నోరూరించే దహీ ఇడ్లీ.. ఈ సమ్మర్‌ లో మీ ఫ్యామిలీకి బెస్ట్ బ్రేక్‌ ఫాస్ట్..ఎలా చేసుకోవాలంటే..

సాధారణంగా మన ఇళ్లలో బ్రేక్‌ ఫాస్ట్ అనగానే ముందుగా గుర్తొచ్చేది ఇడ్లీ. ఎప్పుడూ అవే చప్పటి ఇడ్లీలు, రొటీన్ చట్నీలు, సాంబార్‌ తో తినాలంటే కాస్త బోర్ కొట్టడం సహజం. ఎండాకాలంలో వేడి వేడి ఇడ్లీలను తినాలంటే పెద్దలకు కూడా ఏమాత్రం ఆసక్తి ఉండదు. అందుకే మీ రెగ్యులర్ బ్రేక్‌ ఫాస్ట్‌ కు కాస్త భిన్నంగా, చల్లచల్లగా, నోరూరించేలా సూపర్ టేస్టీ దహీ ఇడ్లీ ట్రై చేయండి.

ఈ దహీ ఇడ్లీలు చూడటానికి ఎంత ఆకర్షణీయంగా ఉంటాయో.. రుచిలో కూడా అంతే అద్భుతంగా ఉంటాయి. ఒక్క ముక్క నోట్లో వేసుకుంటే చాలు, అలా వెన్నలా కరిగిపోతాయి. సమ్మర్ స్పెషల్ దహీ ఇడ్లీలను మీ ఇంట్లో ఈజీగా ఎలా చేసుకోవాలో ఇక్కడ చూడండి.

దహీ ఇడ్లీ తయారీకి కావాల్సిన పదార్థాలు

కమ్మటి పెరుగు - ఒక లీటర్
రవ్వ ఇడ్లీలు - 12 (చాలా మెత్తగా ఉండాలి)
పంచదార - రెండు చెంచాలు
ఉప్పు - రుచికి సరిపడా
నూనె - రెండు టేబుల్ స్పూన్లు
ఆవాలు - రెండు టీస్పూన్లు
జీలకర్ర - ఒక టీస్పూన్
ఎండుమిర్చి - 2
పచ్చిమిర్చి - 2 (సన్నగా తరగాలి)
ఇంగువ - నాలుగు చిటికెళ్లు
కరివేపాకు - కొద్దిగా
జీడిపప్పు - కొద్దిగా (గార్నిష్ కోసం)
దానిమ్మ గింజలు - అర కప్పు

దహీ ఇడ్లీ తయారీ విధానం

-ముందుగా ఒక వెడల్పాటి గిన్నెలో లీటర్ పెరుగును తీసుకుని, ఎక్కడా ఉండలు లేకుండా బాగా చిలకాలి. పెరుగు మరీ గట్టిగా, చిక్కగా అనిపిస్తే కొద్దిగా నీళ్లు కలుపుకోవచ్చు. పెరుగు కాస్త జారుడుగా ఉంటేనే బాగుంటుంది. ఇప్పుడు అందులో రుచికి సరిపడా ఉప్పు, రెండు చెంచాల చక్కెర వేసి స్మూత్ క్రీమ్‌ లా మారే వరకు బాగా కలుపుకోవాలి. ఆ తర్వాత ఈ పెరుగు గిన్నెపై మూతపెట్టి కాసేపు ఫ్రిడ్జ్‌ లో ఉంచాలి.

-ఇప్పుడు స్టవ్ వెలిగించి పాన్ పెట్టి అందులో రెండు టేబుల్ స్పూన్ల నూనె వేడి చేశాక అందులో జీడిపప్పులు వేసి దోరగా వేయించి పక్కన పెట్టుకోవాలి. అదే నూనెలో ఆవాలు, జీలకర్ర వేసి చిటపటలాడించాలి. ఆ తర్వాత ఎండుమిర్చి ముక్కలు, కొద్దిగా ఇంగువ, కరివేపాకు వేసి దోరగా వేయించాలి. చివరగా సన్నగా తరిగిన పచ్చిమిర్చి కూడా వేసి సన్నని మంటపై అర నిమిషం పాటు వేయించి స్టవ్ ఆపేయాలి.

-ఇప్పుడు ఒక మిక్సింగ్ బౌల్ తీసుకుని అందులో మెత్తటి రవ్వ ఇడ్లీలను పేర్చాలి. ఒకవేళ ఇడ్లీలు చల్లారిపోయి గట్టిగా ఉంటే, వాటిపై కాస్త నీళ్లు చల్లాలి.

-బౌల్‌ లో ఇడ్లీలు తీసుకున్న తర్వాత ఫ్రిడ్జ్‌ లో ఉంచిన చల్లటి పెరుగు మిశ్రమాన్ని ఇడ్లీలన్నీ పూర్తిగా మునిగిపోయేలా పోయాలి. ఆ తర్వాత దీనిపై ముందుగా సిద్ధం చేసుకున్న తాలింపును సమంగా విస్తరించాలి. చివరగా ఎర్రటి దానిమ్మ గింజలు, ముందుగా వేయించి పెట్టుకున్న జీడిపప్పులతో గార్నిష్ చేసుకోవాలి.

-అంతే సూపర్ టేస్టీ అండ్ కూల్ దహీ ఇడ్లీ రెడీ.