టేస్టీ అండ్ హెల్తీ క్యాబేజ్ - ఎగ్ ఫ్రై

క్యాబేజ్ కూడా ఓ రకమైన పువ్వు జాతికి చెందినదే. విదేశాల నుండి భారతదేశానికి చేరింది. క్యాబేజ్ పువ్వులలో సి విటమిన్‌ పుష్కలంగా ఉన్నాయి. శరీరానికి అవసరమైన అన్ని రకాల లవణాలు ఉంటాయి. అందువలన ఖరీదు ఎక్కువ అయినప్పటికీ, నిర్లక్ష్యం చేయకుండా, కనీసం అప్పుడప్పుడైనా క్యాబేజ్ కూర రూపంలో గాని, మరొక విధంగా కానీ తీసుకోవటం మంచిది.

నిజానికి, కాలీఫ్లవర్ కన్నా విలువైన పోషకాలను కలిగి ఉన్నది క్యాబేజ్. విటమిన్‌ బి6, విటమిన్‌ సి, ఫోలేట్‌ ఆరోగ్యదాయకమైన ఎన్నో పైటో కెమికల్స్‌ పుష్కలంగా ఉంటాయి. ఇది క్యాన్సర్‌ నిరోధక కాయగూరలలో రారాజు. క్యాన్సర్‌ను నిరోధించే బయో ఫ్లావనాయిడ్స్‌ క్యాబేజ్లో పుష్కలంగా ఉంటాయి. పీచుపదార్థం ఎక్కువ. అందువలన మల విసర్జన సాఫీగా జరగటానికి, వ్యర్థ పదార్థాల బహిష్క రణకు దోహద పడుతుంది. వంధ్యత్వాన్ని పోగొడుతుంది. రేచీకటిని, చిన్న వయసులో జుట్టు తెల్లబడటాన్ని, ఊడిపోవడాన్ని నివారిస్తుంది.

క్యాబేజ్ లో విటమిన్స్ పుష్కలంగా ఉన్నాయి. విటమిన్ బి1, బి2, బి3, బి5, బి6, బి9లు ఉన్నాయి. అంతేగాకుండా ప్రోటీన్లు, ఫాస్పరస్, పొటాషియంలు కూడా కలిగివుంది. అందుచేత వారానికి రెండు లేదా మూడు సార్లు క్యాబేజ్ ను వంటకాల్లో చేర్చుకోవడం ఆరోగ్యానికి ఎంతో మంచిదని న్యూట్రీషన్లు అంటున్నారు. ఇలాంటి వంటల్లో క్యాబేజ్ ఎగ్ ఫ్రై ఎలా తయారు చేయాలో చూద్దాం...

కావలసిన పదార్ధాలు
క్యాబేజ్(చిన్నసైజు): 1(సన్నగా కట్ చేసుకోవాలి)
గుడ్లు: 3
ఉల్లిపాయ: 2(సన్నగా ముక్కలుగా తరిగిపెట్టుకోవాలి)
కారం: 4tsp
ఉప్పు: రుచికి తగినంత
పసుపు: చిటికెడు
నూనె: సరిపడా
కొత్తిమీర: 1కట్ట
ఆవాలు: 1/2tsp
మినపప్పు: 1/2tsp
జీలకర్ర: 1/2tsp
కరివేపాకు: రెండు రెమ్మలు

తయారు చేసే విధానం:
1. ముందుగా క్యాబేజ్ ను చిన్నగా కట్‌ చేసుకోవాలి. లేదా తురుము కోవాలి.
2. ఆ తర్వాత పోపు తాలింపు పెట్టి క్యాబేజ్ వేసి ఉప్పు, పసుపు, కారం వేసి నూనెలో బాగా మగ్గనివ్వాలి.
3. ఆ తర్వాత కొద్దిగా నీరు(చిన్న గ్లాసు) పోసి ఉడుకుతుండగా గుడ్లు కొట్టి వెయ్యాలి.
4. ఆతర్వాత బాగా నూనెలో వేయించి దించుకునే ముందు కొత్తిమీర వేసుకుని దించుకోవాలి. అంతే క్యాబేజ్ ఎగ్ ఫ్రై రెడీ.