నార్త్ ఇండియా ఫేమస్ 'ఆలూ లచ్చా పరాఠా'..ఇలా చేసుకుంటే సూపర్ టేస్ట్

సాధారణంగా నార్త్ ఇండియాలో పరాఠాలను ఎక్కువగా తింటుంటారు. దక్షిణాదిలో కొన్ని ప్రాంతాలలోనే వీటిని తింటుంటారు. అయితే నార్త్ ఇండియాలో అయితే ఎక్కడికెళ్లినా ఉదయం బ్రేక్ పాస్ట్ లోకి, మధ్యాహ్నాం లంచ్ లోకి,నైట్ డిన్నర్ లోకి కూడా పరాఠాలను తింటుండటం మనం చూడవచ్చు. పరాఠాలలో కూడా అనేక రకాలు ఉంటాయి. అందులో ఒకటి ఆలు లచ్చా పరాటా. ఆలూ లచ్చా పరాఠా ఒక రుచికరమైన,ఆరోగ్యకరమైన వంటకం. ఇది పిల్లలకు, పెద్దలకు అందరికీ నచ్చుతుంది. దీనిని బంగాళాదుంప, గోధుమ పిండి, సుగంధ ద్రవ్యాలతో తయారు చేస్తారు.

ఆలూ లచ్చా పరాఠా పొరలుగా ఉండే ఒక రకమైన పరాఠా. ఇది సాధారణంగా ఉదయం పూట అల్పాహారంగా లేదా భోజనానికి సైడ్ డిష్ గా వడ్డిస్తారు. దీనిని మీరు మీ ఇంట్లో కూడా సులభంగా తయారుచేసుకోవచ్చు. ఆలూ లచ్చా పరాఠా తయారీకి కావలసిన పదార్థాలు, తయారీ విధానం ఇక్కడ చూడండి.

ఆలూ లచ్చా పరాఠా తయారీకి కావలసిన పదార్థాలు

గోధుమ పిండి: 2 కప్పులు
ఉడికించిన బంగాళాదుంపలు: 2 (గుజ్జుగా చేసుకోవాలి)
ఉల్లిపాయ: 1 (సన్నగా తరిగినది)
పచ్చిమిర్చి: 2 (సన్నగా తరిగినవి)
కొత్తిమీర: కొద్దిగా (సన్నగా తరిగినది)
గరం మసాలా: 1/2 టీస్పూన్
ధనియాల పొడి: 1/2 టీస్పూన్
జీలకర్ర పొడి: 1/4 టీస్పూన్
పసుపు పొడి: 1/4 టీస్పూన్
ఉప్పు: రుచికి సరిపడా
నూనె: కాల్చడానికి సరిపడా

ఆలూ లచ్చా పరాఠా తయారీ విధానం

-ముందుగా ఒక గిన్నెలో గోధుమ పిండి, ఉప్పు వేసి బాగా కలపాలి. కొద్దిగా నీరు పోస్తూ మెత్తని పిండి ముద్దలా చేసుకోవాలి. పిండిని 15 నిమిషాలు నానబెట్టాలి. పరాఠా మృదువుగా రావాలంటే పిండిని బాగా నానబెట్టాలి.

-తర్వాత ఒక గిన్నెలో ఉడికించిన బంగాళాదుంపలు, ఉల్లిపాయ, పచ్చిమిర్చి, కొత్తిమీర, గరం మసాలా, ధనియాల పొడి, జీలకర్ర పొడి, పసుపు పొడి, ఉప్పు వేసి బాగా కలపాలి.

-పిండిని చిన్న చిన్న ఉండలుగా చేసుకోవాలి. ఒక ఉండను తీసుకుని చపాతీలా ఒత్తుకోవాలి.

-ఒత్తిన చపాతీపై బంగాళాదుంప మిశ్రమాన్ని సమానంగా పరచాలి. బంగాళాదుంప మిశ్రమాన్ని సమానంగా పరచడం వల్ల పరాఠా రుచిగా ఉంటుంది. మీకు ఇష్టమైన కూరగాయలను కూడా బంగాళాదుంప మిశ్రమంలో చేర్చవచ్చు.

-చపాతీని రోల్ చేసి మళ్ళీ చపాతీలా ఒత్తుకోవాలి. లచ్చా పరాఠా చేసేటప్పుడు చపాతీలను సన్నగా ఒత్తుకోవడం వలన పొరలు బాగా వస్తాయి.

-ఇప్పుడు ఒక పాన్ వేడి చేసి దానిపై పరాఠాను వేసి రెండు వైపులా బంగారు రంగు వచ్చే వరకు కాల్చాలి.
పరాఠా కాల్చేటప్పుడు కొద్దిగా ఆయిల్ వేయాలి.

-పరాఠాలను నెయ్యితో కాల్చడం వలన రుచి మరింత పెరుగుతుంది. అంతే ఆలూ లచ్చా పరాఠా రెడీ.

-వేడి వేడి ఆలూ లచ్చా పరాఠాను పెరుగు లేదా చట్నీతో తింటే అదిరిపోతుంది.

దహీ తడ్కా శాండ్ విచ్..ఒక్కసారి తిన్నారంటే ఇంకా ఇంకా అంటారు,ఎలా చేయాలంటే

ఆలూ లచ్చా పరాఠా ప్రయోజనాలు

ఆలూ లచ్చా పరాఠాలో బంగాళాదుంపలు, గోధుమ పిండి ఉంటాయి. ఇవి రెండూ ఆరోగ్యానికి మేలు చేసే పోషకాలను కలిగి ఉంటాయి. బంగాళాదుంపలలో విటమిన్ సి, పొటాషియం, ఫైబర్ ఉంటాయి. గోధుమ పిండిలో ఫైబర్, ఐరన్, బి విటమిన్లు ఉంటాయి. బంగాళదుంపలు పిండిపదార్ధాలను కలిగి ఉండటం వలన శరీరానికి కావలసిన శక్తిని అందిస్తాయి. గోధుమ పిండిలో ఉండే పీచు పదార్ధం జీర్ణక్రియను మెరుగుపరుస్తుంది.