ఈ వీకెండ్ మురాదాబాదీ చికెన్ పులావ్‌ రుచి చూడండి.. ఫిదా అవ్వాల్సిందే!

వీకెండ్ లో నాన్ వెజ్ లాగించాలని చూసే వాళ్లు చాలామందే ఉంటారు. అయితే ప్రతిసారీ రెగ్యులర్ చికెన్ వెరైటీలు తిని తిని బోర్ కొట్టేసిందా? అయితే ఈసారి వెరైటీగా మురాదాబాదీ చికెన్ పులావ్ ట్రై చేయండి. వీకెండ్ లో ఫ్రెండ్స్, కుటుంబ సభ్యులతో కలిసి ఆస్వాదించడానికి మురాదాబాదీ చికెన్ పులావ్ పర్ఫెక్ట్ ఛాయిస్.

ప్రముఖ సెలబ్రిటీ చెఫ్ కునాల్ కపూర్ తన ఇన్ స్టాగ్రామ్ అకౌంట్ లో షేర్ చేసిన ఈ అద్భుతమైన రెసిపీ ఇప్పుడు ఆహార ప్రియుల మనసు దోచుకుంటోంది. మురాదాబాదీ చికెన్ పులావ్ ఈ వీకెండ్ లో మీ ఇంట్లోనే ఈజీగా ఎలా తయారుచేసుకోవాలో ఇక్కడ చూడండి.

మురాదాబాదీ చికెన్ పులావ్ తయారీకి కావలసిన పదార్థాలు

ఎముకలతో కూడిన చికెన్ - 1 కిలో
పెరుగు - 1 కప్పు
నిమ్మరసం - 3 టేబుల్ స్పూన్లు
పచ్చిమిర్చి పేస్ట్- 2 టేబుల్ స్పూన్లు
అల్లం వెల్లుల్లి పేస్ట్ - 2 టేబుల్ స్పూన్లు
సోంపు పొడి - 1 టేబుల్ స్పూన్
ధనియాల పొడి - 2 టేబుల్ స్పూన్లు
జాపత్రి - 2 లేదా 3 బ్లేడ్లు
దాల్చిన చెక్క - 2 ముక్కలు
బిర్యానీ ఆకు- 2
మిరియాలు - 10
యాలకులు-5
లవంగాలు - 5
జాజికాయ - పావు వంతు
ఉప్పు - రుచికి సరిపడా
బాస్మతి బియ్యం - 2 కప్పులు
నెయ్యి లేదా నూనె - 1 కప్పు
సన్నగా తరిగిన ఉల్లిపాయలు - ఒకటిన్నర కప్పులు
నీరు - 2.5 నుండి 3 కప్పులు
పచ్చిమిర్చి - 6
కుంకుమపువ్వు - చిటికెడు
ఉప్పు - రుచికి తగినంత

మురాదాబాదీ చికెన్ పులావ్ తయారీ విధానం

-ముందుగా ఒక పెద్ద గిన్నెలో చికెన్ ముక్కలు తీసుకుని, అందులో పెరుగు, నిమ్మరసం, పచ్చిమిర్చి పేస్ట్, అల్లంవెల్లుల్లి పేస్టు, సోంపు, ధనియాల పొడి, ఉప్పు, మసాలా దినుసులన్నీ వేసి బాగా కలపాలి. ఈ మిశ్రమాన్ని కనీసం 2 నుండి 6 గంటల పాటు ఫ్రిడ్జ్ లో లేదా పక్కన పెట్టేసుకోండి.

-బాస్మతి బియ్యాన్ని కడిగి 30 నిమిషాల పాటు నానబెట్టి, ఆ తర్వాత నీటిని వడకట్టాలి.

-మందపాటి గిన్నెలో నెయ్యి లేదా నూనె వేడి చేసి, ఉల్లిపాయలను లేత బంగారు రంగు వచ్చేవరకు వేయించాలి. పక్కన పెట్టుకున్న మ్యారినేట్ చేసిన చికెన్ వేసి, అందులోని నీరు బయటకు వచ్చేలా ఉడికించాలి. తర్వాత అందులో తగినంత నీరు పోసి, చీల్చిన పచ్చిమిర్చి వేయాలి. చికెన్ మెత్తగా ఉడికే వరకు ఉంచాలి.

-నీరు ఉడుకుతున్నప్పుడు నానబెట్టిన బాస్మతి బియ్యాన్ని వేసి మెల్లగా కలపాలి. నీరంతా ఇంకిపోయేంత వరకు ఉడకనివ్వాలి.

-చివరగా కరిగించిన కుంకుమపువ్వు నీటిని పైన చల్లి, మూతపెట్టి (దమ్ చేసి) 15-20 నిమిషాల పాటు తక్కువ మంట మీద ఉడికించాలి.

-స్టవ్ ఆపేశాక 10 నిమిషాలు ఆగి మెల్లగా కలుపుకోవాలి. అంతే గుమగుమలాడే మురాదాబాదీ చికెన్ పులావ్ రెడీ.