ఆంధ్రప్రదేశ్‌లో సంక్రాంతి సంబరాలు ఆకాశాన్ని అంటుతాయి, ఎలా చేసుకుంటారో తెలుసా?

భోగి నుండి సంబరాలు మొదలు

తెల్లవారుజామునే నిద్ర లేచి స్నానం చేస్తారు. ఇంట్లోని పాత వస్తువులతో, కర్రలతో భోగి మంటలు వెలిగిస్తారు. వీధి వాళ్లంతా కలిసి ఆ మంటల వద్ద చేరుతారు. భోగి రోజు చిన్నపిల్లలకు భోగి పండ్లతో స్నానం చేయిస్తారు. భోగి రోజు అందరూ కొత్త బట్టలు ధరిస్తారు.

కొంత మంది రైతులు భోగి రోజు సాంప్రదాయంగా కొంత భూమిలో సాగు పనులు ప్రారంభిస్తారు. నీరు పారించడాన్ని పులకేయడం అంటారు. భోగి రోజు నీరు పారించడాన్ని భోగి పులక అంటారు.

సంక్రాంతి రోజు అసలు సిసలైన వేడుకలు

• సంక్రాంతి రోజున తెల్లవారుజామునే లేచి ముగ్గులు వేస్తారు. రకరకాల రంగులతో ఆ ముగ్గులను వేస్తారు. సంక్రాంతి రంగవల్లులు అంటే వీధిలో పెయింటింగ్‌లు వేసినట్లుగానే ఉంటాయి. రంగవల్లుల్లో గొబ్బెమ్మలను పెడతారు. గొబ్బెమ్మల చుట్టూ గొబ్బెమ్మల పాటలు పాడతారు.
• ముందుగా సిద్ధం చేసి పెట్టుకున్న రకరకాల పిండి వంటలను దేవుళ్లకు సమర్పిస్తారు.
• అందంగా అలంకరించిన గంగిరెద్దులను ఇంటింటికి తిప్పుతారు. వాటితో రకరకాల విన్యాసాలు చేయిస్తారు. డోలు సన్నాయి గంగిరెద్దులు సంక్రాంతి పండగకు ప్రతిబింబం లాంటివి.
• హరిదాసులు ఇంటింటికి తిరుగుతూ భిక్షం అడుగుతారు.
• మకర సంక్రాంతి రోజున దానాలు చేస్తే ఎంతో పుణ్యం వస్తుందని చెబుతారు. గత పాపపుణ్యాలు తొలగిపోతాయని అంటారు.
• మకర సంక్రాంతి రోజున ఆడపడుచులను, కొత్త అల్లుల్లను ఇంటికి పిలిచి కొత్త బట్టలు పెడుతుంటారు.



కనుమ రోజు ఏం చేస్తారంటే..

• మూడో రోజు కనుమ పండగను జరుపుకుంటారు.
• బంధువులతో విందు వినోదాల్లో పాల్గొంటారు.
• ఈ పండగ దినాల్లో కోల్ల పందాలు నిర్వహిస్తారు.
• కనుమ రోజున ఆవులు, దూడలు, ఎద్దులను శుభ్రంగా కడుగుతారు. వాటి కొమ్ములను అందంగా అలంకరిస్తారు. కొమ్ములకు డబ్బుల మూట కడతారు.
• అందంగా అలంకరించిన పాడి పశువులను వీధుల్లో తిప్పుతారు. పశువుల కొమ్ములకు ఉండే మూటలను తీసుకునేందుకు అందరూ ఎగబడతారు. వారు చేసే గోలతో పశువులు కంగారులో అవి పరుగులు పెడతాయి.
• సాయంత్రం అయ్యాక పశువులు ఒక చోట చేరుతాయి. వాటిపై నీటిని చల్లి వాటి కొమ్ములకు కట్టిన డబ్బుల మూటను ఇంటికి తీసుకెళ్తారు.
• లక్ష్మీ దేవి ఇంటికి వస్తున్నట్లు భావిస్తూ వాటిని ఇంటికి స్వాగతిస్తారు.



కోడిపందేలు:

• ఏపీలో జరిగే కోడి పందేలు ఎంత ఫేమస్సో ప్రత్యేకంగా చెప్పాల్సిన అవసరం లేదు. ఈ కోడి పందేల్లో పాల్గొవడానికి వివిధ రాష్ట్రాల నుండి వస్తారు.
• కోడి పందేలను చాలా మంది తమ ప్రతిష్టగా భావిస్తారు. అందులో తమ కోడి ఓడిపోతే తమ పరువు పోయిందన్నట్లుగా భావిస్తారు.
• కోడి వీరోచితంగా పోరాడుతుంటే తమ పౌరుషానికి చిహ్నంగా భావించే చాలా మంది పందెంరాయుళ్లు ఉన్నారు గోదావరి జిల్లాల్లో.
• పందేలు ఒకవైపు జరుగుతుంటే మరోవైపు వాటిపై బెట్టింగ్ కాసే వాళ్లు చాలా మంది ఉంటారు.
• సంక్రాంతి వచ్చిందంటే గోదావరి జిల్లాల్లో మొదలయ్యే పండుగ కోడిపందేలే. దాదాపు కోట్ల రూపాయల్లో పందేలు జరుగుతుంటాయి.
• కోడిపందెంలో గెలిచిన కోడికి ఎంత ప్రత్యేకత ఉంటుందో.. అలాగే ఓడిపోయి చనిపోయిన కోడికి కూడా అంతే ప్రత్యేకత ఉంటుంది. ఓడిపోయి చనిపోయిన కోడి మాంసాన్ని వేల రూపాయలు వెచ్చించి కొనుగోలు చేస్తారు.