బేబీకి బెస్ట్....పేరెంట్స్ కి టెస్ట్!

By B N Sharma

Published: Wednesday, January 18, 2012, 10:14 [IST]

బేబీకి డే కేర్ అంటే, బేబీ రోజులో అధికసమయాన్ని అక్కడే గడిపేస్తుంది. చిన్నగా వున్నపుడే పిల్లలు మంచి చెడు అన్నీ నేర్చేసుకుంటారు. కనుక బేబీ అధికంగా గడిపే డే కేర్ సెంటర్ లో వాతావరణం బాగా వుండేలా చూడాలి. అపుడే బేబీ అన్నీ సరిగా నేర్చుకునే అవకాశం వుంటుంది. మంచి వాతావరణం కల డే కేర్ సెంటర్ ఎంపిక చేయాలంటే, నిజానికి చాలా కష్టమైన పనే. ఈ రోజులలో వీటి రేట్లు చాలా ఎక్కువగా వుంటున్నాయి. బేబీని చేర్పించబోయే డే కేర్ సెంటర్ ఎలా వుండాలో పరిశీలించండి.

1. భధ్రత - బేబీ భధ్రత ప్రధానం నేటిరోజులలో బేబీని ఎత్తుకుపోవటాలు, దుర్వినియోగం చేయటాలు జరుగుతున్నాయి. కనుక మీరు ఎంపిక చేసుకునే సెంటర్ లో బేబీ రోజంతా ఏం చేస్తుందనేది సి.డి. తీయించి మీకు అందించగల నిపుణతలు కల సెంటర్ ఎంపిక చేయండి.
2. డేకేర్ సిబ్బంది నైపుణ్యం - మీరు వ్యక్తిగతంగా డే కేర్ సిబ్బంది నిపుణతలు పరిశీలించి వారికి సరైన అర్హతలున్నాయా లేక ఏదైనా క్రిమినల్ రికార్డ్ వంటివి వున్నాయా? అనేవి చెక్ చేయండి.
3. సిబ్బంది - పిల్లల సంఖ్యను బట్టి తగినంతమంది సిబ్బంది వున్నారా? అనేది కూడా పరిశీలించాలి. దీనితోనే బేబీకి అవసరమైన శ్రధ్ధ లభిస్తుంది.
4. పని గంటలు - డే కేర్ సెంటర్ లో మీ బేబీ వుండే గంటలు మీ పని గంటలకు కూడా సరిపోవాలి. అది మీకు, బేబీకి కూడా సౌకర్యంగా వుంటుంది.
5. సెలవు దినాలు - డే కేర్ సెంటర్ కు గల సెలవు దినం మీ కార్యాలయ సెలవు దినంతో సరిపోలాలి. చాలా డేకేర్ సెంటర్ లు ఆదివారాలు సెలవుదినాలుగా ప్రకటిస్తాయి.
6. వ్యయం - డేకేర్ సెంటర్ లోని ఫీజు వంటివి మీ బడ్జెట్ కు కూడా అనుకూలంగా వుండాలి. వారు అధికమైన ఫీజులు అడిగితే మరొక దానిని ఎంపిక చేయాల్సివుంటుంది.
7. ఎమర్జెన్సీ - ఏదైనా ఎమర్జెన్సీ వచ్చినపుడు మీరు బేబీని తెచ్చుకోలేకుంటే, వారు ఏ రకమైన ఏర్పాట్లు చేస్తారనేది కూడా ముందుగా తెలుసుకోండి.
8. దూరం - డే కేర్ సెంటర్ మీ కార్యాలయానికి అందుబాటులో లేక మీరు వెళ్ళే దారిలో వుంటే బేబీని అప్పగించడం, తెచ్చుకోవడం తేలికవుతుంది. ఈ సూచనలు పాటించి మీ బేబీని మంచి డేకేర్ సెంటర్ లో చేర్పించండి.