రైస్, చపాతీలోకి అద్దిరిపోయే బంగాళదుంప ముద్ద కూర.. ఇలా చేస్తే మళ్లీ మళ్లీ అడుగడం గ్యారెంటీ!

రైస్, చపాతీ, పూరీ దేంట్లోకి తిన్నా అద్దిరిపోయే టేస్ట్ కావాలంటే బంగాళదుంప ముద్ద కూర ట్రై చేసి చూడండి. ఒక్కసారి ఈ కూర టేస్ట్ చేశారంటే..ఇంట్లో వాళ్లు మళ్లీ మళ్లీ చేయమని అడుగుతారు. అంత బాగుంటుంది. బంగాళదుంప ముద్ద కూర తయారుచేసుకోడానికి కావాల్సిన పదార్థాలు, తయారీ విధానం ఇక్కడ చూడండి.

తయారీకి కావాల్సిన పదార్థాలు

-బంగాళదుంపలు
-పచ్చిమిర్చి
-ఎండుమిర్చి
-అల్లం
-వెల్లుల్లి
-తాలింపు గింజలు
-ఉప్పు
-పసుపు
-కరివేపాకు
-కొత్తిమీర
-నూనె
ధనియాల పొడి

తయారీ విధానం

-ముందుగా అరకేజీ బంగాళదుంపలను శుభ్రంగా కడగాలి.

-తర్వాత ఒక కుక్కర్ లో కడిగిన బంగాళదుంపలు వేయండి, ఇందులోనే 1 గ్లాసు నీళ్లు, 1 టీస్పూన్ ఉప్పు వేసి కుక్కర్ మూతపెట్టేయండి. దీనిని స్టవ్ మీద పెట్టి 4 విజిల్స్ వచ్చేదాకా ఉడికించుకోవాలి.

-తర్వాత ఉడికిన బంగాళదుంళల మీద తొక్క తీసేసి బంగాళదుంపలను చిన్న చిన్న ముక్కలుగా కట్ చేసి పక్కన పెట్టుకోండి.

-తర్వాత మిక్సీ జార్ లో 8 పొట్టు తీసేసిన వెల్లుల్లి రెబ్బలు, 1 ఇంచు అల్లం, 7 పచ్చిమిరపకాయలు వేసి ఈ మొత్తాన్ని కోర్సుగా గ్రైండ్ చేసుకోండి. లేదా రోట్లో అయినా దంచుకోవచ్చు.

అసలు సిసలైన పల్లీ చట్నీ.. ఒక్కసారి ఇలా చేసి చూడండి, మళ్లీ మళ్లీ కావాలంటారు!

-తర్వాత స్టవ్ మీద పాన్ పెట్టి అందులో 2 టేబుల్ స్పూన్ల నూనె వేడి చేసి అందులో 1 టేబుల్ స్పూన్ తాలింపు గింజలు(ఆవాలు, జీలకర్ర, శనగపప్పు, మినపప్పు) వేసి వేయించుకోవాలి. ఆవాలు చిటపటలాడేంతవరకు వేగిన తర్వాత అందులోనే 3 ఎండుమిరపకాయలను తుంచి వేయండి, 2 టేబుల్ స్పూన్ల జీడిపప్పు కూడా వేసి అది కలర్ వచ్చేదాకా వేగిన తర్వాత అందులో చిటికెడు ఇంగువ వేసి కలిపిన తర్వాత అందులో 1 ఉల్లిపాయ పొడవాటి చీలికలు, కొద్దిగా కరివేపాకు వేసి వేయించాలి.

-ఉల్లిపాయలు, కరివేపాకు వేగిన తర్వాత అందులో ముందుగా గ్రైండ్ చేసుకున్న పచ్చిమిర్చి వెల్లుల్లి పేస్ట్ వేసి బాగా కలుపుకోవాలి. తర్వాత అందులో ఉడికించి కట్ చేసి పెట్టుకున్న బంగాళదుంప ముక్కలు వేసి మొత్తం ముక్కలకు పట్టేలా కలుపుకోవాలి.

-ఇప్పుడు అందులోనే అర టీస్పూన్ ఉప్పు, కొద్దిగా పసుపు వేసి తక్కువ మంద మీద బాగా కలుపుతూ 3 నిమిషాలు వేయించాలి. ముద్దకూరలా వచ్చినప్పుడు అందులో 1 టీస్పూన్ ధనియాల పొడి వేసుకొని కలుపుకోండి. చివరగా అందులో కొంచెం కొత్తిమీర కలుపుకొని దించేయండి.

-అంతే బంగాళదుంప ముద్ద కూర రెడీ.