కాల్షియం, ఫైబర్ల ఖజానా..రాగి సొరకాయ గుంత పొంగనాలు ఎప్పుడైనా ట్రై చేశారా?

ఉదయం పూట హడావిడిలో బ్రేక్‌ ఫాస్ట్ ఏం చేయాలో ఆలోచిస్తూ తలలు పట్టుకుంటున్నారా? తిన్న తర్వాత కడుపు నిండినట్లు అనిపించాలి, కానీ రోజంతా బరువుగా, బద్ధకంగా అనిపించకూడదు... అదనంగా శరీరానికి కావలసిన పోషకాలు కూడా అందాలి. ఇలాంటి సమయంలో మీకు ఖచ్చితంగా గుర్తుకు రావాల్సిన అద్భుతమైన రెసిపీ రాగి సొరకాయ గుంత పొంగనాలు.

ఇదొక అత్యంత సులభమైన, ఆరోగ్యకరమైన, కంఫర్టింగ్ ఉదయం బ్రేక్ ఫాస్ట్. రాగి పిండిలోని పుష్కలమైన క్యాల్షియం, సొరకాయలోని ఫైబర్, తేలికదనం, దానికి తోడు అల్లం, జీలకర్ర ఘాటు అన్నీ కలిసి మీకు ఒక అద్భుతమైన రుచిని ఇస్తాయి.

రాగి సొరకాయ గుంత పొంగనాలు తయారీకి కావాల్సిన పదార్థాలు

రాగి పిండి - 2 కప్పులు
బొంబాయి రవ్వ (సూజీ) - 1 కప్పు
పెరుగు - 1 కప్పు
నీళ్లు - పిండి కలుపుకోవడానికి తగినన్ని
సొరకాయ - 1
ఉల్లిపాయ - 1
పచ్చిమిర్చి - 1 లేదా 2
అల్లం తురుము - 1 టీస్పూన్
కొత్తిమీర - కొద్దిగా
ఉప్పు - రుచికి సరిపడా
మిరియాల పొడి - 1 టీస్పూన్
జీలకర్ర - 1 టీస్పూన్
నువ్వులు - కొద్దిగా
నూనె - కాల్చుకోవడానికి తగినంత

రాగి సొరకాయ గుంత పొంగనాలు తయారీ విధానం

-ముందుగా ఒక పెద్ద గిన్నె తీసుకుని, అందులో రాగి పిండి, రవ్వ, పెరుగు వేసి బాగా కలపాలి. ఆ తర్వాత తగినన్ని నీళ్లు పోస్తూ, పిండిని గుంత పొంగనాలు వేసుకోవడానికి వీలుగా ఇడ్లీ పిండిలా కాస్త చిక్కగా కలుపుకోవాలి. ఈ మిశ్రమాన్ని 15 నుంచి 20 నిమిషాల పాటు పక్కన పెట్టుకోవాలి.

-20 నిమిషాల తర్వాత పిండి బాగా నాని ఉంటుంది. ఇప్పుడు అందులో ముందుగా తురిమి పెట్టుకున్న సొరకాయ, సన్నగా తరిగిన ఉల్లిపాయ ముక్కలు, పచ్చిమిర్చి, అల్లం తురుము, కొత్తిమీర, మిరియాల పొడి, జీలకర్ర, రుచికి సరిపడా ఉప్పు వేసి పిండిని బాగా కలుపుకోవాలి.

-ఇప్పుడు స్టవ్ వెలిగించి గుంత పొంగనాల పెనం పెట్టుకోవాలి. అది వేడయ్యాక ప్రతి గుంటలో కొద్దిగా నూనె లేదా నెయ్యి రాసి, కావాలనుకుంటే కొన్ని నువ్వులు చల్లుకోవాలి. నువ్వులు వేయడం వల్ల మరింత క్రిస్పీగా, రుచిగా ఉంటుంది.

-ఇప్పుడు ఒక్కో గుంటలో గరిటెతో పిండిని వేయాలి. మంటను మీడియం ఫ్లేమ్‌ లో ఉంచి, పైన మూత పెట్టి ఉడికించాలి. ఒకవైపు ఎర్రగా కాలిన తర్వాత, మెల్లగా రెండో వైపుకు తిప్పి, రెండు వైపులా లోపల వరకు ఉడికి, గోల్డెన్ బ్రౌన్ రంగులోకి మారేలా కాల్చుకోవాలి.

-అంతే వేడివేడిగా రాగి సొరకాయ గుంత పొంగనాలు రెడీ. మీకు ఇష్టమైన పల్లి చట్నీ లేదా కొబ్బరి చట్నీతో తింటే దీని రుచి అదిరిపోతుంది.

పోషక విలువల అంచనా (ఒక ప్లేట్‌ కు సుమారు 7-8 రాగి సొరకాయ గుంత పొంగనాలకి)

క్యాలరీలు: సుమారు 300-360 kcal
ప్రొటీన్: 10-12 గ్రాములు
కార్బోహైడ్రేట్లు: 55-65 గ్రాములు
ఫ్యాట్ (కొవ్వు): 5-8 గ్రాములు
క్యాల్షియం: 120-180 మి.గ్రా