కరెంటు లేకుండా పని చేసే ట్రెడ్ మిల్ ను రూపొందించిన తెలుగు వ్యక్తి.. కేటీఆర్, ఆనంద్ మహేంద్రా ఆసక్తి..

ఆటోమేటిక్ గా..

ఐడియా ఒక జీవితాన్ని మార్చేస్తుంది. అందుకే మన దేశంలో కొత్త కొత్త ఆలోచనలతో సరికొత్త ఆవిష్కరణలు వస్తున్నాయి. తాజాగా తెలంగాణకు చెందిన ఓ వ్యక్తి కరెంట్ అవసరం లేకుండానే నడిచే ట్రెడ్ మిల్ ను రూపొందించాడు. చెక్క కర్రల సాయంతో కరెంట్ అవసరం అనేదే లేకుండా ఆటోమేటిక్ గా పని చేసేలా తయారు చేశాడు. ఈ ట్రెడ్ మిల్ పై నడుస్తున్నప్పుడు, అందులో అమర్చిన ప్రత్యేక స్ప్రింగుల ద్వారా దానికదే రోల్ అవ్వడం దీని ప్రత్యేకత.

మరింత డెవలప్ చేయాలని

తను రూపొందించిన ట్రెడ్ మిల్ ను ట్విట్టర్లో షేర్ చేయగా.. దీన్ని చూసిన నెటిజన్లు వావ్ సూపర్ ఇన్నోవేషన్ అంటూ అతనిపై ప్రశంసలు కురిపిస్తున్నారు. ఇది తెలంగాణ మంత్రి కేటీఆర్ ను బాగా ఆకర్షించింది. దీన్ని పరిశీలించి తనకు సాయం చేయాలని టీఎస్ వర్క్స్ హైదరాబాద్ ట్విట్టర్ హ్యాండిల్ కి ట్యాగ్ చేశారు. దీన్ని మరింత డెవలప్ చేయాలని ఓ నెటిజన్ సలహా ఇవ్వగా.. ఈ ట్రెడ్ మిల్ ను ఒకసారి చూడండి అంటూ ప్రముఖ పారిశ్రామికవేత్త ఆనంద్ మహీంద్ర విన్నవించడం విశేషం. అంతేకాదు తనకు కూడా అది ఒకటి కావాలని కోరుకున్నారు.

తొలి భాగంలో..

ఒక నిమిషం లోపు ఉన్న ఈ వీడియోలో తొలి భాగం చెక్క ట్రెడ్ మిల్ తయారీ గురించి ఉంది. చెక్క కర్రలను అనుసంధానించడం, చైన్ ఏర్పాట్లు చేయడం మనకు స్పష్టంగా కనిపిస్తాయి. ఇక చివర్లో తను తయారు చేసిన వుడెన్ ట్రెడ్ మిల్ పై తనే స్వయంగా నడుస్తూ డెమో ఇస్తూ కనిపిస్తాడు.

గొప్ప నైపుణ్యం..

ఈ వీడియో చూసిన నెటిజన్లు తన నైపుణ్యాన్ని మెచ్చుకుంటున్నారు. అయితే కొందరు మాత్రం దీనిపై కొన్ని డౌట్స్ ఉన్నాయన్నారు. అది అంత పర్ఫెక్ట్ గా పని చేయకపోవచ్చని చెప్పారు. ఇంకా కొందరు మాత్రం హైదరాబాదులో ఇప్పటికే కరెంట్ లేకుండా ట్రెడ్ మిల్ ను చాలా మంది వినియోగిస్తున్నట్లు తెలిపారు. ఎవరు ఏమనుకున్నా.. తన నైపుణ్యం చాలా గొప్పదని చెప్పడంలో ఎలాంటి సందేహం అక్కర్లేదు. ఇది ప్రస్తుతం ప్రాథమిక దశలోనే ఉన్నప్పటికీ.. దీన్ని మార్కెట్లో పోటీకి అనుగుణంగా ప్రవేశపెడితే, కచ్చితంగా ఇది టాప్ లో ఉంటుందనే అభిప్రాయాలు వినిపిస్తున్నాయి.