Baby Aya, Syria Earthquake: భూకంప శిథిలాల్లో శిశువుకు జననం, ఆ పాప ఓ 'అద్భుతం'

ఈతరంలో కనీవినీ ఎరుగని ఘోర ప్రకృతి విపత్తు టర్కీ, సిరియాలో సంభవించిన భూకంపం. ఈ ఘోర ప్రకృతి విలయంలో ఇప్పటి వరకు 21 వేల మందికి పైగా మరణించారు. టర్కీ, సిరియాల్లోని నివాస ప్రాంతాలు శవాల దిబ్బలుగా మారాయి. ఎటు చూసిన కన్నీటి దృశ్యాలే కనిపిస్తున్నాయి. మనసుల్ని కకావికలం చేసే ఘటనలు వెలుగుచూస్తున్నాయి. భూకంప తీవ్రతతో కుప్పకూలిన ఓ భవనం శిథిలాల కింద ఓ తల్లి శిశువుకు జన్మనిచ్చింది.

భూప్రళయంలో తల్లిదండ్రులు, తోబుట్టువులు ప్రాణాలు కోల్పోగా, చనిపోతున్న ఆఖరి క్షణంలో ఆ తల్లి తన శిశువుకు బిడ్డనిచ్చింది. అలా కొత్త ఊపిరి పోసుకుంది అయా అనే శిశువు.

టర్కీ, సిరియాల్లో సోమవారం తెల్లవారుజామున వచ్చిన భూకంపంలో సిరియాలోని జిండిరెస్ ప్రాంతంలో ఓ నిండు గర్భిణి తన కుటుంబంతో శిథిలాల కింద చిక్కుకుపోయింది. శిథిలాలు మీద పడటంతో కుటుంబసభ్యులు ప్రాణాలు కోల్పోగా ఆ గర్భిణి కూడా చావు అంచుల్లో నిలబడింది. అప్పుడే ఆమెకు పురిటి నొప్పులు మొదలయ్యాయి. చావు అంచుల్లో ప్రసవ వేదన భరిస్తూ ఓ బిడ్డకు జన్మనిచ్చింది. తర్వాత ఆమె కూడా ప్రాణాలు కోల్పోయింది.

సహాయక చర్యల్లో భాగంగా రెస్క్యూ సిబ్బంది భవన శిథిలాలను తొలగిస్తున్న సమయంలో వారికి చిన్నారి ఏడుపు వినిపించింది. ఆ ఏడువు వస్తున్న చోటుకు హుటాహుటినా వెళ్లిన సిబ్బంది నెమ్మదిగా ఒక్క శిథిలాన్ని తొలగించారు. కింద ఉన్న ఆ చిన్నారికి ఆ గాయం కాకుండా భవన వ్యర్థాలను నెమ్మదిగా తొలగించి ఆ పసికందును సురక్షితంగా బయటకు తీశారు.

ఒంటి నిండి రక్తంతో, బొడ్డు తాడు వేలాడుతూ, గాయాలతో, శ్వాస కూడా తీసుకోలేని స్థితిలో ఆ పసికందును ఆస్పత్రికి తరలించారు. అయితే ఇప్పుడు ఆ పసికందు ఆరోగ్య పరిస్థితి నిలకడగా ఉందని వైద్యులు వెల్లడించారు. వైద్యులే ఆ శిశువుకు అయా అనే పేరు పెట్టారు. అయా అంటే అద్భుతం అని అర్థం. శిథిలాల కింద జన్మనివ్వడం తల్లి చనిపోయాక ఆ శిశువు బతికిబట్టకట్టడం నిజంగా ఓ అద్భుతమనే చెప్పాలి. అందుకే వారు ఆ శిశువుకు అయా అనే పేరు పెట్టారు.

ఈ విషయం, పాప ఫోటోలు సామాజిక మాధ్యమాల్లో వైరల్ కావడంతో ఆ చిన్నారిని దత్తత తీసుకుంటామని వేలాది మంది ముందుకొచ్చారు. కానీ బంధువులే ఆ పసికందు బాధ్యత తీసుకున్నారు. చికిత్స అందిస్తోన్న ఓ వైద్యుడి భార్యే ఆ శిశువుకు పాలు పట్టి మానవత్వాన్ని చాటుకుంది.