బక్రీద్ స్పెషల్ భునాహువా గోష్

Published: Saturday, October 27, 2012, 12:04 [IST]

ముస్లింలు జరుపుకునే ముఖ్యమైన పండుగల్లో రంజాన్ పండుగ మైదటిదైతే..బక్రీద్ రెండవదిగా నిలిచింది. ఈద్‌గాలో నమాజు ముగుస్తుంది. అందరినీ చల్లగా చూడమని కోరే దువా ముగుస్తుంది. ఆ తర్వాత ఈద్ ముబారక్ చెప్పుకునే అలాయి బలాయి ముగుస్తుంది. ఆ తర్వాత..? ఇంకేముంది... విందులూ వినోదాలే. స్నేహితులు, బంధువులు, ఆత్మీయులు, అయినవాళ్లు... అందరూ కలిసి దావత్‌లో కూచుంటారు. మతాలు మర్చిపోయే క్షణాల్లో అందరూ ఆత్మీయులైపోతారు. మటన్, చికెన్, రోటీ, సేమ్యా... ఘుమఘుమలాడే పదార్థాల మధ్య మాటలు నంజుకుంటారు. నవ్వులు పంచుకుంటారు. పండుగలు ఉండాలి. ఒకరి పండుగలో మరొకరి లోగిలి కళకళలాడాలి. ఆ బహార్ కోసం ఓ స్పెషల్ వంటకం మీ కోసం...

కావలసిన పదార్థాలు:
మటన్: 1kg
పచ్చిమిర్చి: 8(నిలువుగా కట్ చేయాలి);
కరివేపాకు: రెండు రెమ్మలు
మిరప్పొడి: 3tsp
ఉప్పు: రుచికి తగినంత
అల్లం, వెల్లుల్లి పేస్ట్: 2tsp
పసుపు: 1/2tsp
షాజీరా: 1tsp
నిమ్మరసం: 2tsp
ఉల్లిపాయ తరుగు: 1cup
ధనియాల పొడి: 1tsp
ఎండుకొబ్బరిపొడి: 1ts
నూనె: సరిపడా
కొత్తిమీర: చిన్న కట్ట

తయారు చేయు విధానం:
1. ముందుగా ప్రెజర్‌ పాన్‌ లో మటన్, కొద్దిగా నీరు, ఉప్పు వేసి ఉడికించాలి. తర్వాత మటన్ లో ఉన్న నీటిని తీసేయాలి.
2. తర్వాత ఒక మందపాటి గిన్నెలో నూనె వేసి వేడయ్యాక అందులో షాజీరా, ఉల్లితరుగు, కరివేపాకు వేసి గోధుమరంగు వచ్చేవరకు వేయించాలి.
3. తర్వాత పచ్చిమిర్చి, అల్లం- వెల్లుల్లి పేస్ట్, పసుపు వేసి కలపాలి. తర్వాత మిరప్పొడి, ఉడికించిన మటన్ వేసి కలపాలి.
4. కొద్దిగా వేగాక ఎండుకొబ్బరి, ధనియాలపొడి వేసి బాగా వేగనివ్వాలి. తర్వాత దించి నిమ్మరసం కలిపి, కొత్తిమీరతో గార్నిష్ చేయాలి. అంతే భునాహువా గోష్ రెడీ...