ముక్కల్లేకుండా బిర్యానీ మజా.. అచ్చం రెస్టారెంట్ స్టైల్ కుష్కా ఇంట్లోనే ఈజీగా ఇలా చేయండి!

బిర్యానీ అనగానే మనకు ముందుగా గుర్తొచ్చేది అందులో ఉండే చికెన్ లేదా మటన్ ముక్కలు. కానీ ఎలాంటి ముక్కలు లేకుండా, అచ్చం రెస్టారెంట్ స్టైల్ లో కమ్మటి రుచితో, మల్లెపూవుల్లా పొడిపొడిగా, ఇల్లంతా గుమగుమలాడే ప్లెయిన్ కుష్కా తింటే ఆ మజాయే వేరు.

సెలవు రోజు మధ్యాహ్నం వేడివేడి కుష్కాను సాల్నా, కుర్మా లేదా చల్లటి రైతాతో కలిపి తింటే భోజనం అద్భుతంగా ఉంటుంది. ఇంట్లోనే చాలా సులభంగా, పక్కా కొలతలతో ఏ మాత్రం రుచి తగ్గకుండా రెస్టారెంట్ స్థాయి కుష్కా ఎలా తయారు చేసుకోవాలో ఇక్కడ చూడండి.

కుష్కా తయారీకి కావలసిన పదార్థాలు

నూనె - 100 మి.లీ
దాల్చిన చెక్క - 1 చిన్న ముక్క
బిర్యానీ ఆకు - 1
యాలకులు - 4
లవంగాలు - 4
సన్నగా తరిగిన ఉల్లిపాయలు - 150 గ్రాములు
అల్లం పేస్ట్ - 50 గ్రాములు
వెల్లుల్లి పేస్ట్ - 50 గ్రాములు
కారం - 1 టీస్పూన్
గరం మసాలా పొడి - అర టీస్పూన్
పుదీనా ఆకులు - అర కట్ట
టమాటా ముక్కలు - 150 గ్రాములు
పెరుగు - 100 మి.లీ
కొత్తిమీర - పావు కట్ట
ఉప్పు - రుచికి సరిపడా
నీళ్లు - 1 లీటరు
జీరక సాంబ బియ్యం - 500 గ్రాములు
నెయ్యి - 50 మి.లీ
నిమ్మరసం - సగం చెక్క

నెల రోజులు పైనే నిల్వ..చికెన్ కారం పొడి ఇలా చేసి పెట్టుకుంటే టిఫిన్స్, అన్నంలోకి అదుర్స్!

కుష్కా తయారీ విధానం

-ముందుగా స్టవ్ వెలిగించి ఒక మందపాటి బిర్యానీ గిన్నెను పెట్టుకుని అందులో నూనె వేడి చేయాలి. నూనె కాస్త వేడెక్కాక దాల్చిన చెక్క, బిర్యానీ ఆకు, యాలకులు, లవంగాలు వేసి కమ్మని సువాసన వచ్చే వరకు వేయించాలి.

-ఇప్పుడు అందులో సన్నగా తరిగిన ఉల్లిపాయ ముక్కలు వేసి, అవి గోధుమ రంగులోకి మారేంత వరకు ఓపికగా దోరగా వేయించుకోవాలి. ఆ తర్వాత అల్లం పేస్ట్, వెల్లుల్లి పేస్ట్ వేసి పచ్చివాసన పోయే వరకు గరిటెతో తిప్పుతూ వేయించాలి.

-ఇప్పుడు మంటను కాస్త తగ్గించి కారం, గరం మసాలా పొడి, పుదీనా ఆకులు, టమాటా ముక్కలు, పెరుగు, కొత్తిమీర తరుగు, రుచికి సరిపడా ఉప్పు వేసి బాగా కలుపుకోవాలి. టమాటాలు పూర్తిగా మెత్తబడే వరకు ఉడికించాలి. ఈ మిశ్రమంలో కచ్చితంగా 1 లీటరు నీళ్లు పోసి మరగనివ్వాలి.

-నీళ్లు తెర్లుతూ బాగా మరుగుతున్నప్పుడు అరగంట పాటు నానబెట్టుకున్న జీరక సాంబ బియ్యాన్ని నీళ్లు వంపేసి అందులో వేసి నెమ్మదిగా కలపాలి.

-బియ్యం సుమారు 90 శాతం ఉడికి, నీరంతా ఇగిరిపోతున్న సమయంలో పైనుంచి కరిగించిన కమ్మటి నెయ్యి వేయాలి. అలాగే నిమ్మరసం పిండి, కొద్దిగా పుదీనా ఆకులు చల్లుకోవాలి.

-ఇప్పుడు ఒక పాత దోశ పెనం స్టవ్ మీద పెట్టి వేడి చేయండి. ఆ వేడి పెనం మీద ఈ కుష్కా గిన్నెను ఉంచి, ఆవిరి బయటకు పోకుండా మూత పెట్టి, మంటను పూర్తిగా సిమ్ లో ఉంచాలి. ఇలా 20 నిమిషాల పాటు దమ్ చేయాలి.

-తర్వాత మూత తీసి చూస్తే రెస్టారెంట్ స్టైల్ కుష్కా రెడీ.