అసలే వర్షాకాలం.. లొట్టలేసుకుని పానీపూరి తింటే రోగాలు తప్పవు!

చిన్న పిల్లల నుంచి పెద్ద వారి వరకు పానీపూరి అంటే లొట్టలేసుకుంటారు. సాయంత్రం అలా బయటకు వెళ్లి ఇంటిల్లిపాది వెళ్లి మరీ గప్‌చుప్‌ను ఆస్వాదిస్తుంటారు. పానీపూరికి సీజన్ తో సంబంధం లేదు. ఎండాకాలం, చలికాలం, వర్షాకాలం అనే సంబంధం లేకుండా పానీపూరి కోసం ఎగబడతారు. చల్లని చినుకులు పడుతుంటే వేడి వేడిగా ఏదైనా తినాలని ప్రతి ఒక్కరికీ ఉంటుంది. అయితే వానాకాలంలో ఆహార పదార్థాలు కలుషితం అయ్యే అవకాశాలు రెట్టింపు అవుతాయి.

స్ట్రీట్ ఫుడ్స్ పట్ల చాలా జాగ్రత్తగా ఉండాల్సి ఉంటుంది. ఏమాత్రం కలుషితానికి గురైన ఆహారం తిన్నా రోగాలు చుట్టు ముడతాయి. ముఖ్యంగా పానీపూరిల విషయంలో చాలా అప్రమత్తంగా ఉండాలి. కలుషిత నీరు తాగడం వల్ల టైఫాయిడ్, ఉదర సంబంధిత వ్యాధులకు గురవుతారు.

పానీపూరి బండ్ల చుట్టూ అపరిశుభ్రత:

వర్షాకాలంలో చాలా చోట్ల నీరు నిండిపోతుంది. ఇది బ్యాక్టీరియా, దోమలు, ఇతర క్రిమికీటకాలు అభివృద్ధి చెందడానికి ఆవాసంలా మారతాయి. ఇవి చాలా రకాల ఆరోగ్య సమస్యలను తెచ్చిపెడతాయి. విష జ్వరాలు, జలుబు, దగ్గు, మలేరియా, టైఫాయిడ్ వంటి రోగాలను తీసుకువస్తాయి. పానీపూరి బండ్ల నీరు కలుషితం అయ్యే అవకాశాలు ఎక్కువ. చాలా వరకు పానీపూరి బండ్లు రోడ్లు, మురికి కాల్వల పక్కన అపరిశుభ్ర వాతావరణంలోనే ఉంటాయి. అలాంటి చోట్ల పరిసరాలు కలుషితమై.. ఆహారంపై బ్యాక్టీరియా, క్రిములు చేరే అవకాశాలు ఉన్నాయి.

అలాంటి ఆహారానికి దూరంగా ఉండాలి:

మురికి, అపరిశుభ్రత, కలుషితమైన ప్రాంతాల్లో పానీపూరి తినడం వల్ల టైఫాయిడ్, లూజ్ మోషన్, డయేరియా వంటి పొట్టకు సంబంధించిన అనేక సమస్యలు వస్తాయి. అలాగే ఫుడ్ పాయిజనింగ్ అయ్యే ప్రమాదం ఉంటుంది. ఇది కేవలం పానీపూరిలకు మాత్రమే వర్తించదు. అన్ని రకాల వీధి ఆహారాలు, పరిశుభ్రత పాటించని హోటళ్లలోని ఆహారాల వల్ల కూడా ఈ ఆరోగ్య సమస్యలు వచ్చే అవకాశాలు ఉన్నాయి. అందుకే వర్షాకాలంలో వీలైనంత మేరకు బయటి ఫుడ్ కు దూరంగా ఉండటం మంచిదని నిపుణులు సూచిస్తుంటారు.

ఇంటి ఆహారమే శ్రేష్టమైనది:

అపరిశుభ్ర వాతావరణం, ముఖ్యంగా వర్షాకాలంలో శుభ్రంగా ఉన్న పానీపూరి స్టాల్స్ వద్దకే వెళ్లాలి. అక్కడ ఏమాత్రం కలుషితం కాలేదని నిర్ధారించుకున్నాకే తినాలి. పరిశుభ్రత పాటించని చోట్ల ఆహారం తినడం వల్ల చాలా రకాల ఆరోగ్య సమస్యలు వస్తాయి. అందుకే ఇంట్లో తయారు చేసిన ఆహారాన్ని తినడానికే ప్రాధాన్యత ఇవ్వాలి. బయటి ఆహారంతో పోలిస్తే ఇంట్లో చేసిన ఆహారం అంతగా రుచిగా అనిపించకపోవచ్చు. బయట తిన్నంత మజా కూడా రాకపోవచ్చు. కానీ రుచి కంటే ఆరోగ్యం చాలా ముఖ్యం. రుచి కంటే ఆరోగ్యానికే ప్రాధాన్యత ఇవ్వాలి. వర్షాకాలంలో రోగనిరోధక శక్తి కీలక పాత్ర పోషిస్తుంది. ఈ సమయంలో ఇమ్యూనిటీ మెరుగుపరచుకోవడానికి మంచి పోషకాహారం తీసుకోవాలి. జంక్ ఫుడ్ కు, ప్యాకేజ్డ్ ఫుడ్స్ కు దూరంగా ఉండటం మంచిది.

Disclaimer: ఇంటర్నెట్‌లో అందుబాటులో ఉన్న సమాచారం ఆధారంగా ఈ వ్యాసాన్ని రాయడం జరిగింది. కచ్చితత్వానికి, విశ్వసనీయతకు ఎలాంటి హామీ ఇవ్వడం లేదు. Boldsky Telugu ఈ వ్యాసానికి సంబంధించిన ఏ విషయాన్నీ నిర్ధారించడంలేదు. ఈ వ్యాసం ఉద్దేశం సమాచారం అందించడం మాత్రమే. ఏదైనా పాటించే ముందు సంబంధిత నిపుణుల సలహా తీసుకోగలరు.