ఆంధ్ర స్టైల్ ఉసిరికాయ నిల్వ పచ్చడి.. పక్కా కొలతలతో ఇలా చేస్తే రుచి అద్భుతం!

ఉసిరికాయలో విటమిన్ C పుష్కలంగా ఉంటుందన్న విషయం మనందరికీ తెలిసిందే. ఇది కేవలం పండు మాత్రమే కాదు, మన ఆరోగ్యానికి ఒక సంజీవని లాంటి సూపర్ ఫుడ్. ఈ ఉసిరిని కొందరు మురబ్బాగా తింటే, మరికొందరు జ్యూస్ చేసుకుని తాగుతారు. కానీ మన తెలుగు వారికి ఏ కాయ కనిపించినా పచ్చడి చేయాలనిపించడం సహజం. అందులోనూ ఆంధ్ర స్టైల్ ఉసిరికాయ పచ్చడి గురించి ప్రత్యేకంగా చెప్పాల్సిన పనే లేదు.

పుల్లపుల్లగా, కారంకారంగా ఉండే ఈ పచ్చడిని వేడి వేడి అన్నంలో కాస్త నెయ్యి వేసుకుని తింటుంటే.. ఆ మజానే వేరు. మీ రెగ్యులర్ భోజనానికి అదనపు రుచిని జోడించాలనుకుంటే, ఇంట్లోనే చాలా సులభంగా, అప్పటికప్పుడు చేసుకోగలిగే ఉసిరికాయ నిల్వ పచ్చడి ఎలా తయారు చేయాలో ఇక్కడ చూడండి.

కావలసిన పదార్థాలు

ఉసిరికాయలు: 500 గ్రాములు
నువ్వుల నూనె: అర కప్పు,వేయించడానికి మరో 2 టేబుల్ స్పూన్లు
ఆవాలు: 2 టేబుల్ స్పూన్లు
మెంతులు: 1 టేబుల్ స్పూన్
కారం: పావు కప్పు
ఉప్పు: రుచికి తగినంత
పసుపు: అర టీస్పూన్
నిమ్మకాయలు: 2
తాలింపు కోసం:
ఆవాలు, జీలకర్ర: చెరో అర టీస్పూన్
ఎండు మిరపకాయ: 1
ఇంగువ: చిటికెడు
వెల్లుల్లి రెబ్బలు: కొన్ని

గుడిలో ప్రసాదంలా రోజంతా కమ్మగా ఉండే దద్దోజనం..ఎలా చేసుకోవాలంటే..

తయారీ విధానం

-ముందుగా ఉసిరికాయలను శుభ్రంగా కడిగి, ఏమాత్రం తడి లేకుండా ఆరబెట్టాలి. ఒక మందపాటి బాండీలో 2 టేబుల్ స్పూన్ల నువ్వుల నూనె వేడి చేసి, అందులో ఉసిరికాయలను వేయాలి. మీడియం మంటపై 8 నుంచి 10 నిమిషాల పాటు కలుపుతూ వేయించుకోవాలి. కాయలు కొద్దిగా మెత్తబడగానే మంట ఆపేసి పూర్తిగా చల్లారనివ్వాలి. ఆ తర్వాత కాయల్లోని గింజలు తీసేసి చిన్న ముక్కలుగా చేసుకోవాలి.

-ఒక పొడి బాండీలో ఒక టేబుల్ స్పూన్ ఆవాలు, ఒక టేబుల్ స్పూన్ మెంతులు వేసి దోరగా వేయించాలి. కమ్మటి సువాసన రాగానే దించేసి, చల్లారిన తర్వాత మిక్సీలో మెత్తటి పొడిలా పట్టుకోవాలి.

-ఇప్పుడు ఒక శుభ్రమైన, తడి లేని గిన్నెను తీసుకుని.. అందులో కారం, ఉప్పు, పసుపు, ముందుగా దంచి పెట్టుకున్న ఆవ-మెంతి పొడి వేసి బాగా కలపాలి. ఇందులో చల్లారిన ఉసిరి ముక్కలు వేసి, ప్రతి ముక్కకు ఉప్పు, కారం పట్టేలా బాగా మిక్స్ చేయాలి.

-మిగిలిన నువ్వుల నూనెను వేడి చేసి ఆవాలు, జీలకర్ర, ఎండుమిర్చి, వెల్లుల్లి వేయాలి. ఆవాలు చిటపటలాడాక చిటికెడు ఇంగువ వేసి స్టవ్ ఆపేయాలి. ఈ తాలింపు నూనెను పూర్తిగా చల్లారనిచ్చి, ఉసిరి మిశ్రమంలో కలుపుకోవాలి.

-చివరగా పచ్చడిలో ఇంకొంచెం పులుపు ఇష్టపడేవారు నిమ్మరసం కలుపుకోవచ్చు.

-తయారైన ఈ నోరూరించే ఉసిరికాయ పచ్చడిని, తడి లేని పొడి గాజు సీసాలో భద్రపరుచుకోవాలి. తయారు చేసిన వెంటనే కాకుండా, ఒక రెండు రోజుల పాటు మూతపెట్టి పక్కన ఉంచితే.. ఉప్పు, కారం ముక్కలకు బాగా పట్టి రుచి అద్భుతంగా ఉంటుంది.