కేశ సౌందర్యంను కండిషనర్ తో మెరుగుపరచుకోండి..

Published: Monday, February 13, 2012, 17:57 [IST]

మన సంప్రదాయంలో పొడవాటి జుట్టుకు ఎంతో ప్రాధాన్యం ఉంటుంది. అలాంటి కురులకు కలర్స్, కెమికల్స్, ఏమీ వాడకపోయినా దాన్ని సరైన విధంగా మెయిన్ టైన్ చేయాలి. లేకపోతే మెరుపును కోల్పోయి పొడిబారి చివర్లు చిట్లి పోతాయి. జుట్టు కొసలు చిట్లితే ఎప్పటికప్పుడు ట్రిమ్మింగ్ చేయించుకోవడం మంచిది. సరైన సమయంలో అలా ట్రిమ్ చేయించకుండా వదిలేస్తే అవి మొదలు వరకూ చిట్లే ప్రమాదం ఉంది. చిట్లిన వెంట్రుకలను ట్రిమ్మింగ్ లేదా కండిషనింగ్ చేయడాన్ని మించి దానికి ఇతరత్రా చికిత్స ఏమీ ఉండదు.

పాడయ్యే జుట్టుకు చికిత్సగానే కాకుండా మంచి జుట్టును పొందడానికి కూడా డీప్ కండిషనింగ్ అవసరం. దీనివల్ల శిరోజాల్లోని తేమ పరిరక్షించుకోవచ్చు. మాడుకు చక్కని చికిత్స దొరుకుతుంది. కుదుళ్ళు బలంగా తయారవడానికి సహకరిస్తుంది. జుట్టు చివర్లు చీలిపోతే వాటి ఎదుగుదల సరిగా ఉండదు. అంతేకాకుండా జుట్టు బలహీనంగా మారి తెగిపోతుంది. ఇంకా శిరోజాలు నిర్జీవంగా మారి రాలిపోతాయి. ఇలాంటి సమస్యలకు ఇంట్లో దొరికే వస్తువులతో చెక్ పెట్టండిలా....

1. రెండు నెలలకోసారి చిట్లిన శిరోజాల చివర్లను కత్తిరించేయాలి.
2. నెలలో రెండు సార్లు కొబ్బరి పాలతో శిరోజాలను తడిపి గంటయ్యాక షాంపూతో తల స్నానం చేస్తే జుట్టు చిట్లడం అదుపులో ఉంటుంది.
3. ఆముదం, ఆవనూనె సమపాళ్లలో తీసుకొని జుట్టు చివర్లకు రాసి పొడి తువాలును చుట్టి అరగంటయ్యాక స్నానం చేస్తే చిట్లడం తగ్గి కురులు ఒత్తుగా ఏర్పడతాయి.
4. కొబ్బరి, ఆలివ్ నూనె సమపాళ్లలో తీసుకొని గోరువెచ్చగా వచ్చేంత వరకూ వేడి చేసి తలకు, జుట్టుకి బాగా పట్టించాలి. మర్నాడు షాంపుతో తలస్నానం చేస్తే చిట్లిన జుట్టు తొలగి పట్టుకుచ్చులాంటి కురులు మీ సొంతం అవుతుంది.
5. బాగా పండిన బొప్పాయిని మాత్రం తీసుకొని మెత్తగా గ్రైండ్ చేసుకొని అందులో తగినంత పెరుగు కలిపి తలకు పట్టించి అరగంటయ్యాక గోరువెచ్చటి నీళ్లతో తలస్నానం చేస్తే జుట్టు చిట్లే సమస్య తగ్గుముఖం పట్టడమే కాకుండా జుట్టు రాలిపోయే సమస్య కూడా తగ్గిపోతుంది.
6. పొడిబారిపోయి కాంతిహీనంగా తయారైన జుట్టుతో బాధపడుతున్నట్లయితే, తాజా మెంతికూరను తీసికొని మెత్తగా రుబ్బుకోవాలి. దానికి చిక్కటిపెరుగు కలిపి తలకు పట్టించండి. అరగంట తర్వాత మంచి షాంపుతో తలస్నానం చేయండి. జుట్టు ఎంతో కోమలంగా తయారౌతుంది.