హై బీపీ కంటే లో బీపీనే డేంజర్? ఇంట్లోనే రక్తపోటును నార్మల్ చేసే 5 హోమ్ రెమెడీస్!

చాలామంది హై బీపీ గురించి భయపడుతూ తగిన జాగ్రత్తలు తీసుకుంటారు, కానీ లో బీపీ (Low BP)కూడా అంతే ప్రమాదకరమైనది అన్న విషయం చాలా కొద్ది మందికే తెలుసు. సాధారణంగా మన శరీరంలో రక్తపోటు 120/80 mmHg ఉండాలి. ఇది అకస్మాత్తుగా సాధారణ స్థాయి కంటే పడిపోయినప్పుడు దానిని లో బీపీ అంటారు. ఇలా జరిగినప్పుడు కళ్లు తిరగడం, చూపు మసకబారడం, విపరీతమైన నీరసం, గుండెదడ, ఆందోళన లేదా స్పృహ కోల్పోవడం లాంటి లక్షణాలు కనిపిస్తాయి. మన ఇంట్లో ఉండే వస్తువులతోనే క్షణాల్లో ఈ సమస్యను అదుపు చేయవచ్చు.

తక్షణ శక్తినిచ్చే ఉప్పు నీరు

రక్తపోటు అకస్మాత్తుగా పడిపోయినప్పుడు దానిని వెంటనే సాధారణ స్థితికి తీసుకురావడంలో ఉప్పు నీరు సంజీవనిలా పనిచేస్తుంది. ఉప్పులో ఉండే సోడియం రక్తపోటును వేగంగా పెంచుతుంది. గ్లాసు నీటిలో అర టీస్పూన్ ఉప్పు కలిపి రోగితో నెమ్మదిగా తాగించాలి. అయితే గుండె సంబంధిత వ్యాధులు లేదా కిడ్నీ సమస్యలు ఉన్నవారు డాక్టర్ సలహా లేకుండా ఈ చిట్కాను వాడకూడదు. ఇది అత్యవసర పరిస్థితుల్లో తక్షణ ఉపశమనం కోసం మాత్రమే.

ఎలక్ట్రోలైట్స్, ఓఆర్ఎస్ లేదా నిమ్మరసం

శరీరంలో తగినంత నీరు లేకపోవడం (డీహైడ్రేషన్), ఎలక్ట్రోలైట్ల కొరత వల్ల కూడా బీపీ ఒక్కసారిగా పడిపోతుంది. అలాంటప్పుడు శరీరానికి తక్షణమే ఫ్లూయిడ్స్ అందించాలి. మీ ఇంట్లో గ్లూకోజ్ పౌడర్ లేదా ఓఆర్ఎస్ ప్యాకెట్ ఉంటే వెంటనే నీటిలో కలుపుకుని తాగండి. అవి అందుబాటులో లేకపోతే ఒక గ్లాసు నీటిలో కొద్దిగా నిమ్మరసం పిండి, అందులో ఒక చెంచా చక్కెర, చిటికెడు ఉప్పు వేసి తాగండి. ఇది శరీరానికి తక్షణ శక్తిని ఇచ్చి, రక్తపోటును నార్మల్ చేస్తుంది.

స్ట్రాంగ్ కాఫీ లేదా బ్లాక్ టీ

అకస్మాత్తుగా బీపీ తగ్గిపోయి తీవ్రంగా కళ్లు తిరుగుతున్నట్లు అనిపిస్తే, కెఫీన్ తీసుకోవడం ఒక బెస్ట్ ఆప్షన్. లో బీపీతో బాధపడేవారికి ఒక కప్పు వేడి వేడి బ్లాక్ కాఫీ లేదా చిక్కటి స్ట్రాంగ్ టీ ఇవ్వండి. ఇందులోని కెఫీన్ గుండె స్పందన రేటును కొద్దిగా పెంచి, రక్తనాళాలను సంకోచింపజేస్తుంది. ఫలితంగా రక్తపోటు వెంటనే పెరుగుతుంది. అయితే మోతాదుకు మించి కెఫీన్ తీసుకోవడం ఆరోగ్యానికి హానికరం కాబట్టి దీన్ని రోజూవారీ అలవాటుగా చేసుకోకండి.

కాళ్లను ఎత్తులో ఉంచి పడుకోవడం

లో బీపీ కారణంగా ఎవరైనా కళ్లు తిరిగి పడిపోయే స్థితిలో ఉంటే, వారిని కూర్చోబెట్టడం లేదా నిలబెట్టడం చేయకండి. వెంటనే వారిని నేల మీద వెల్లకిలా పడుకోబెట్టాలి. ఆ తర్వాత వారి కాళ్ల కింద రెండు లేదా మూడు దిండ్లు పెట్టి, తల కంటే పాదాలు ఎత్తులో ఉండేలా చూడాలి. ఈ పొజిషన్ వల్ల కాళ్లలో ఉన్న రక్తం వేగంగా గుండె, మెదడు వైపు ప్రవహిస్తుంది. దీంతో మెదడుకు ఆక్సిజన్ అంది కళ్లు తిరగడం ఆగిపోతుంది.

ఎండుద్రాక్ష లేదా తీపి పదార్థాలు తినడం
శరీరంలో రక్తంలో గ్లూకోజ్ స్థాయిలు పడిపోవడం వల్ల కూడా బీపీ తగ్గుతుంది. ఆయుర్వేదం ప్రకారం లో బీపీ నివారణకు ఎండుద్రాక్ష అద్భుతమైన ఔషధం. మీ బీపీ తగ్గినట్లు అనిపించిన వెంటనే గుప్పెడు ఎండుద్రాక్షలు నమలడం లేదా ఇంట్లో ఉన్న ఏదైనా చాక్లెట్, స్వీట్, ఖర్జూరం లాంటివి తినడం చేయాలి. ఇది శరీరానికి తక్షణమే గ్లూకోజ్‌ను అందించి నీరసాన్ని పూర్తిగా తగ్గిస్తుంది.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.