Army Day 2021 : ‘సరిలేరు మీకెవ్వరు’ ఇవి తెలిస్తే.. సైనికులకు సలాం కొట్టకుండా ఉండలేరు...!

1895లో..

భారత సైన్యం 1895న ఏప్రిల్ 1వ తేదీన ఈస్ట్ ఇండియా కంపెనీ కింద ఏర్పడింది. దీనిని బ్రిటీష్ ఇండియన్ ఆర్మీ అని పిలుస్తారు. బ్రిటీష్ వారి నుండి భారతదేశానికి స్వాతంత్ర్యం పొందిన తర్వాత దీనికి భారత సైన్యం అని పేరొచ్చింది.

నిరసనలు, అల్లర్లు..

బ్రిటీష్ పాలనలో దేశవ్యాప్తంగా అనేక నిరసనలు మరియు అల్లర్లు జరిగాయి. ఈ కారణంగా, ప్రజలను నియంత్రించండంలో మరియు నిర్వహణలో సహాయం కోసం భారతీయులను సైన్యంలోకి తీసుకున్నారు.

ఆర్మీ తర్వాతే ఎవరైనా..

1948 నుండి భారత్-పాకిస్థాన్ పై ఇప్పటికీ పోరాడుతూనే ఉంది. ఈ కారణంగా సుమారు 6 వేల మీటర్ల ఎత్తు వరకు ఇరు దేశాలు సైన్యాన్ని మొహరించాయి. అత్యంత ఎత్తైన పర్వతాల్లో యుద్ధం చేయడంలో భారత ఆర్మీ తర్వాతే ఎవరైనా అని చెప్పాలి. ఇండియన్ ఆర్మీకి చెందిన హై అల్టిట్యూడ్ వార్ ఫేర్ స్కూల్(HAWS) ప్రపంచంలోనే అత్యున్నత సైనిక శిక్షణా కేంద్రాల్లో ఒకటి కావడం విశేషం. అగ్ని-క్షిపణి తొలి రెండు ప్రయోగాల్లో విఫలం కావడంతో చాలా దేశాలు మన ప్రయత్నాలను హేళన చేశాయి. అయితే, మూడో ప్రయత్నంలో మొక్కవోని దీక్షతో చేసిన ‘అగ్ని' ప్రయోగం విజయవంతం కావడంతో.. ప్రపంచ దేశాల చూపు భారత్ వైపు మళ్లింది. అంతేకాదు ఈ విశ్వంలోనే ఇది అత్యున్నతమైన క్షిపణిగా గుర్తింపు పొందింది.

సర్జికల్ స్ట్రయిక్స్..

దాయాది దేశానికి గట్టిగా బుద్ధి చెప్పేందుకు భారత ఆర్మీ తొలిసారిగా 2016లో సర్జికల్ స్ట్రయిక్స్ చేసి పాకిస్థాన్ లోని ఉగ్రవాదులను మట్టుబెట్టింది. ఆ వీడియోలను సైతం రిలీజ్ చేసి సంచలనం స్రుష్టించింది. అమెరికా, చైనా తర్వాత అత్యధిక సైనిక బలం కలిగిన దేశం మన భారతదేశం కావడం విశేషం. మన దేశంలో మొత్తం 13,25,000కి పైగా యాక్టివ్ ట్రూప్స్, 9,60,000 రిజర్వ్ ట్రూప్స్ ఉండటం మనకు గర్వకారణం.

సేవలోనూ..

2013లో ఉత్తరాఖాండ్ లో వరదలు వచ్చిన సమయంలో ప్రజలను కాపాడేందుకు ఆర్మీ చర్యలు ప్రపంచంలోనే అతి పెద్ద రెస్క్యూ ఆపరేషన్. 2013, జూన్ 17వ తేదీన జరిగిన ఈ ఆపరేషన్లో సుమారు 20 వేల మంది సహాయసహకారాలు అందించారు. ఈ సందర్భంగా 2 వేలకు పైగా యుద్ధ విమానాలను నడిపింది ఆర్మీ. 3,82,400 కిలోల రిలీఫ్ మెటిరీయల్ ను కూడా సరఫరా చేసింది.