తగవులు తీర్చటం....బంధాలు పెంచటం!

Kids

oi-Nageswara

By B N Sharma

Published: Wednesday, March 7, 2012, 9:56 [IST]

ఇద్దరు పిల్లలున్న తల్లి తండ్రులు, పిల్లలిద్దరిపైనా తమ శ్రధ్ధను, ప్రేమను చూపాలి. అయితే, పిల్లలు వారిలో వారే తగాదాలు పెట్టుకుంటే అపుడు వాటి పరిష్కారం తల్లితండ్రులకు కష్టమే అవుతుంది. టీనేజ్ పిల్లలది వేడి రక్తం. వారికొచ్చే సమస్యలు ప్రత్యేకించి తోడబుట్టిన వారిలో తీవ్రంగానే వుంటాయి. అపుడు తల్లితండ్రులు కలిగించుకొని పరిష్కరించాలి. మరి ఈ రకమైన సమస్యలకు తల్లితండ్రులకు కొన్ని చిట్కాలు చూడండి.

1. అత్యవసరం అనుకుంటే తప్ప పిల్లల విషయంలో జోక్యం చేసుకోకండి. పిల్లలు వారిలో వారే తమ సమస్య పరిష్కరించుకోవాలని తెలుపండి. ఇద్దరూ ఒక అవగాహన ఏర్పరచుకోవాలనండి.

2. మంచి విలువలు వారికి నేర్పండి. చిన్న విషయాలపై పోట్లాటలు వద్దని తెలుపండి. తోడబుట్టినవారు అయికమత్యంగా వుండాలని నేర్పించండి. ఒకే తల్లితండ్రులకు పుట్టటం ఎంతో మేలని అది వారిలో సహాయతను పెంపొందిస్తుందని తెలుపండి. మొదటినుండి మంచి ప్రవర్తన కలిగిస్తే వారు పెద్ద అయినప్పటికి వాటిని కాపాడుకుంటూ జీవిస్తారు.
3. వారి తగాదాలకు ప్రాధాన్యతనివ్వకండి. ఇద్దరి పిల్లలలోను ఎవరికీ అతి చనువు ఇవ్వకండి. ఒకరికి మీవద్ద అతి చనువు ఇస్తే అది మరిన్ని సమస్యలకు దోవతీస్తుంది.

4. టీనేజ్ అహంకార పోట్లాటలు వస్తాయి. చాలామంది ఎంతో మొండిగా ప్రవర్తిస్తారు. కోపం తెచ్చుకుంటారు. వారిని శాంతపరచాలి. రెండువైపులా వినడం చాలా తెలివిగా తీర్పులివ్వడం వుండాలి. కుటుంబంలో ప్రశాంతత వుండాలంటే టీనేజర్లతో సామరస్యంగా సరైన రీతిలో వ్యవహరించాలి.
5. తోడబుట్టిన వారిమధ్య పోట్లటలు రాకూడదంటే వారిని ఎల్లపుడూ బిజీగా వుంచాలి. ఖాళీ సమయాన్ని ఏ రకంగా గడపాలనేది సామరస్యంగా వారిలో వారినే నిర్ణయించుకోమనండి. ఇంటిలోని పనులు సైతం వారిలో వారే నిర్ణయించుకొని చేస్తూంటే, ఇక వారిమధ్య తగాదాలు వచ్చే అవకాశం వుండదు.

6. తగవులు వచ్చే పరిస్ధితి రానీయకండి. తగవు వస్తుందనుకుంటే ముందుగానే అది తప్పేలా చేయండి. ఉదాహరణకు మీరు చేసే డిష్ ఒకరికి ఇష్టమై మరొకరికి కాకపోతే రెండో వారికి ఇష్టమైన డిష్ కూడా చేయటమో లేదా మరో రోజుకు నిర్ణయించి వారిని మెప్పించటమో చేయాలి.