వృద్ధాప్యంలో శృంగారం.. ఈ 5 విషయాలు పాటిస్తే మీ బంధం మరింత మధురం!

శృంగారం,ఉద్వేగభరితమైన ప్రేమ అంటే కేవలం యవ్వనానికే పరిమితం అనే అపోహ మన సమాజంలో బలంగా నాటుకుపోయింది. వయసు పైబడిన తర్వాత మనవళ్లు, మనవరాళ్లతో ఆడుకుంటూ కాలం గడపడమే సహజం అని చాలామంది భావిస్తారు. ఒక వృద్ధ జంట చేయి చేయి పట్టుకుని నడిస్తే చూడముచ్చటగా మురిసిపోతాం, కానీ వారి మధ్య శారీరక సాన్నిహిత్యం ఉందంటే మాత్రం అదో పెద్ద సిగ్గుచేటు వ్యవహారంగా చూస్తాం.

ముడతలు పడిన చర్మం లేదా నెరిసిన జుట్టు ప్రేమకు అడ్డుకావు. మనసులో ఆత్మీయత ఉంటే జీవితపు మలిదశలోనూ శృంగారం ఒక అద్భుత కావ్యంగా మారుతుంది. జీవితపు మలిసంధ్యలో..అనగా 60, 70 ఏళ్ల వయస్సులో కూడా శారీరక సాన్నిహిత్యం అనేది ఒక స్వర్గీయ ఆనందాన్ని ఇస్తుందని, అయితే ఈ ఆనందాన్ని ఆస్వాదించడానికి కొన్ని ముఖ్యమైన విషయాలను దృష్టిలో ఉంచుకోవాలని నిపుణులు సూచిస్తున్నారు.

నెమ్మదిగా, మృదువుగా..
వయసు పెరుగుతున్న కొద్దీ శారీరక కలయికకు ప్రతిస్పందించే వేగం తగ్గుతుంది. మహిళల్లో ఈ ప్రభావం కాస్త ఎక్కువగా ఉంటుంది. కాబట్టి శృంగారం అనేది నెమ్మదిగా ప్రారంభించాలి. ఎక్కువ సమయం ఫోర్‌ ప్లే కోసం కేటాయించడం వల్ల ఉత్సాహం సరైన దిశలో పెరుగుతుంది. అంతేకాకుండా వయసు పైబడిన వారికి రాత్రివేళల్లో కీళ్ల నొప్పులు లేదా ఇతర ఆరోగ్య సమస్యలు ఇబ్బంది పెట్టవచ్చు. అందుకే ఉదయం లేదా మధ్యాహ్నం వేళల్లో ఏకాంతంగా గడపడం బెటర్.

సౌకర్యమే ప్రాధాన్యం
ఈ వయసులో శృంగారానికి వాతావరణం, సౌకర్యం చాలా ముఖ్యం. మీ బెడ్ రూమ్ ప్రశాంతంగా, మంచం అత్యంత సౌకర్యవంతంగా ఉండాలి. అవసరమైన దిండ్లు, ఇతర వస్తువులను అందుబాటులో ఉంచుకోవాలి. శరీరానికి ఎలాంటి శ్రమ, అసౌకర్యం కలగకుండా చూసుకున్నప్పుడే శారీరక సాన్నిహిత్యం పూర్తిగా సంతృప్తికరంగా మారుతుంది.

ఆన్‌ లైన్ ద్వారా గోప్యత
వృద్ధాప్యంలో మహిళలు ఎదుర్కొనే ప్రధాన సమస్య యోని పొడిబారడం. దీనివల్ల కలయిక సమయంలో ఇబ్బంది కలుగుతుంది. దీనిని నివారించడానికి లూబ్రికెంట్స్ వాడటం అత్యుత్తమ మార్గం. అయితే దుకాణాలకు వెళ్లి వీటిని కొనుగోలు చేయడానికి సమాజంలో ఉన్న సిగ్గు, బిడియం అడ్డురావచ్చు. దానికి పరిష్కారంగా ఆన్‌లైన్ షాపింగ్‌ ను ఎంచుకోవడం ఉత్తమం. ఇది మీ గోప్యతను కాపాడుతుంది.

స్పర్శతో కొత్త భాష
యవ్వనంలో ఉన్నంత వేగంగా ఈ వయసులో పురుషులలో అంగస్తంభనలు జరగకపోవచ్చు, అలాగే భాగస్వామి స్పర్శకు వెంటనే ప్రతిస్పందన రాకపోవచ్చు. అందుకే లైంగికతను కొత్త కోణంలో చూడటం నేర్చుకోవాలి. ఒకరినొకరు ఆప్యాయంగా హత్తుకోవడం, మృదువైన స్పర్శలతో మీకంటూ ఒక కొత్త ప్రేమభాషను సృష్టించుకోండి. ఈ కొత్త స్పర్శ మీలోని ఆరిపోయిన అగ్నిని మళ్లీ రగిలిస్తుంది.

ఆత్మవిశ్వాసంతో ముందడుగు
శృంగారంలో విజయం సాధించడానికి ఏ వయసులోనైనా ఆత్మవిశ్వాసం ప్రధాన ఆయుధం. నేను నా భాగస్వామిని ఇంకా సంతోషపెట్టగలను అనే సానుకూల దృక్పథం అరవై, డెబ్బై ఏళ్ల తర్వాత కూడా మిమ్మల్ని మానసికంగా బలంగా ఉంచుతుంది. మీలో నమ్మకం ఉంటే, వయసు అనే అడ్డంకిని సులభంగా జయించవచ్చు.