వెజిటేబుల్ ఎగ్ ఫ్రైడ్ రైస్

Veg

oi-Saraswathi

By Sindhu

Published: Wednesday, July 11, 2012, 11:45 [IST]

వెజ్ ఎగ్ ఫ్రైడ్ రైస్ అతి త్వరగా చాలా సులభంగా అతి తక్కువ సమయంలో తయారు చేసుకొనే వంటకం. ఇది బ్రేక్ ఫాస్ట్ గాను లేదా మధ్యాహ్నభోజనం లేదా డిన్నర్ లోనూ తినవచ్చు. చిన్నపిల్లలైతే మరీ ఇష్టంగా తినే ఈ వెజ్ ఎగ్ ఫ్రైడ్ రైస్ లంచ్ బాక్స్ లకు తయారు చేసి ఇవ్వొచ్చు. ముఖ్యంగా శీతాకాలంలో ఈ ఎగ్ ఫ్రైడ్ రైస్ వేడి వేడిగా తినడానికి చాలా మంది ఇష్టపడుతారు. వర్షాకాలంలో అయితే మరింత రుచిగా... కారంగా తయారు చేసుకొని తినవచ్చు. గుడ్డులో హై క్వాలిటీ ప్రోటీన్స్ ఉంటాయి. ఎగ్ తినడం వల్ల మెదడును చురుకుగా ఉంచుతుంది. దీన్ని బ్రేక్ ఫాస్ట్ లో తీసుకొన్నట్లైతే బరువు తగ్గడానికి బాగా ఉపకరిస్తుంది. గుడ్డును ఏదో ఒకరకంగా తీసుకోవడం వల్ల ‘ఐ'సైట్ ను తగ్గించి కొవ్వు పెరగకుండా నిరోదిస్తుంది. ఇందులో విటమిన్ బి మరియు విటమిన్ డి మరియు ప్రోటీన్స్ అధికంగా ఉంటాయి. మరి ఇన్ని ఆరోగ్య గుణాలున్న ఈ వెజ్ ఎగ్ ఫ్రైడ్ రైస్ ఎలా తయారు చేయాలో చూద్దాం....

కావలసిన పదార్థాలు:
రైస్: 2cups
గుడ్లు: 4
వెజిటేబుల్స్(కూరగాయలు): 1cup(క్యాప్సికమ్, క్యారెట్, క్యాబేజ్, ముక్కలు)
ఉల్లిపాయ(చిన్న ముక్కలుగా కట్ చేసుకోవాలి): 2 లేదా 3
పచ్చిమిర్చి: 6-8
గరం మసాలా పౌడర్: 1tbsp
అల్లం వెల్లుల్లి పేస్ట్: 1tbsp
కొత్తిమీర తరుగు: 2tbsp
నూనె: తగినంత
సోయా సాస్: 1tsp
వెనిగర్: 1/2tsp
అజినామోటో: చిటికెడు
పసుపు: చిటికెడు
ఉప్పు: రుచికి తగినంత

తయారు చేయు విధానం:
1. అన్నం ముందే వండి పెట్టుకొని ఉంటే సరి లేదంటే బియ్యంను బాగా శుభ్రం చేసి సరిపడా నీళ్ళు పోసి అన్నం వండుకోవాలి.
2. తర్వాత వండు కొన్న అన్నం ఒక ప్లేట్ లోనికి తీసుకొని చల్లారనివ్వాలి.
3. అంతలోపు ఉల్లిపాయ, పచ్చిమిర్చి, వెజిటేబుల్స్ కట్ చేసి పెట్టుకోవాలి. (వెజిటేబుల్స్ చాలా చిన్నగా కట్ చేసుకొంటే ఒకే సారి నూనెలోనే కట్ ఫ్రై చేసుకోవచ్చు. లేదంటే కొంచెం పెద్ద కట్ చేసుకొంటే కొన్ని నీళ్ళు పోసి ఉడికించి పక్కన పెట్టుకోవాలి).
4. ఇప్పుడు పాన్ లో నూనె వేసి వేడయ్యాక అందులో ఆవాలు, కరివేపాకు, పచ్చిమిర్చి, ఉల్లిపాయ ముక్కలు వేసి బాగా వేయించుకోవాలి.
5. పచ్చిమిర్చి, ఉల్లిపాయలు వేగిన తర్వాత అందులోనే వెజిటేబుల్స్ కూడా వేసి రెండు నిమిషాలు వేయించి లైట్ గా ఉప్పు చల్లి మూత పెట్టి ఐదు నిమిషాల పాటు ఆవిరిలో ఉడికించుకోవాలి.
6. వెజిటేబుల్స్ కొద్దిగా మెత్తబడిన తర్వాత గుడ్లును పగులగొట్టి అందులో వేసి బాగా ఫ్రై చేయాలి. ఐదు నిమిషాల తర్వాత అందులోనే రుచికి సరిపడా ఉప్పు, గరం మసాలా, పసుపు వేసి బాగా కలిపుతూ ఫ్రై చేయాల్సి ఉంటుంది.
7. ఇప్పుడు ఈ ఫ్రైడ్ మిశ్రమంలో చల్లారబెట్టుకొన్న అన్నం వేసి బాగా కలగలపాలి. చివరగా సోయా సాస్ మరియు వెనిగర్, అజినామాటో వేసి మరోసారి బాగా కలపాలి. తర్వాత కొత్తమిర తురుముతో గార్నిష్ చేసి హాట్ హాట్ గా సర్వ్ చేయాలి. అంతే వెజిటేబుల్ ఎగ్ ఫ్రైడ్ రైస్ రెడీ.