Varalakshmi Vratham 2022:వరలక్ష్మీ వ్రతం సమయంలో ఏ పనులు చేయాలి... ఏమి చేయకూడదు..

వ్రతం చేసే రోజు..

వరాలిచ్చే తల్లినే వరలక్ష్మీ దేవత అని అంటారు. శ్రావణ మాసంలో శుక్ల పౌర్ణమికి ముందు వచ్చే శుక్రవారం రోజున వరలక్ష్మీ వ్రతం చేయడం ప్రతి ఏటా ఆనవాయితీగా వస్తోంది. ఈ నేపథ్యంలో తమ ఇంటికి సకల సౌభాగ్యాలు కలగాలని కోరుకుంటూ ఆడవారు చేసే వ్రతం ఇది. ఈరోజున ఉదయాన్నే తలస్నానం చేసి.. ఉతికిన బట్టలను ధరించి పూజ గదిని శుభ్రం చేయాలి. ఈరోజంతా ఉపవాసం ఉండాలి.

అమ్మవారి అలంకరణ..

వరలక్ష్మీ వ్రతానికి ముందు అమ్మవారి విగ్రహాన్ని అలంకరించాలి. అనంతరం కలశ స్థాపన చేయాలి. ముందుగా విఘ్ణేశ్వరుని పూజ, కలశ పూజ, కంకణ పూజ చేయాలి. ఆ తర్వాత అష్టోత్తర శతనామవళి చదివి.. వరలక్ష్మీ వ్రతం కథ చెప్పుకోవడం ప్రారంభించాలి.

వరలక్ష్మీ దేవతను..

అనంతరం పూజను ప్రారంభించాలి. తర్వాత అష్టలక్ష్ములందరూ కలిసిన రూపమైన వరలక్ష్మీ దేవతను పూజించాలి. ఇలా పూజించడం వల్ల తమ కుటుంబం మొత్తానికి ఆరోగ్యం, శాంతి, ప్రేమ, చదువు, ఐశ్వర్యం, పేరు ప్రఖ్యాతలు, ఆనందం.. వంటివన్నీ అందుతాయని భక్తుల నమ్మకం.

పూజ పూర్తయ్యాక..

వ్రతం సమయంలో నేవైద్యాలు అర్పించి.. చేతికి కంకణం కట్టుకుని.. అక్షింతలు తలపై వేసుకొని పూజను పూర్తి చేయాలి. ఆ తర్వాత ముత్తైదువులందరికీ తాంబూలాలు ఇచ్చి తీర్థ ప్రసాదాలు ఇవ్వాలి. అమ్మవారికి పెట్టిన నైవేద్యాన్ని ఆరోజే తినేయాలి. అలాగే రాత్రి వరకూ ఉపవాసం ఉండాలి. ఇంతకన్నా ఈ వ్రతానికి పెద్దగా నియమనిష్టలంటూ ఏమీ లేవని పండితులు చెబుతున్నారు.

భక్తి శ్రద్ధలతో..

అయితే వరలక్ష్మీ వ్రతం చేసే సమయంలో అమ్మవారిని ఎంతో భక్తి శ్రద్ధలతో పూజించాలి. వరాలిచ్చే తల్లి వరలక్ష్మీ కాబట్టి.. ఈ వ్రతం మనసు నిండా భక్తితో చేస్తే చాలు.. సకల శుభాలు కలుగుతాయి. అంతేకాదు ఈ వ్రతం చేసినప్పుడు లేదా ఈ వ్రతాన్ని చూసినా.. వ్రత కథ చదివినా కూడా అష్టఐశ్వర్యాలు, ఆరోగ్యభాగ్యాలు కలుగుతాయని చాలా మంది నమ్ముతారు. అదే విధంగా కొందరు అమ్మవారి అలంకరణను విభిన్నంగా చేస్తూ విశేష పూజలు చేస్తుంటారు. అయితే అలా చేయలేని వారు కేవలం కలశం పెట్టుకుని పూజించినా సరే.. అవే ఫలితాలొస్తాయి.

ఇలా చేయొద్దు..

వరలక్ష్మీ వ్రతం రోజున మనసులో ఏదో విషయం గురించి ఆలోచిస్తూ.. పరధ్యానంలో ఉంటూ పూజ చేయకూడదు.

అలా చేస్తే మీరు ఎంత అలంకరణ చేసి.. ఎన్ని నైవేద్యాలు సమర్పించినా మీరు కోరుకున్న కోరికలు నెరవేరవు. ఈరోజున మధ్యాహ్నం వేళ నిద్రపోకూడదు. రాత్రి వేళలో కూడా అన్నం తినరాదు. ఏదైనా పళ్లరసం మాత్రమే తాగాలి. ఈరోజు భాగస్వామితో శారీరకంగా ఎలాంటి సంబంధాలు పెట్టుకోకూడదు.