ఇడ్లీ, దోసె పిండి బాగా పులిసిపోయిందా? పారేయకుండా ఈ చిట్కాలతో ఫ్రెష్‌ గా మార్చేయండి!

చాలా సమయాల్లో గృహిణులను తరచుగా వేధించే ప్రధాన సమస్య.. దోసె, ఇడ్లీ పిండి త్వరగా పులిసిపోవడం. ఎంతో కష్టపడి రుబ్బుకున్న పిండి కాస్తా పుల్లగా మారిపోతే, ఇంట్లో వాళ్ళు తినలేరు, అలాగని పారేయడానికి మనసు రాదు. ఫ్రిజ్‌ లో సరిగ్గా నిల్వ చేయకపోయినా ఈ సమస్య తప్పదు.

అయితే పిండి పుల్లగా మారిందని ఇకపై అస్సలు బాధపడకండి. ఆ పిండిని చెత్తబుట్టలో వేయకుండా కొన్ని సులభమైన, అద్భుతమైన వంటింటి చిట్కాలను పాటిస్తే.. అదే పుల్లటి పిండితో దూది లాంటి మెత్తటి ఇడ్లీలు, హోటల్ స్టైల్ కరకరలాడే దోసెలు ఇట్టే వేసుకోవచ్చు.

అసలు పిండి ఎందుకు పులిసిపోతుంది?

బియ్యం, మినపపప్పు కలిపి రుబ్బిన తర్వాత కిణ్వ ప్రక్రియ (ఫర్మెంటేషన్) జరిగి అందులో లాక్టిక్ ఆమ్లం ఉత్పత్తి అవుతుంది. దీనివల్లే పిండికి పులుపు వస్తుంది. పిండిని 8 గంటల కంటే ఎక్కువ సేపు బయట ఉంచినా, లేదా రుబ్బిన వెంటనే ఉప్పు కలిపేసినా పిండి త్వరగా పులిసిపోతుంది. దీంతో ఇడ్లీలు పుల్లగా మారిపోయి, దోసెలు సరిగ్గా రావు.

పులుపును తగ్గించి, రుచిని పెంచే మ్యాజిక్ చిట్కాలు ఇవే

బేకింగ్ సోడా, చక్కెర లేదా బెల్లం మ్యాజిక్

పిండి పులుపును త్వరగా తగ్గించడానికి ఇది బెస్ట్ ట్రిక్. పులిసిన పిండిలో చిటికెడు బేకింగ్ సోడా, అర చెంచా పంచదార లేదా బెల్లం పొడి వేసి బాగా కలపాలి. ఒక 10 నిమిషాల పాటు అలా వదిలేయండి. సోడా పిండిలోని ఆమ్లత్వాన్ని తగ్గిస్తే, తీపిదనం పులుపును బ్యాలెన్స్ చేస్తుంది. ఈ పిండితో దోసెలు వేస్తే ఎర్రగా, కరకరలాడుతూ భలే రుచిగా వస్తాయి.

పాలు లేదా పెరుగుతో చెక్ పెట్టండి

పిండి మరీ ఎక్కువగా పులిసిపోయినట్లు అనిపిస్తే అందులో పావు కప్పు కాచి చల్లార్చిన పాలు లేదా పులుపు లేని కమ్మటి పెరుగు కలపండి. పాలు, పెరుగులోని సహజ గుణాలు పిండిలోని తీవ్రమైన పులుపును వెంటనే పీల్చుకుని, రుచిని అద్భుతంగా బ్యాలెన్స్ చేస్తాయి.

ప్రపంచంలోనే అత్యంత ఆరోగ్యకరమైన ప్రోటీన్ చిక్కి..ఇంట్లోనే ఈజీగా చేసుకోండిలా..

రవ్వ లేదా బియ్యప్పిండితో క్రిస్పీగా

పుల్లటి పిండిలో కొద్దిగా బియ్యప్పిండి లేదా ఇడ్లీ రవ్వను (కొద్దిగా నీళ్లు కలిపి) వేసి కలపాలి. ఇలా చేయడం వల్ల పిండి పరిమాణం పెరగడమే కాకుండా పులుపు గట్టిదనం కూడా తగ్గుతుంది. ముఖ్యంగా బియ్యప్పిండి కలపడం వల్ల దోసెలు చాలా క్రిస్పీగా వస్తాయి.

వేడివేడి నెయ్యి లేదా కొబ్బరి నూనె

పులిసిన వాసన రాకుండా ఉండాలంటే, ఒక చిన్న స్పూన్ కొబ్బరి నూనె లేదా నెయ్యిని వేడి చేసి పిండిలో వేసి బాగా కలపాలి. ఈ ట్రిక్ వల్ల పుల్లటి వాసన, రుచి మాయం అవ్వడమే కాకుండా ఇడ్లీలు చాలా మృదువుగా వస్తాయి.

వండిన అన్నం పేస్ట్

పులిసిన పిండిలో ఓ మూడు టేబుల్ స్పూన్ల చల్లారిన వండిన అన్నం వేసి మిక్సీ పట్టి కలపండి. అన్నంలోని స్టార్చ్ (పిండిపదార్థం) పులుపును అద్భుతంగా తగ్గిస్తుంది. ఈ పిండితో వేసే ఇడ్లీలు నోట్లో వేసుకుంటే కరిగిపోయేలా మెత్తగా ఉంటాయి.

ఆరోగ్యానికి మహా బలం అందించే నువ్వుల బాదం లడ్డు..ఈజీగా ఎలా చేసుకోవాలంటే

గుర్తుంచుకోవాల్సిన జాగ్రత్తలు

పిండి చక్కగా పొంగిన వెంటనే ఆలస్యం చేయకుండా ఫ్రిజ్‌ లో పెట్టేయాలి. పిండి రుబ్బిన వెంటనే ఉప్పు కలపకూడదు, కేవలం మీరు వాడుకోవడానికి అరగంట ముందు మాత్రమే ఉప్పు కలుపుకోవాలి. అలాగే వాడిన తర్వాత మిగిలిన పిండిని గాలి చొరబడని, మూత గట్టిగా ఉండే స్టీల్ లేదా గాజు పాత్రలలోనే నిల్వ చేసుకోవాలి.