డ్రై ఫ్రూట్స్ కేసరి-స్వీట్ డిష్

కేసరి ఒక స్వీట్ డిష్. కేసరిని వివిధ రకాల పదార్థాలతో వివిధ స్టైల్స్ తో తయారుచేస్తారు. రవ్వతో, బియ్యం, సేమియాలతో తయారుచేస్తారు. కేసరి ఎక్కువగా ఫెస్టివల్స్ సీజన్ లో ఎక్కువగా తయారుచేస్తుంటారు. స్వీట్ డిష్ లలో ఇది ఒక సులభమైన స్వీట్ డిష్.

డ్రైఫ్రూట్ ను ఉపయోగించి కేసరిని తయారుచేయడం వల్ల హెల్తీ మరియు టేస్టీ కూడా. ఈ హెల్తీ అండ్ టేస్టీ కేసరి రుచికి తగ్గట్లే, మంచి కలర్ మరియు మంచి ఫ్లేవర్ కలిగి ఉంటుంది. మరి ఈ నోరూరించే డ్రై ఫ్రూట్ కేసరి ఎలా తయారుచేయాలో చూద్దాం...

తయారుచేయు విధానం:
1. ఫ్రైయింగ్ పాన్ లో కొద్దిగా నెయ్యి వేసి డ్రై ఫ్రూట్స్ అన్నింటిని రెండు మూడు నిముషాలు తక్కువ మంట మీద వేయించుకోవాలి. తర్వాత వీటిని పక్కకు తీసుకొని చల్లారనివ్వాలి.
2. తర్వాత బియ్యంను శుభ్రంగా కడిగి, పాన్ లో వేసి, కొద్దిగా నెయ్యి వేసి రెండు, మూడు నిముషాలు వేయించుకోవాలి. కలియబెడుతూ వేయించడం వల్ల బియ్యం బ్రౌన్ కలర్ కు మారకుండా ఉంటాయి.
3. ఇప్పుడు అందులో సరిపడా నీళ్ళు పోసి, మెత్తగా ఉడికించుకోవాలి. మద్యమద్యలో కలియబెడుతుండాలి. బియ్యం మెత్తగా ఉడికిన తర్వాత గంజిని వంపేసి పక్కన పెట్టుకోవాలి.
4. ఇప్పుడు ఒక బౌల్లో తీసుకొని అందులో పాలు, కుంకుమ పువ్వు వేసి 10నిముషాలు నాననివ్వాలి. అలాగే మీరు ఫుడ్ కలర్ కూడా ఉపయోగించాలనుకుంటే, దాన్ని కూడా వేసి మిక్స్ చేసి పక్కన పెట్టుకోవాలి.
5. తర్వాత డీప్ బాటమ్ పాన్ లో కొద్దిగా నెయ్యి వేసి ముందుగా వేయించు పెట్టుకొన్న డ్రై ఫ్రూట్స్ మరియు అన్నం వేసి , బాగా మిక్స్ చేయాలి. అన్నంకు నెయ్యి బాగా పట్టే వరకూ మిక్స్ చేస్తూ వేయించుకోవాలి. ఇప్పుడు కుంకుమ పువ్వు నానబెట్టుకొన్న పాలను అందులో వేసి బాగా మిక్స్ చేయాలి.
6. అలాగే పంచదార కూడా వేసి బాగా బాగా మిక్స్ చేసి రెండు మూడు నిముషాలు ఉడికించుకోవాలి. పంచాదర పూర్తిగా కరిగిపోయే వరకూ ఉడికించుకోవాలి. స్టౌ ఆఫ్ చేసి క్రిందికి దింపుకొనే ముందు యాలకుల పొడి చల్లి క్రిందికి దింపుకోవాలి. అంతే డ్రై ఫ్రూట్ కేసరి రెడీ...