బలం, ఆరోగ్యం, రుచి.. ఒకే సున్నుండలో..ఇంట్లోనే ఈజీగా ఇలా చేసుకోండి

సున్నుండలు పేరు వింటేనే కొందరికి నోట్లో నీళ్లూరుతుంటాయి. తెలుగువారి సాంప్రదాయ పిండి వంటలలో సున్నుండలకు ఒక ప్రత్యేక స్థానం ఉంది. ముఖ్యంగా మినప సున్నుండలు కేవలం రుచికరమైనవే కాకుండా, ఆరోగ్యానికి చాలా మేలు చేస్తాయి. ఎన్నో ఏళ్లుగా మన పెద్దలు వీటిని పౌష్టికాహారంగా భావించి, పిల్లల ఎదుగుదలకు, బాలింతలకు, బలహీనంగా ఉన్నవారికి ఇచ్చేవారు. సున్నుండలను తయారుచేసుకోవడం చాలా ఈజీ. మీ ఇంట్లోనే సులభంగా మినప సున్నుండలు తయారుచేసుకోడానికి కావాల్సిన పదార్థాలు,తయారీ విధానం ఇక్కడ చూడండి.

కావలసిన పదార్థాలు

-పొట్టు లేని మినపప్పు- 2 కప్పులు సుమారు 500 గ్రాములు
-బెల్లం లేదా చక్కెర- 1.5 కప్పు
-నెయ్యి - 1 కప్పు
-యాలకుల పొడి - 1 టీస్పూన్
-జీడిపప్పు, బాదం పప్పు-2 టేబుల్ స్పూన్లు

తయారీ విధానం

-ముందుగా మినపప్పును ఒక మందపాటి గిన్నెలో లేదా కడాయిలో వేసి తక్కువ మంటపై బంగారు గోధుమ రంగులోకి మారే వరకు వేయించాలి. దీనికి సుమారు 10-15 నిమిషాలు పట్టవచ్చు.

-వేయించిన మినపప్పును ఒక ప్లేట్‌లోకి తీసి పూర్తిగా చల్లారనివ్వాలి.

-పూర్తిగా చల్లారిన మినపప్పును మిక్సీ గిన్నెలో వేసి మెత్తని పొడిలా చేసుకోవాలి. పిండి ఎంత మెత్తగా ఉంటే సున్నుండలు అంత రుచిగా ఉంటాయి. అవసరమైతే జల్లించుకోవచ్చు.

-మిక్సీ పట్టిన మినపపిండిని ఒక పెద్ద గిన్నెలోకి తీసుకోవాలి. ఇప్పుడు ఈ పిండిలో బెల్లం పొడిని లేదా చక్కెరను కలపాలి. బెల్లం అయితే ముందే దాన్ని సన్నగా తురుముకోవాలి లేదా మిక్సీలో పొడి చేసుకోవాలి. ఇందులోనే యాలకుల పొడిని కూడా కలిపి అంతా బాగా కలిసేలా చేతితో కలపాలి.

ఒకప్పుడు బడుల ముందు అమ్మే బెల్లం బోండాలు..రుచిలో దీన్ని మించిన స్నాక్ లేదు..ఇంట్లోనే ఎలా చేసుకోవాలంటే..

-తర్వాత కరిగించిన నెయ్యిని కొద్దికొద్దిగా పిండిలో పోస్తూ కలపాలి. ఒకేసారి మొత్తం నెయ్యి పోయకూడదు.

-పిండిని సున్నుండలు కట్టడానికి వీలయ్యేలా నెయ్యి పోస్తూ కలపాలి.

-జీడిపప్పు, బాదం పప్పు ముక్కలు వేయాలనుకుంటే వాటిని నెయ్యిలో కొద్దిగా వేయించి ఇప్పుడు పిండిలో కలుపుకోవచ్చు.

-పిండి మిశ్రమం గోరువెచ్చగా ఉన్నప్పుడే సున్నుండలు చుట్టడం ప్రారంభించాలి. పూర్తిగా చల్లారిపోతే గట్టిపడి కట్టడం కష్టం అవుతుంది.

-చిన్న చిన్న ఉండలుగా తీసుకుని గుండ్రంగా, గట్టిగా సున్నుండలు చుట్టాలి. మీకు నచ్చిన సైజులో చేసుకోవచ్చు.

-తయారుచేసిన సున్నుండలను గాలి చొరబడని డబ్బాలో నిల్వ చేసుకోవాలి. ఇవి సుమారు 10-15 రోజుల వరకు ఫ్రెష్ గా ఉంటాయి.