వర్షాకాలంలో జుట్టు విపరీతంగా రాలిపోతోందా? ఇలా చేస్తే నో టెన్షన్

చిరు జల్లుల వర్షాకాలం రాగానే వేసవి తాపం నుంచి మనకు గొప్ప ఉపశమనం లభిస్తుంది. కానీ ఈ అందమైన వాతావరణం ఒక పెద్ద సమస్యను కూడా తనతో పాటు తెస్తుంది.. అదే జుట్టు రాలడం. స్నానం చేస్తున్నప్పుడు, జుట్టు దువ్వుకుంటున్నప్పుడు, లేదా ఉదయం లేవగానే దిండు మీద కుప్పలు కుప్పలుగా జుట్టు రాలి ఉండటం చూస్తే ఎవరికైనా గుండె ఆగినంత పనవుతుంది.

రోజుకు 50-100 వెంట్రుకలు రాలడం సాధారణమేనా?
నిపుణులు చెబుతున్న ప్రకారం.. రోజుకు 50 నుంచి 100 వెంట్రుకలు రాలడం అనేది చాలా సహజమైన ప్రక్రియ. మన జుట్టుకు కూడా ఒక సహజమైన జీవిత చక్రం ఉంటుంది. ఇందులో కొన్ని వెంట్రుకలు పెరుగుతాయి, మరికొన్ని నిద్రాణస్థితికి చేరుకుంటాయి, పాత వెంట్రుకలు రాలిపోయి ఆ స్థానంలో కొత్తవి పుట్టుకొస్తుంటాయి. ఇది నిరంతరం జరిగే ప్రక్రియ. కాబట్టి మీ దువ్వెనకు కొన్ని వెంట్రుకలు తగిలినంత మాత్రాన ఆందోళన చెందాల్సిన అవసరం ఏమాత్రం లేదు.

వర్షాకాలంలో జుట్టు ఎక్కువగా ఎందుకు రాలుతుంది?

దీనికి ప్రధాన కారణం గాలిలో అమాంతం పెరిగే అధిక తేమ (హ్యుమిడిటీ). ఈ తేమ వల్ల మన తల మాడ (స్కాల్ప్) త్వరగా జిడ్డుగా మారుతుంది. తల చర్మంపై సహజంగా ఉత్పత్తి అయ్యే నూనెకు తోడు చెమట, దుమ్ము, ధూళి చేరడంతో జుట్టు కుదుళ్లు తీవ్రంగా బలహీనపడతాయి. కుదుళ్లు పట్టు తప్పడంతో జుట్టు రాలడం అధికమవుతుంది.

తడి జుట్టుతో ఈ పొరపాట్లు అస్సలు చేయకండి

కాలుష్యంతో కూడిన వర్షపు నీరు తలపై పడినప్పుడు అది చర్మాన్ని దెబ్బతీస్తుంది. వర్షంలో తడిసిన తర్వాత జుట్టును ఎక్కువసేపు తడిగా వదిలేయడం వల్ల ఫంగల్ ఇన్ఫెక్షన్లు వచ్చే ప్రమాదం ఉంది. దీనివల్ల తలలో విపరీతమైన దురద, చుండ్రు ఏర్పడి జుట్టు రాలడం రెట్టింపు అవుతుంది. అలాగే, చాలామంది తడి జుట్టును టవల్‌ తో బలంగా రుద్దుతుంటారు, లేదా తడిగా ఉన్నప్పుడే దువ్వెనతో చిక్కులు తీస్తుంటారు. తడిగా ఉన్నప్పుడు వెంట్రుకలు సున్నితంగా ఉంటాయి కాబట్టి, ఇలా చేయడం వల్ల జుట్టు సులభంగా మధ్యకే తెగిపోతుంది.

నిపుణులు చెబుతున్న సులభమైన చిట్కాలు

-పొరపాటున మీరు వర్షంలో తడిస్తే, ఇంటికి చేరుకోగానే ముందుగా శుభ్రమైన నీటితో తలస్నానం చేయండి.

-ఆ తర్వాత జుట్టును గాలికి సహజంగా, పూర్తిగా ఆరబెట్టుకోండి. కురులు ఎక్కువసేపు తడిగా లేకుండా చూసుకోవడం ముఖ్యం.

-వారానికి రెండు లేదా మూడు సార్లు గాఢత తక్కువగా ఉండే (మైల్డ్) షాంపూతో తలస్నానం చేయాలి.

-ఇన్ని జాగ్రత్తలు తీసుకున్నప్పటికీ మీకు చుండ్రు, దురద సమస్యలు వేధిస్తుంటే నిర్లక్ష్యం చేయకుండా చర్మవ్యాధి నిపుణులను (డెర్మటాలజిస్ట్) సంప్రదించడం బెటర్.

జుట్టును బలంగా మార్చే పోషకాహారం
కేవలం పై పూతలే కాదు, మనం తీసుకునే ఆహారం కూడా జుట్టు ఆరోగ్యాన్ని నిర్ణయిస్తుంది. జుట్టు రాలడాన్ని అరికట్టాలంటే మీ రోజువారీ ఆహారంలో ప్రొటీన్లు అధికంగా ఉండే గుడ్లు, పాలు, పప్పుధాన్యాలతో పాటు ఆకుకూరలు, తాజా పండ్లు, డ్రై ఫ్రూట్స్ (నట్స్) తప్పకుండా ఉండేలా చూసుకోండి. శరీరంలో విటమిన్ బి12, విటమిన్ డి, జింక్ వంటి పోషకాల లోపం ఉన్నా జుట్టు రాలుతుంది. కాబట్టి పోషకాహారం తీసుకోవడం తప్పనిసరి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.