రంజాన్ ఉపవాసకులకు ‘బీఫ్ కట్లెట్’..!!

Published: Tuesday, August 23, 2011, 12:27 [IST]

'బీఫ్ కట్లెట్' ఈ వంటకం మహ్మదీయులకు రంజాన్ ఉపవాస సమయంలో మరింత శక్తిని ప్రసాదిస్తుంది. ఉదయం నుంచి ఉపవాసం చేసి ఉన్న వీరు వంటకాలు తయారు చేసుకునే సమయంలో అలసటకు గురవుతారు. అయితే తక్కవ సమయంలో తయారు చేసుకునే రుచికరమైన 'బీఫ్ కట్లెట్'ను సాయంసంధ్యవేళ సంతృప్తికరంగా ఆరగించవచ్చు. ఒక సారి ట్రై చేసి చూస్తే.. మీరే ఈ వంటకానికి 'బెస్ట్ సర్టిఫికెట్' ఇస్తారు. ఈ వంటకం కోసం అతిగా ఖర్చు పెట్టాల్సిన అవసరం కూడా లేదు. తాజా బీఫ్ కైమా, ఇతర దినుసులతో కేవలం అరగంట వ్యవధిలో ఈ వంటకాన్ని తయారుచేసి ఇంటిల్లి పాది 'బీఫ్ కట్లెట్' ఘుమఘుమను రుచి చూడవచ్చు.

తయారీకి కావల్సిన పదార్థాలు :
- తాజా బీఫ్ కైమా - 250 గ్రాములు
- పేలాల పిండి - 2 టేబుల్ స్పూన్లు
- ఉల్లిపాయులు - 2 (సన్నగా తరుగుకోవాలి)
- అల్లవెల్లులి పేస్ట్ - 1 టేబుల్ స్పూన్
- పచ్చిమిరిపకాయలు - 4 (సన్నగా తరుగుకోవాలి)
- మిరియాలు - 1 టేబుల్ స్పూన్
- కారం - 1 టేబుల్ స్పూన్
- వెనిగర్ - 1 టీ స్పూన్
- బ్రెడ్ ముక్కలు (తగినన్ని)
- నూనె - 5 టేబుల్ స్పూన్లు
- సాల్ట్ - సరిపడినంత

తయారీ విధానం:
ముందుగా 'బీఫ్ కైమాను' కుక్కర్‌లో ఒక విజిల్ వచ్చేంత వరకు ఉడికించుకోవాలి. ఉడికించిన కైమాను ఒక బౌల్‌లోకి తీసుకుని వెనిగార్, సాల్ట్‌ను కలపాలి. తరగిపెట్టకున్న ఉల్లి, పచ్చిమిర్చి, అల్లం వెల్లులి పేస్ట్ మిశ్రమాన్ని జోడించి, కారం, మిరియాలను చల్లి, చివరిలో పేలాల పిండి వేసి కలుపుకోవాలి. ఇలా కలగలిపిన పదర్థాన్ని గుండ్రటి కట్లెట్ ఆకృతిలో తీర్చిదిద్దుకోవాలి. ఈ కట్లెట్‌ను ఫ్రై చేసుకునే విధంగా నూనెను వేడి చేసుకోవాలి. నూనెలో వేసే ముందు కట్లెట్‌కు రెండు వైపులా బ్రెడ్ ముక్కలను పెట్టి వేయించండి అంతే మీరు కావాలనుకున్న 'బీఫ్ కైమా' తయార్.. ఇక వేడి వేడిగా తినటమే తరువాయి..!!