డ్రై ఫ్రూట్ కజ్జికాయలు

Published: Tuesday, June 19, 2012, 12:45 [IST]

స్వీట్స్ అంటే మనందరికీ ఇష్టమే. అయితే కొత్త రుచులు ఆస్వాదించాలంటే సరికొత్త రకాల స్వీట్స్ చేసుకోవాల్సిందే. సాధారణంగా మన ఆహారంలో స్వీట్స్ కి చాలా ప్రాధాన్యం ఉంది. సంతోషం కలిగించే ఏ సందర్భానికైనా నోరు తీపి చేయాల్సిందే. కానీ ప్రతిసారీ షాప్ కి పరుగెత్తాలంటే కష్టమే కాదు. బోలెడంత ఖర్చు కూడా. అందుకే ఓ వెరైటీ స్వీట్ తయారీ విధానం ఇస్తున్నా ప్రయత్నించి చూడండి...వారం, పదిరోజులు నిల్వ ఉండే కజ్జికాయలు ఇంట్లో అందరూ ఇష్టపడతారు. కజ్జికాయలంటే సాధారణంగా అందరికీ శెనగపిండి, కొబ్బరితో చేసుకునేవే గుర్తువస్తాయి. కొందరు పాలకోవాతో, మరికొందరు పిస్తా పప్పుతో కూడా కజ్జికాయలు చేసుకుంటారు. అయితే ఇక్కడ అన్నీ డ్రైఫ్రూట్స్ తో కలిపి ఎలా చేయాలో చూద్దాం...

కావల్సిన పదార్థాలు:
మైదా: 4cups
బాదం: 100grms
జీడిపప్పు: 100grms
పిస్తా: 100grms
వేరు సెనగలు: 100grms
యాలకుల పొడి: 1tsp
బెల్లం: 2cups
నూనె: వేయించడానికి సరిపడా
వంటసోడా: చిటికెడు
కొబ్బరి తురుము: 1cup

తయారు చేయు విధానం:
1. ముందుగా గిన్నెలో మైదాపిండి రెండు కప్పులు తీసుకొని అందులో వంటసోడా, కాసిని నీళ్లు కలిపి చపాతీ పిండిలా కలుపుకోవాలి.
2. అరగంట తర్వాత చిన్నచిన్న ఉండలుగా చేసి చపాతీలా ఒత్తుకొని పక్కన పెట్టుకోవాలి.
3. ఇప్పుడు బాదం, జీడిపప్పు, పిస్తా, వేరుసెనగలను పొడి చేసి పెట్టుకోవాలి. అందులో యాలకులపొడి, కొబ్బరి తురుము, బెల్లంతురుము కలిపి మిక్సీలో వేసి మళ్లీ పట్టుకోవాలి. 4. తర్వాత ఈ మిశ్రమాన్ని చపాతీలో ఉంచి.. కజ్జికాయ ఆకారంలో ఒత్తుకోవాలి.
5. ఇప్పుడు ఫ్రైయింగ్ పాన్ లో నూనె పోసి వేడయ్యాక అందులో తయారు చేసి పెట్టుకొన్నకజ్జికాయలను వేసి దోరగా వేయించుకోవాలి. అంతే డ్రై ఫ్రూట్ కజ్జికాయలు రెడీ...