బేబీలు బరువు సంతరించుకోవాలంటే!

Post Natal

oi-Nageswara

By B N Sharma

Published: Tuesday, April 3, 2012, 17:19 [IST]

పిల్లలు మొదటి కొద్ది సంవత్సరాలలో బరువు సంతరించుకోవటం మొదలు పెట్టి వేగంగా ఎదుగుదల పొందుతారు. తర్వాతి సంవత్సరాలలో వీరి ఎదుగుదల తక్కువగా వుంటుంది. అయితే, కొంతమంది పిల్లలు ఆశించిన మేరకు బరువు, ఎత్తు పొందలేరు. వివిధ కారణాలుగా వారి ఎదుగుదల అరికట్టబడుతుంది. సాధారణంగా ఒకే వయసు పిల్లలలో శారీరక ప్రమాణాలు వివిధ రకాలుగా వుంటాయి. ఇది పిల్లలలో సహజంగా వుండే ప్రక్రియ. దీనికి కారణం వారి ఆహారం, శారీరక శ్రమలేకాకుండా జన్యుపరమైన అంశాలు కూడా వుంటాయి.

చాలా మంది తక్కువ ఎత్తుతో తక్కువ బరువుతో చిన్నతనంలో వుంటారు. అటువంటి పిల్లలకు పరీక్షలు నిర్వహించి తగిన చికిత్స చేయాలి. ఆహార లేమిని అరికట్టాలి. అట్లే శారీరకంగా ధైరాయిడ్ లోపం వంటివి వున్నాయా? అనేది పరీక్షించాలి. దీనికిగాను వైద్యులు, కుటుంబ సభ్యులు కలసి పనిచేయాలి. బిడ్డను మరోమారు ఆరోగ్యకరమైన ఎదుగుదలకు సిద్ధం చేయాలి. ఖచ్చితమైన వ్యాధి లేకుండానే బిడ్డల ఎదుగుదల విఫలమవుతోందని సుమారు ఒక శతాబ్దంగా పోషకాహార నిపుణులు గుర్తిస్తున్నారు. ఈ రకంగా ఎదుగుదల లోపించిన పిల్లలు ఆశించిన రీతిలో బరువు పొందటానికి తగిన కేలరీలు లోపలికి తీసుకోలేరు. తీసుకున్నా వాటిని ఖర్చు చేయలేరు.

శిశువులలోను, బేబీలలోను చేసిన అనేక ఆరోగ్య పరీక్షలు మొదటి సంవత్సరాలలోనే వారికి ఈ విధమైన పరిస్ధితి ఏర్పడుతోందని ఇదే సమయంలో వారి శారీరక, మానసిక అభివృధ్ధి చోటు చేసుకుంటుండటంతో అది కుంటుపడుతోందని తెలుపుతున్నాయి. పుట్టిన తర్వాత ఒక బిడ్డ బ్రెయిన్ మొదటి సంవత్సరంలో ఎంత ఎదుగుదల చూపుతుందో అతని మిగిలిన జీవితంలో కూడా అంతే ఎదుగుదల చూపుతుంది. ఈ వయసులో వుండే పోషకాహారలేమి వారి మానసిక అభివృద్ధిపై శాశ్వతంగా వ్యతిరేక ప్రభావం చూపుతోంది.

చాలామంది పిల్లలు తమ మొదటి నాలుగు నెలల వయసులో రెండు రెట్లు బరువు పెరుగుతారు. ఒక సంవత్సరం వచ్చే సరికి మూడు రెట్లు కూడా పెరుగుతారు. కాని బరువు పెరగలేని పిల్లలు దీనిలో విఫలమవుతారు. ఒక్కొక్క సారి పిల్లలు బరువు ఎక్కడం మొదలు పెట్టి అతి త్వరలోనే తమ బరువు కోల్పోతుంటారు. కొంతకాలం గడిచే సరికి వారి ఎత్తు ఎదగడం కూడా నెమ్మదైపోతుంది. పరిస్ధితి మెరుగుపడుతూంటే, పోషకాహారలేమి కల పిల్లలు, వారి చుట్టుపక్కల పరిస్ధితిపై ఆసక్తి ప్రదర్శించలేరు. ఏ ఒక్కరిపైనా ఏకాగ్రత పెట్టలేరు. చికాకు, కోపం అధికమవుతాయి. వయసుకి తగిన ప్రవర్తన వారిలో ఏర్పడదు.

కనుక పిల్లలకు ప్రారంభ వయసులోనే తల్లితండ్రులు వారి వయసుకు తగిన పోషకాహారం ఇవ్వాలి. వారి సమస్యలను తగిన రీతిలో తగిన వైద్య విధానాలతో పరిష్కరించి వారి శారీరక, మానసిక ఆరోగ్యానికి కృషి చేయాలి.