వంకాయ-పకోడీ కర్రీ

Veg

oi-Saraswathi

By Sindhu

Published: Wednesday, June 13, 2012, 12:26 [IST]

ఆ కూరల్లో మసాలా వుండదు. అయినా ఘుమఘుమలాడుతూ ఉంటాయి. వాటిలో ప్రత్యేకమైన దినుసులేమీ ఉండవు. అయినా అవి ఎంతో మధురంగా ఉంటాయి. ఎందుకంటే అది మన పల్లె వంటల గొప్పతనం మరి...!కూరలలో చాలామంది ఇష్టంగా తినేది వంకాయ కూర. ఆహా ఏమి రుచి అన్నా, ఏమి అన్నా ఈ వంకాయ కే చెల్లింది. అలాగే వంకాయ అనగానే గుత్తొంకాయ, బగార బైగన్, వంకాయ కొత్తిమీర కారం ఎక్కువ ఇవే గుర్తొస్తాయి. కానీ పొడుగ్గా సన్నగా ఉండే వంకాయలతో అల్లం, మిర్చి వేసి చేసే వేపుడు చాలా రుచి గా ఉంటుంది. దానికి పకోడీ కూడా తోడైతే ఆ రుచి ఇంకా బావుంటుంది.

కావలసిన పదార్ధాలు:
వంకాయలు: 1/2kg
ఉల్లిపాయ: 1
కరివేపాకు: రెండు రెమ్మలు
అల్లం: చిన్న ముక్క
పచ్చిమిర్చి: 4
ఉప్పు: రుచికి తగినంత
కారం: కావలసినంత
పసుపు: 1/4tsp
గరంమసాలా పొడి: 1tsp
నూనె: తగినంత
తాలింపుకు: శనగపప్పు, మినప్పప్పు, జీలకర్ర, ఆవాలు, ఎండుమిర్చి
పకోడీలకు:
శనగపిండి: 1cup
వరి పిండి: 2tsp
ఉల్లిపాయ:
పచ్చిమిర్చి: 3
అల్లం: చిన్న ముక్క
కరివేపాకు: రెండు రెమ్మలు
కొత్తిమీర: ఒక కట్ట
ఉప్పు: రుచికి తగినంత
వంట సోడా: చిటికెడు
నూనె : సరిపడా

తయారు చేయు విధానం:
1. ముందుగా పాన్ లో నూనె వేసి వేడిఅయ్యాక అందులో శనగపప్పు. మినప్పప్పు, జీలకర్ర, ఆవాలు, ఎండుమిర్చి వేసి తాలింపు వేసుకోవాలి. అవి వేగాక కరివేపాకు వెయ్యాలి. సన్నగా తరిగిన ఉల్లిపాయ ముక్కలు వేసి బాగా వేయించాలి.
2. ఇప్పుడు అందులోనే సన్నగా తరిగిన వంకాయముక్కలు వేసి, సన్నని సెగపై మూత పెట్టకుండా వేగనివ్వాలి. ముక్కలు కొంచెం మగ్గిన తరువాత పసుపు, అల్లం, మిర్చి కలిపి పేస్ట్ చేసుకన్న మిశ్రమాన్ని అందులో వేసి బాగా కలిపి అదే తక్కువ మంట మీద వేగనివ్వాలి.
3. ముక్కలు బాగా వేగిన తరువాత తగినంత ఉప్పు, కారం, గరం మసాలా పొడి చల్లి బాగా కలపాలి.
4. ఈ లోగా పకోడీలకు కావలసిన అన్నింటిని కొంచెం నీటితో పకోడీ పిండిలా కలుపుకోవాలి. మరో స్టౌ పై నూనె వేడిచేసి పకోడీలు వేసుకోవాలి. వంకాయముక్కలు వేగేలోగా అటు పకోడీలు కూడా రెడీ అయిపోతాయి.
5. తర్వాత వేగిన పకోడీలను సన్నగా తరిగి కూరలో కలిపి, రెండు నిమిషాలువేయించి, తరిగిన కొత్తిమీర చల్లితే ఘుమఘుమలాడే వంకాయ పకోడీ కూర రెడీ అవుతుంది.