ఆరోగ్యానికి మహా బలం అందించే నువ్వుల బాదం లడ్డు..ఈజీగా ఎలా చేసుకోవాలంటే

స్వీట్ తినాలనిపించినప్పుడల్లా స్వీట్ షాపుకి వెళ్లి ఏదో ఒకటి కొనుక్కొని తింటున్నారా? బయట దొరికే స్వీట్లు, పంచదారతో చేసినవి తింటే ఆరోగ్యానికి ఏమాత్రం మంచిది కాదు. అందుకే అటు ఆరోగ్యంతో పాటే సూపర్ టేస్ట్ ని అందించే స్వీట్లలో నువ్వులు బాదం లడ్డు ఫస్ట్ ఫ్లేస్ లో ఉంటుంది.

మిమ్మల్ని రోజంతా యాక్టివ్‌గా ఉంచే అద్భుతమైన, ఆరోగ్యకరమైన స్వీట్ రెసిపీ ఇది. దీనిని తయారు చేయడం చాలా సులువు. రుచికి రుచి, ఆరోగ్యానికి ఆరోగ్యం అందించే నువ్వులు బాదం లడ్డు ఎలా తయారుచేసుకోవాలో ఇక్కడ చూడండి.

నువ్వుల బాదం లడ్డు తయారీకి కావలసిన పదార్థాలు

తెల్ల నువ్వులు - 1 కప్పు
బాదం పప్పులు - అర కప్పు
బెల్లం - ¾ కప్పు
నెయ్యి - 1 చిన్న కప్పు

ప్రపంచంలోనే అత్యంత ఆరోగ్యకరమైన ప్రోటీన్ చిక్కి..ఇంట్లోనే ఈజీగా చేసుకోండిలా..

నువ్వులు బాదం లడ్డు తయారీ విధానం

-ముందుగా స్టవ్ వెలిగించి మందపాటి కడాయి పెట్టుకోండి. మంటను పూర్తిగా సిమ్‌ లో ఉంచి, తెల్ల నువ్వులను దోరగా, కరకరలాడేలా వేయించుకోండి. మాడిపోకుండా గరిటెతో తిప్పుతూనే ఉండాలి. వేగిన తర్వాత వాటిని ఒక ప్లేట్‌ లోకి తీసి పక్కన పెట్టుకోండి.

-ఇప్పుడు అదే కడాయిలో నెయ్యి వేసి కరిగించండి. నెయ్యి కరిగాక అందులో తురిమిన బెల్లం, అలాగే సన్నగా తరిగిన బాదం ముక్కలు వేయండి. మంటను సిమ్‌ లోనే ఉంచి, బెల్లం కరిగి మిశ్రమం అంతా లేత బంగారు రంగు వచ్చే వరకు గరిటెతో తిప్పుతూ నెమ్మదిగా ఉడికించండి. బెల్లం కరిగి పాకంలా తయారయ్యాక వెంటనే స్టవ్ ఆఫ్ చేయండి. ఇప్పుడు ముందుగా వేయించి పెట్టుకున్న నువ్వులను ఇందులో వేసి బాగా కలపండి.

-బెల్లం పాకం, నువ్వులు, బాదం అన్నీ ఒకదానికొకటి అతుక్కునేలా కలుపుకోవాలి. ఈ మిశ్రమాన్ని మరీ చల్లారనివ్వకూడదు. కాస్త వేడిగా ఉన్నప్పుడే కొద్దికొద్దిగా తీసుకుంటూ చిన్న చిన్న బైట్స్ లేదా లడ్డూల్లాగా చుట్టుకోవాలి.

-వాటిని ఒక ప్లేట్‌లో ఒకదానికొకటి అంటుకోకుండా విడివిడిగా ఉంచండి.

-అవి పూర్తిగా చల్లారిన తర్వాత గట్టిపడి, కరకరలాడుతూ భలే రుచిగా ఉంటాయి. అంతే ఎంతో రుచికరమైన నువ్వులు బాదం లడ్డు రెడీ. రోజుకొకటి తింటే పిల్లల నుంచి పెద్దల వరకు అందరిలో రోగనిరోధక శక్తి పెరుగుతుంది. గాలి చొరబడని డబ్బాలో పెట్టుకుంటే నెల రోజుల పాటు నిల్వ ఉంటాయి.