Latest Updates
-
రైలులో థర్డ్ ఏసీ ప్రయాణంపై కొడుకు ఫిర్యాదు.. జనరల్ కంపార్ట్మెంట్ కి తీసుకెళ్లిన తండ్రి.. వీడియో వైరల్ -
మేఘన చికెన్ బిర్యానీ.. అస్సలు మిస్ అవ్వకండి! -
కేవలం వారం రోజుల్లో బరువు తగ్గడం ఎలా? ఈ సింపుల్ టిప్స్ పాటిస్తే చాలు.. -
బరువు తగ్గడానికి, షుగర్ కంట్రోల్ కు బెస్ట్..ఇంట్లోనే హై ప్రోటీన్ చపాతీ చేసుకోండిలా.. -
చలికాలంలో జలుబు, దగ్గు దరిచేరనివ్వని..ఇమ్యూనిటీని రెట్టింపు చేసే ఉసిరి చ్యవన్ ప్రాష్ ఎలా చేసుకోవాలంటే.. -
శీతాకాలపు పార్టీల్లో అతిగా తిని, తాగుతున్నారా? తీవ్రమైన ప్యాంక్రియాటైటిస్ ముప్పు! -
చలికాలంలో శరీరానికి వెచ్చదనాన్నిచ్చే ఆరోగ్యకరమైన నువ్వుల పట్టీ..ఇంట్లోనే ఇలా చేసుకోండి! -
ఒక్క లిప్ కిస్ ప్లీజ్.. విదేశీ యూట్యూబర్ తో మనోడు వెకిలి చేష్టలు, వీడియో చూడండి.. -
రాజస్థానీ పెరుగు వెల్లుల్లి చట్నీ.. ఇడ్లీ, దోశ, చపాతీలకు బెస్ట్ సైడ్ డిష్..ఎలా చేసుకోవాలంటే.. -
ఆరోగ్యం, రుచి కలగలిసిన చలికాలం స్పెషల్..బీట్ రూట్ లడ్డూ ఇలా ఈజీగా చేసేయండి!
మామిడి పండ్లను ఫ్రిజ్ లో పెట్టొచ్చా లేదా? నిపుణులు ఏం చెబుతున్నారంటే..
వేసవిలో చాలామంది వీకెండ్స్ రాగానే మార్కెట్లకు లేదా మామిడి తోటలకు వెళ్లడం, అక్కడి నుంచి బుట్టల కొద్దీ పండ్లను బల్క్ గా కొనుక్కుని ఇంటికి తెచ్చుకోవడం సర్వసాధారణం. అయితే, ఇంత పెద్ద మొత్తంలో తెచ్చిన పండ్లను ఎక్కువ రోజులు పాడవకుండా ఎలా దాచుకోవాలి? అనేది చాలా ఇళ్లల్లో గృహిణులకు వచ్చే పెద్ద సందేహం. కొందరు మార్కెట్ నుంచి పండ్లను తెచ్చిన వెంటనే వాటిని తీసుకెళ్లి నేరుగా ఫ్రిజ్ లో కుక్కేస్తుంటారు. మరికొందరు మాత్రం బుట్టల్లో లేదా గదిలో ఒక మూలన నిల్వ చేస్తుంటారు. అసలు మామిడి పండ్లను ఫ్రిజ్ లో పెట్టవచ్చా లేదా? పండ్లు త్వరగా పాడవకుండా ఉండాలంటే ఏం చేయాలి? నిపుణులు ఏం చెబుతున్నారో ఇక్కడ చూడండి.

పచ్చి మామిడి పండ్లను ఫ్రిజ్ లో పెట్టకండి
మీరు తోటల నుంచి లేదా మార్కెట్ నుంచి ఇంటికి తెచ్చిన మామిడి పండ్లు ఇంకా పచ్చిగానే ఉన్నాయా? అయితే పొరపాటున కూడా వాటిని ఫ్రిజ్ లో పెట్టకండి. పచ్చిగా ఉన్నవి లేదా సగం పండిన మామిడి కాయలను ఎప్పుడూ గది ఉష్ణోగ్రత వద్ద (రూమ్ టెంపరేచర్) మాత్రమే నిల్వ చేయాలి. ఇలా చేయడం వల్లే అవి సహజంగా, నెమ్మదిగా పండుతాయి. ఫ్రిజ్ లో ఉండే చల్లటి వాతావరణం మామిడి పండ్లు పండే ప్రక్రియను పూర్తిగా ఆపుతుంది. అంతేకాకుండా ఫ్రిజ్ లో పెట్టడం వల్ల వాటి సహజమైన రుచి, సువాసన దెబ్బతింటాయి. కాబట్టి పండ్లు పూర్తిగా పండే వరకు వాటిని బయటే ఉంచడం బెటర్.
పూర్తిగా పండిన తర్వాత ఫ్రిజ్ లో పెట్టొచ్చా?
మామిడి పండు పూర్తిగా పండిపోయి, అద్భుతమైన సువాసన వస్తున్నప్పుడు.. దానిని అలాగే బయట ఉంచితే త్వరగా పాడయ్యే ప్రమాదం ఉంటుంది. ఇలాంటి సమయంలో మాత్రమే మీరు ఆ పండ్లను ఫ్రిజ్ లో నిల్వ చేసుకోవచ్చు. పూర్తిగా పండిన మామిడి పండ్లను ఫ్రిజ్ లో ఉంచడం వల్ల అవి కనీసం 4 నుంచి 5 రోజుల పాటు ఏమాత్రం చెడిపోకుండా ఎంతో తాజాగా ఉంటాయి. చల్లగా ఉన్న పండును కట్ చేసుకుని తింటే ఆ మజాయే వేరుగా ఉంటుంది. అయితే,ఇక్కడ ఒక విషయం గుర్తుంచుకోవాలి.. పండ్లను అతిగా చల్లబరచడం వల్ల పండు ఆకృతి, రుచిలో స్వల్పంగా మార్పులు వచ్చే అవకాశం ఉంది. కాబట్టి అవసరం ఉన్నప్పుడే వాటిని ఫ్రిజ్ లో ఉంచండి.

పండ్లు పాడవకుండా ఉండాలంటే ఈ చిట్కాలు పాటించండి
మీరు తెచ్చిన మామిడి పండ్లు త్వరగా, సమానంగా పండాలని అనుకుంటే..ఒక్కో పండును విడివిడిగా పాత న్యూస్ పేపర్ లో చుట్టి ఒక సంచిలో లేదా అట్టపెట్టెలో ఉంచండి. ఇలా చేయడం వల్ల పండ్ల నుంచి విడుదలయ్యే గ్యాస్ బయటకు పోకుండా ఉండి, పండ్లు చాలా త్వరగా, సహజంగా పండుతాయి.
మామిడి పండ్లను ఎప్పుడూ నేరుగా సూర్యరశ్మి పడే చోట లేదా వేడిగా ఉండే ప్రదేశంలో ఉంచకూడదు. ఎండ వేడికి లేదా అధిక ఉష్ణోగ్రతల వల్ల అవి త్వరగా కుళ్ళిపోతాయి. గాలి బాగా ఆడే, పొడిగా ఉండే గది ఉష్ణోగ్రత వద్ద పండ్లను నిల్వ చేసినట్లయితే అవి ఎక్కువ కాలం పాటు ఫ్రెష్ గా ఉంటాయి.
ఒక్కోసారి పెద్ద మామిడి పండును కోసినప్పుడు, సగం తిని మిగతా సగం వదిలేస్తుంటాం. అలా మిగిలిపోయిన మామిడి పండు ముక్కలను ప్లేట్ లో పెట్టి ఫ్రిజ్ లో అలాగే ఓపెన్ గా ఉంచేయకండి. దీనివల్ల పండ్లు గాలికి ఎండిపోయి పాడవుతాయి. కట్ చేసిన మామిడి ముక్కలను ఎల్లప్పుడూ గాలి చొరబడని డబ్బాలో పెట్టి మాత్రమే ఫ్రిజ్ లో నిల్వ చేయాలి. ఇలా చేస్తే వాటి రుచి, తాజాదనం అస్సలు తగ్గవు.



Click it and Unblock the Notifications
