సమతుల్య ఆహారంతో సహజసిద్దమైన అందం...!

Published: Wednesday, February 8, 2012, 12:09 [IST]

అనునిత్యం ఫ్యాషన్‌, గ్లామర్‌ అంటూ పరుగులెత్తే నేటి యూత్‌ ప్రస్తుతం రసాయనాల మిశ్రమ మేకప్‌ కు దూరంగా ఉండాలని కోరుకుంటున్నారు. సహజసిద్ధమైన అందానికి ప్రాముఖ్యత ఇస్తున్నారు. ఎందుకంటే ఈ ఆధునిక కాలంలో కాస్మొటిక్స్‌ ను అనేక రసాయనాలను ఉపయోగించి తయారుచేయడం మొదలైంది. వీటివల్ల సైడ్‌ ఎఫెక్ట్స్ ఎక్కువగా ఉన్నా వీటినే వాడడం మొదలు పెట్టారు.

మనిషి అందంగా కనిపించడానికి బాహ్య సౌందర్యమే కాదు మనసుకూడా స్వచ్ఛంగా ఉన్నప్పుడే అది నిజమైన అందం అంటున్నారు నేటి కుర్రకారు. ప్రస్తుత జనరేషన్ లో అందానికి ఉన్న ప్రాముఖ్యత అంతా ఇంతా కాదు. ఈ ట్రెండ్ లో ఫ్యాషన్ అనిపించుకోవాలంటే మంచి దుస్తులతో పాటు గ్లామర్‌ గా కనిపించడమూ పరిపాటే. మనసుకు ఇంపైన సౌందర్యాన్ని అందం అంటాం. శరీర అవయవ అందాన్ని మనసుతో చూస్తాం. అందము ఒక్కొక్కరికి ఒక్కోలా కనిపిస్తుంటుంది. ప్రతి మనిషి ఆడ, మగ అందరూ అందంగా ఉండాలని అనుకుంటారు. ఉండాలని ప్రయత్నమూ చేస్తారు. అందమంటే శారీరక సౌందర్యమే కాదు, మానసికంగాను, ఉల్లాసముగాను ఉండాలి. అప్పుడే పూర్తి అందంగా కనిపిస్తా.

ఆడ, మగ ఎవరైనా సరే అందంగా కనిపించాలంటే అందుకు మనం తీసుకునే ఆహారం విషయంలో కూడా శ్రద్ధతీసుకోవాలి. బాహ్యసౌందర్యం బాగుండాలంటే శరీరంలో అందుకు తగిన శక్తి సామర్థ్యాలను పెంపొందించుకోవాలి. సమతుల్యమైన ఆహారము తీసుకోవాలి. విటమినులు ఉన్న ఆహారము తీసుకోవాలి. యాంటి యాక్సిటెంట్లు తీసుకుంటే శరీర కాంతి నిగనిగ లాడుతుంటుంది. క్రొవ్వు పదార్థములు తక్కువగా తీసుకోవాలి. వేళకు నిద్ర., వేళకు ఆహారము, రోజూ వ్యాయామం వంటివి ఆచరించాలి. చిన్న చిన్న విషయాలకు టెన్షన్‌ పడడం తగ్గించుకోవాలి. ఎక్కువ స్ట్రెస్‌, స్ట్రెయిన్‌ కు గురికాకూడదు. ప్రతి రోజు మృదువైన సబ్బుతో స్నానం చేయాలి. ఎప్పుడూ పాజిటివ్‌ గానే ఆలోచించడం, పాజిటివ్ గా ఉండటం అలవర్చుకోవాలి. అప్పుడే మనకు అందంతో పాటు ఆనందం కలుగుతుంది.