ఇలా కూడా అందం సంతరించుకుంటుంది..!

Published: Thursday, May 31, 2012, 11:58 [IST]

పెరడులో కానీ, బయట పార్కులు, తోటల్లో కానీ రకరకాల ఆకుల్ని చూస్తుంటాం. వాటిలో కొన్నిరకాల ఆకులతో సౌందర్య పోషణను వృద్ధిచేసుకోవచ్చు. అలాంటి పచ్చని ఆకుల్ని గురించి, వాటి ఉపయోగం గురించి తెలుసుకుందాం. మందార ఆకులను రుబ్బి జుట్టుకు పట్టించాలి. ఇది జుట్టుకు మేలైన కండీషనర్‌గా పనిచేస్తుంది. మందారకులను ఎండబెట్టి కొబ్బరినూనెలో వేయాలి.

ఈ నూనె రాసుకోవడం వల్ల జుట్టు నల్లగాను, ఒత్తుగానూ పెరుగుతుంది. గోరింటాకు కేశాలకు ప్రాకృతికమైన కండిషనర్‌గా పనిచేస్తుంది. వేడిని పోగొట్టి, చర్మాన్ని చల్లబరచే గుణం గోరింటాకుకు ఉంది. తులసి ఆకులు చర్మంలోని మృత కణాలను తొలగించి చర్మాన్ని కోమలం చేస్తాయి. వీటిని క్రమం తప్పకుండా తినడంవల్ల ముఖం మీది మచ్చలను తొలగించుకోవచ్చు. రోజుకు ఏడు తులసి ఆకులు తినడం చాలా మంచిది. పుదీనా ఆకుల్లో మనసును తాజాగా ఉంచే సువాసన ఉంటుంది.

దీనివల్ల మనసుకు కలిగే అలసట తగ్గుతుంది. పుదీనా ఆకులతో తయారుచేసుకునే ప్యాక్‌వల్ల మొటిమలతో ఏర్పడే మచ్చలుపోయి, చర్మం కాంతివంతమవుతుంది. జిడ్డు చర్మానికి పుదీనా ఒక చక్కని యాస్ట్రింజెంట్‌గా ఉపయోగపడుతుంది.