ప్రేమికుల రోజు కానుకగా అందాన్ని అర్పించండి....

Published: Monday, February 13, 2012, 13:05 [IST]

ప్రేమికుల దినోత్సవం వచ్చిందంటే చాలు.. ప్రేమికులు ఒకరినొకరు ఇంప్రెస్‌ చేసేందుకు మధనపడుతుంటారు. ప్రత్యేకించి ప్రేమికురాలి మనసును దోచుకునేందుకు ఎలాంటి కానుక ఇవ్వాలో తేల్చుకోలేక ప్రేమికుడు తెగ ఇదైపోతుంటాడు. బహుమతుల విషయంలో పట్టింపులు, ప్రత్యేక అభిరుచులు ఉండే అమ్మాయిల విషయంలో మరిన్ని జాగ్రత్తలు తీసుకోక తప్పదు. ఒక విశిష్టరీతిలో తమ అభిమానాన్ని, ప్రేమను వ్యక్తం చేయడం నిజంగా ఓ సవాలు వంటిదే. పూలు, చాక్‌ లెట్లు, అందమైన బొమ్మలు ఇవ్వడం అంతా పాత ట్రెండ్‌. మరి నేటి ట్రెండ్‌ ఏమిటి? వారికి అందాన్ని బహుమతిగా ఇవ్వడమే. వినడానికి ఆశ్చర్యంగా ఉన్నా ఇది నిజం. నేటి తరం కోరుకునే సరికొత్త కానుక సౌందర్యం.

యుక్తవయసులో ఉన్నవారైనా, మధ్య వయస్కులైనా మహిళలంతా కోరుకునేది అందం. అందులోనే వారికి ఆనందం.. ఆత్మవిశ్వాసం. ఏడాది పొడుగునా ప్రతి రోజూ అందంగా కన్పించాలని కోరుకోవడం సహజం. వాలంటైన్స్‌ డేలాంటి ప్రత్యేక సందర్భాల్లో ఈ ప్రత్యేక అవసరం మరింత అధికమవుతుంది. ప్రేమికులు ఈ అవసరాన్ని గుర్తించారు. ప్రేమికురాలికి ఆనందాన్ని కలిగించే అందాన్ని బహుమతిగా అందిస్తున్నారు. లోపాలను సవరిస్తూ సౌందర్యాన్ని పెంచే ఫిల్లర్స్‌, బొటాక్స్‌ లాంటి సౌందర్య చికిత్సను బహుమతిగా ఇవ్వడం ఈ వాలంటైన్స్‌ డే పోకడగా ఉంది. 'వ్యక్తిగత సౌందర్య పోషణ, ఆసక్తి పెరుగుతోంది. నాన్‌ సర్జికల్‌ కాస్మొటిక్‌ ప్రొసీజర్లపై మక్కువ అధికమవుతోంది. కొనుగోలు శక్తి, అదాయం అధికం కావడంతో ట్రీట్‌ మెంట్‌లను బహుమతిగా అందించడం మొదలైంది.

బంధువుల ఇంటికి వెళ్లేటప్పుడు ఏమైనా తీసుకెళ్లడం మర్చిపోతారేమో కానీ ప్రేమికుల రోజు మాత్రం గిఫ్ట్‌లు తీసుకెళ్లడం మర్చిపోరు ప్రేమికులు. ఎర్రగులాబీ ఇచ్చి ఐ లవ్‌ యూ అని చెప్పి, వెంటనే ఈ మధురమైన క్షణాలను తీపిజ్ఞాపకాలుగా దాచుకుందాం అని చాకోలెట్‌ లను ఇచ్చిపుచ్చుకుంటారు. తరువాత బై చెప్పి వెళ్లిపోతారు... అనుకోకండి. లవర్స్‌ కలిసాకా కొన్ని రోమాంటిక్‌ కబుర్లు చెప్పుకోకుండా ఉండలేరు. కళ్లలోకి కళ్లు పెట్టి ప్రపంచాన్ని మర్చిపోవడం ప్రేమికులకు అలవాటే. ప్రేమికుల రోజున ఇచ్చే చిన్న కానుకలైనా ఈ ప్రేమబంధాన్ని మరింత పటిష్టం చేస్తాయి. వాలెంటైన్ డే రోజున ప్రేమికులు ఒకరికొరు బహుమతులు ఇచ్చిపుచ్చుకుని తమలోని ప్రేమ బంధాన్ని తెలియజెప్పుకుంటారు. తమ భావాలను వ్యక్తీకరించే విధానాన్ని జీవితంలో ఎన్నడూ మరిచిపోలేరు.