ఆరోగ్యానికి అమృతం..గ్యాస్, ఉబ్బరం మాయం చేసే కొండ ప్రాంతపు పచ్చ ఉప్పు..వేడి అన్నంతో స్వర్గమే!

ప్రతిరోజూ ఇంట్లో వండే అదే పప్పు అన్నం, రోటీ కూరగాయలు తిని మీ నాలుక రుచిని కోల్పోయిందా? భోజనమంటేనే బోర్ కొడుతోందా? అయితే అత్యంత సాదాసీదా భోజనాన్ని సైతం అద్భుతమైన విందుగా మార్చే మాయాజాలం ఒకటుంది. అదే ఉత్తరాఖండ్, హిమాచల్ ప్రదేశ్ లోయల నుండి వచ్చిన పహాడీ హరా నమక్(కొండ ప్రాంతపు పచ్చ ఉప్పు).

పర్వత ప్రాంతాల ప్రజలు రోలుపై దంచి తయారుచేసే ఈ ఉప్పు ఘాటైన సువాసన, అమోఘమైన రుచి ముందు ఖరీదైన పచ్చళ్లు, చట్నీలు కూడా వెలవెలబోవాల్సిందే. ఇది రుచిని మాత్రమే కాదు, ఆరోగ్యాన్ని కూడా పెంచుతుంది. ఇందులోని ఇంగువ, జీలకర్ర, వెల్లుల్లి, అల్లం జీర్ణక్రియను మెరుగుపరిచి గ్యాస్, కడుపు ఉబ్బరం వంటి సమస్యలను దరిచేరనివ్వవు.

కొండ ప్రాంతపు పచ్చ ఉప్పు తయారీకి కావలసిన పదార్థాలు

కొత్తిమీర ఆకులు: 1 కప్పు
పచ్చిమిర్చి: 3-4
వెల్లుల్లి రెబ్బలు: 6-8 (పచ్చి వెల్లుల్లి ఆకులు దొరికితే ఇంకా మంచిది)
అల్లం: 1 అంగుళం ముక్క
వేయించిన జీలకర్ర: 1 టేబుల్ స్పూన్
రాళ్ల ఉప్పు (కల్లుప్పు) లేదా సాధారణ ఉప్పు: 3-4 టేబుల్ స్పూన్లు
బ్లాక్ సాల్ట్: 1 టీస్పూన్
ఇంగువ: చిటికెడు

కొండ ప్రాంతపు పచ్చ ఉప్పు తయారీ విధానం

-ముందుగా కొత్తిమీర, పచ్చిమిర్చి, వెల్లుల్లి, అల్లంలను శుభ్రంగా కడిగి, ఒక పొడి గుడ్డతో తుడవాలి. వీటిలో ఏమాత్రం తడి ఉండకూడదు. ఆకులపై నీరు ఉంటే ఉప్పు త్వరగా పాడైపోతుంది.

-అసలైన రుచి కావాలంటే ఈ పదార్థాలను రుబ్బురోలులో దంచుకోవాలి. రోలు లేకపోతే, మిక్సీ జార్‌ లో నీళ్లు అస్సలు పోయకుండా పల్స్ మోడ్‌ లో (కొద్దికొద్దిగా ఆపుతూ, ఆన్ చేస్తూ) బరకగా రుబ్బుకోవాలి.

-ఇప్పుడు ఈ పచ్చటి మిశ్రమానికి వేయించిన జీలకర్ర, ఇంగువ, నల్ల ఉప్పు, సాధారణ ఉప్పు వేసి బాగా మిక్స్ చేయాలి.

-ఇలా కలిపిన తర్వాత, తయారైన ఉప్పును ఒక పళ్ళెంలో పలుచగా పరిచి 10-15 నిమిషాల పాటు గాలికి లేదా లేత ఎండలో ఉంచాలి. దీనివల్ల ఉప్పులోని అదనపు తేమ పూర్తిగా పోతుంది.

ఎలా వాడుకోవాలి? ఎలా నిల్వ చేయాలి?
పూర్తిగా ఆరిన ఈ పచ్చి ఉప్పును గాలి చొరబడని గాజు సీసాలో భద్రపరుచుకుంటే, నెలల తరబడి ఫ్రెష్ గా ఉంటుంది. సీసా మూత తీయగానే వచ్చే కమ్మటి సువాసన మీ నోరూరిస్తుంది.

సలాడ్స్, ఫ్రూట్ చాట్, రైతా, ఉడికించిన గుడ్లు, లేదా కాల్చిన బంగాళదుంపలపై ఈ ఉప్పును కాస్త చల్లుకుని తింటే ఆ మజాయే వేరు.

ఇంట్లో కూరలు ఏమీ లేనప్పుడు, వేడివేడి పరాఠా లేదా అన్నంలో కాస్త నెయ్యి వేసుకుని, ఈ పచ్చ ఉప్పు కలుపుకుని తింటే మీరెప్పుడూ మర్చిపోలేని రుచి మీ సొంతమవుతుంది.