పాలు తక్కువగా ఉన్నప్పుడు.. టీ చిక్కగా, రుచిగా రావాలంటే ఇలా చేయండి!

వర్షం పడుతున్నా, తలనొప్పిగా ఉన్నా, ఉల్లాసంగా ఉన్నా మనకు ముందుగా గుర్తొచ్చేది టీ మాత్రమే. అయితే బ్లాక్ టీ, గ్రీన్ టీ, లెమన్ టీ, హెర్బల్ టీ వంటివి ఎన్ని రకాలు ఉన్నా.. మన భారతీయులకు మాత్రం పాలు పోసి, చిక్కగా కాచిన కమ్మటి ఛాయ్ తాగితేనే అసలైన కిక్ వస్తుంది.

అయితే కొన్నిసార్లు ఇంట్లో పాలు తక్కువగా ఉన్నప్పుడు చుట్టాలు లేదా ఫ్రెండ్స్ అనుకోకుండా వస్తే, అందరికీ ఎలా టీ ఇవ్వాలో అర్థం కాక కంగారు పడుతుంటాం. పాలు తక్కువగా ఉన్నా సరే, ఎంతమంది అతిథులు వచ్చినా, తక్కువ పాలతోనే అందరికీ సరిపోయేలా.. రుచి, చిక్కదనం ఏమాత్రం తగ్గకుండా అద్భుతమైన టీ ఎలా తయారు చేయాలో ఇక్కడ చూడండి.

టీ తయారీకి కావలసిన పదార్థాలు

పాలు - 1 కప్పు
నీళ్లు - 1.5 నుండి 2 కప్పులు
టీ పొడి - 2 టీస్పూన్లు
పంచదార - మీ రుచికి తగినంత
అల్లం - ఒక చిన్న ముక్క
యాలకులు - 2
లవంగం - 1
మిరియాలు - 2 లేదా 3 గింజలు
దాల్చిన చెక్క - చిన్న ముక్క

తక్కువ పాలతో అద్భుతమైన టీ తయారీ విధానం

-ముందుగా ఒక గిన్నెలో నీళ్లు పోసి స్టవ్ మీద పెట్టి వేడి చేయండి. నీళ్లు మరుగుతున్నప్పుడు దంచుకున్న అల్లం, యాలకులు, లవంగం, మిరియాలు, దాల్చిన చెక్క వేయండి. మసాలాల సువాసన, ఘాటు నీటికి పూర్తిగా పట్టేలా సన్నని మంట మీద రెండు, మూడు నిమిషాల పాటు బాగా మరగనివ్వండి.

-ఇప్పుడు ఆ నీటిలో టీ పొడి వేసి, తక్కువ మంట మీద ఒకటి లేదా రెండు నిమిషాలు ఉడికించండి. నీరు ముదురు రంగులోకి మారి సువాసనతో టీ డికాషన్ సిద్ధమవుతుంది. టీ పొడి వేశాక ఎక్కువ మంట మీద ఎక్కువసేపు మరిగిస్తే ఛాయ్ చేదుగా మారి అసలు రుచి పోతుంది, కాబట్టి తక్కువ మంటనే వాడటం ముఖ్యం.

-డికాషన్ రంగు మారిన తర్వాత, మీ రుచికి సరిపడా పంచదార వేసి కరిగేలా బాగా కలపండి. తర్వాత పాలు పోసి, మంటను మీడియంలో ఉంచండి.

-మీరు ఫ్రిజ్‌ లో ఉంచిన చల్లటి పాలు వాడుతున్నట్లయితే, వాటిని కాస్త గది ఉష్ణోగ్రతకు వచ్చాకే టీలో పోయడం మంచిది. పాలు పోశాక మధ్యమధ్యలో గరిటెతో కలుపుతూ టీని బాగా మరగనివ్వండి.

-పాలు, డికాషన్ చక్కగా కలిసి మంచి సువర్ణ రంగులోకి మారుతుంది. అద్భుతమైన సువాసన ఇల్లంతా వ్యాపిస్తున్నప్పుడు స్టవ్ ఆపేయండి. వడకట్టి కప్పుల్లో పోసి వేడివేడిగా వడ్డించండి.

మరింత చిక్కటి టీ కోసం సూపర్ సీక్రెట్ చిట్కా

ఒకవేళ మీ ఇంట్లో పాలు మరీ తక్కువగా ఉండి, ఎక్కువ మందికి టీ పెట్టాల్సి వస్తే లేదా పాలు పల్చగా ఉంటే.. కొద్దిగా మిల్క్ పౌడర్(పాల పొడి) తీసుకుని, దానికి కొంచెం గోరువెచ్చని నీళ్లు లేదా పాలు కలిపి ఉండలు లేకుండా చక్కగా కరిగించండి. ఆ మిశ్రమాన్ని మరుగుతున్న టీలో నెమ్మదిగా కలుపుతూ పోయండి. ఇలా చేయడం వల్ల మీ టీ చిక్కబడటమే కాకుండా, అచ్చం రెస్టారెంట్ లేదా హోటల్ టీ లాంటి కమ్మటి రుచి వస్తుంది