నోరూరించే రొయ్యల కొబ్బరి గ్రేవీ.. రెస్టారెంట్ స్టైల్ రుచితో ఇంట్లోనే సులభంగా!

రొయ్యల్లో ఉండే ఆ విలక్షణమైన రుచి ఎవరినైనా ఇట్టే కట్టిపడేస్తుంది. రొయ్యలతో ఎంతో స్పెషల్ అండ్ టేస్టీగా ఉండే రొయ్యల కొబ్బరి గ్రేవీని ఇంట్లోనే రెస్టారెంట్ స్టైల్ రుచితో, చాలా సులభంగా తయారు చేసుకోవచ్చు. కొబ్బరిలోని కమ్మదనం, నిమ్మకాయలోని పులుపు, మసాలాల ఘాటు, రొయ్యల సాఫ్ట్‌నెస్ అన్నీ కలిసి ఈ కూరను నెక్ట్స్ లెవల్ కి తీసుకెళ్తాయి. తీరప్రాంతపు వంటకాల రుచిని తలపించే ఈ గ్రేవీ, వేడి వేడి అన్నంలోకే కాకుండా ఇడ్లీ, దోశ, చపాతీ, నాన్, పరాఠా.. ఇలా ఏ కాంబినేషన్‌లో తిన్నా అమృతంలా ఉంటుంది.

రొయ్యల కొబ్బరి గ్రేవీ తయారీకి కావలసిన పదార్థాలు

తాజా రొయ్యలు - 450 గ్రాములు
పచ్చి కొబ్బరి గుజ్జు - ఒకటింబావు కప్పు
పెద్ద ఉల్లిపాయ - 1
ఎర్రటి టమోటాలు - 2
నిమ్మరసం - 3 టేబుల్ స్పూన్లు
అల్లం వెల్లుల్లి పేస్ట్ - ఒకటిన్నర టీస్పూన్
పసుపు పొడి - పావు టీస్పూన్
కాశ్మీరీ ఎర్ర కారం పొడి - ఒకటిన్నర టీస్పూన్
ధనియాల పొడి - 1 టేబుల్ స్పూన్
జీలకర్ర పొడి - అర టీస్పూన్
వంట నూనె - 2 టేబుల్ స్పూన్లు
కొత్తిమీర తరుగు - 1 టేబుల్ స్పూన్
ఉప్పు - మీ రుచికి తగినంత
నీరు - అర కప్పు

రొయ్యల కొబ్బరి గ్రేవీ తయారీ విధానం

-ముందుగా స్టవ్ వెలిగించి, మందపాటి కడాయి పెట్టుకుని అందులో రెండు టేబుల్ స్పూన్ల నూనె వేయండి. నూనె కాస్త వేడెక్కాక, సన్నగా తరిగిన ఉల్లిపాయ ముక్కలు వేసి దోరగా, బంగారు గోధుమ రంగు వచ్చే వరకు వేయించుకోవాలి.

-ఉల్లిపాయలు చక్కగా వేగిన తర్వాత అందులో ఫ్రెష్‌ గా దంచి పెట్టుకున్న అల్లం వెల్లుల్లి పేస్ట్ వేసి పచ్చి వాసన పోయి, ఘుమఘుమలాడే వరకు సన్నని మంటపై వేయించాలి. ఇప్పుడు అందులో పసుపు, కాశ్మీరీ కారం పొడి, ధనియాల పొడి, జీలకర్ర పొడి, కూరకు సరిపడా ఉప్పు వేసి బాగా కలుపుకోవాలి. మసాలాలు మాడిపోకుండా ఉండటానికి కొద్దిగా నీళ్లు చల్లి కలుపుకుని, ఆ తర్వాత సన్నగా తరిగిన టమోటా ముక్కలు వేయాలి. టమోటాలు పూర్తిగా మగ్గిపోయి, మెత్తని గుజ్జులా మారే వరకు ఉడికించాలి.

-టమోటా గ్రేవీ సిద్ధమయ్యాక, అందులో ముందుగా రుబ్బి పెట్టుకున్న పచ్చి కొబ్బరి గుజ్జును వేసి బాగా కలపాలి. మీడియం మంట మీద పెట్టి గ్రేవీని బాగా మరిగించాలి.

-గ్రేవీ ఉడుకుతున్నప్పుడు, శుభ్రం చేసిన రొయ్యలను అందులో వేయాలి. రొయ్యలు వేసాక నెమ్మదిగా కలిపి, మూత పెట్టి మీడియం మంట మీద 5 నిమిషాల పాటు ఉడికించాలి. రొయ్యలు త్వరగా ఉడుకుతాయి, ఎక్కువసేపు ఉడికితే రబ్బరులా గట్టిపడతాయి.

-రొయ్యలు మెత్తగా ఉడికి, గ్రేవీ చిక్కబడి నూనె పైకి తేలుతున్నప్పుడు స్టవ్ ఆపేయాలి. చివరగా నిమ్మరసం పిండి, కొత్తిమీరను పైన చల్లుకుంటే రొయ్యల కొబ్బరి గ్రేవీ రెడీ.