ఆపిల్-కోకనట్ హల్వా: న్యూట్రీషియన్ స్వీట్ రిసిపి

రోజుకో ఆపిల్‌ తింటే.. మహాభాగ్యం లాంటి ఆరోగ్యం మీ సొంతం అవుతుంది. యాపిల్‌ ఉపయోగాలు తెలుసుకుంటే ఇది నిజం అని మీరే అంగీకరిస్తారు. యాంటి ఆక్సిడెంట్స్‌ అధికంగా కలిగి ఉన్న యాపిల్‌ మనకు పలురకాల క్యాన్సర్‌ల నుంచి రక్షణ ఇస్తుంది.యాపిల్‌ ఏజింగ్‌ ప్రాసెస్‌ నుంచి రక్షిస్తుంది. ఏజింగ్‌ కారణంగా సంభవించే బ్రెయిన్‌ డామేజ్‌ని నివారిస్తుంది. బ్రెయిన్‌ఫుడ్‌గా పనిచేసి..బ్రెయిన్‌ను సమర్ధవంతంగా పనిచేసేలా చేస్తుంది. హృద్రోగాలను నివారించడం, నిరోధించడం చేయగలదు. రోజూ ఒక యాపిల్‌ తీసుకుంటే లంగ్‌ క్యాన్సర్‌ రానే రాదు.

అలాగే పచ్చికొబ్బరి గురించి తెలియనివారుండరు. ముఖ్యంగా సౌత్ ఇండియన్ వంటల్లో కొబ్బరి వాడకం ఎక్కువే. అందం, ఆరోగ్యం ఇలా అనేక రకాలుగా కొబ్బరి మనిషికి మేలు చేస్తుంది. అత్యధిక పోషకాలున్న డ్రై ఫ్రూట్స్ వల్ల అనేక లాభాలున్నాయి. డ్రై ఫ్రూట్స్ లో మోనోశాచ్యురేటెడ్‌ ఫ్యాటియా సిడ్లు, విటమిన్‌ ఇ ఉంటాయి. ఈ రెండూ గుండెజబ్బుల బారి నుంచి కాపాడుతాయి. రోజూ కనీసం ఐదారు బాదం పప్పులు తప్పనిసరిగా తీసుకోవాలి. మరి ఇన్ని ఉత్తమ విలువలున్న ఈ రెండు కాంబినేషన్లతో ఓ వంటకం చేస్తే, మీ శరీరానికి కావలసినన్నప్రోటీన్లు లభిస్తాయి.

కావల్సిన పదార్థాలు:
ఆపిల్: 1
కొబ్బరి తురుము: 1cup
డ్రై ఫ్రూట్స్: 20 grams
నెయ్యి: 2 tbsp
పంచదార: 1 cup
పాలు : 1 cup
యాలకలపొడి: కొద్దిగా

తయారుచేయు విధానం:
1. ఒక పాన్ తీసుకొని అందులో నీళ్ళు, పాలు, పంచదార, ఆపిల్ తురుము వేసి మొత్తం మిశ్రమాన్ని బాగా మిక్స్ చేయాలి.
2. ఇప్పుడు ఈ పాన్ ను స్టౌ మీద పెట్టి, మీడియం మంట మీద కొన్ని నిముషాలు ఉడికించాలి. మొత్తగా పేస్ట్ అయ్యే వరకూ ఉడికించుకోవాలి.
3. మొత్తం మిశ్రమం చిక్కబడే సమయంలో అందులో డ్రైఫ్రూట్స్ (రఫ్ గా పొడి చేసుకొని లేదా అలాగే )వేసుకొని, బాగా మిక్స్ చేయాలి. చివరగా కొద్దిగా నెయ్యి వేసి మొత్తం మిశ్రమాన్ని కలగలుపు కోవాలి.
4. ఆ తర్వాత కొబ్బరి తురుము, యాలకలపొడి వేసి మరో సారి మిక్స్ చేయాలి . అలాగే కొద్దిగా నెయ్యి మిక్స్ చేసి తర్వాత మరికొన్ని నిముషాలు ఉడకించుకోవాలి. చివరగా కొద్దిగా ఫుడ్ కలర్ అవసరం అనిపిస్తే జోడించుకోవచ్చు . అంతే ఆపిల్ హల్వా రెడీ. ఒక ప్లేట్ లోకి సర్వ్ చేసి, చెర్రీస్ తో గార్నిష్ చేసి వేడి గా లేదా చల్లగా సర్వ్ చేయాలి. అంతే యాపిల్ హల్వా రెడీ...