట్టి నూనె వేసి , వేడి అయ్యాక అందులో పోపు దినుసులు , కరివేపాకు , పచ్చిమిర్చి, ఎండు మర్చి, నువ్వులు వేసి బాగా వేగనివ్వాలి.

2. అవి వేగిన కొద్ది సేపటికి బీర పొట్టు కూడా వేసి బాగా వేగనివ్వాలి.

3. ఆ తర్వాత పసుపు, ఉప్పు కూడా వేసి బాగా వేగిస్తూ పచ్చి వాసన పోయే వరకూ వేగించుకుని క్రిందికి దింపి, చల్లారనివ్వాలి.

4. వేగించి పెట్టుకున్న మిశ్రమం చల్లారిన తర్వాత మొత్తం మిశ్రమాన్ని మిక్సీ జార్ లో వేసి , దానికి నీళ్ళలో నానబెట్టుకున్న చింత పండుకూడా జోడించి మిక్స్ పట్టాలి. (కొంత మంది నైస్ రుబ్బుకుంటారు)కచపచాగా రుబ్బుకున్నా రైస్ కు బాగుంటుంది.

5. చివరగా స్టౌ మీద పాన్ పెట్టి, నూనె వేసి వేడి అయ్యాక అందులో కరివేపాకు, పోపు దినుసులు, ఎండు మిర్చి వేసి వేగిన తర్వాత పచ్చడిలో కలుపుకోవాలి. అంతే బీర పొట్టు నువ్వుల పచ్చడి రెడీ. ఇది రైస్ లోకి బెస్ట్ కాంబినేషన్. కాస్త నెయ్యి వేసుకుని తింటే రుచి అద్భుతంగా ఉంటుంది.