నోరూరించే టమాటా జీడిపప్పు కూర!

By B N Sharma

Published: Tuesday, October 18, 2011, 14:47 [IST]

ఉల్లిపాయ, వెల్లుల్లి లేకుండా ఘుమఘుమలాడే టమాటా జీడిప్పు కూర ఈ దీపావళికి ఎలా చేయాలో తెలుసుకోండి. సాధారణంగా పండుగలలో చేసుకునే వంటకాల్లో వెల్లుల్లి, ఉల్లి వాడరు కనుక అవి రెండూ లేకుండానే నోరూరించే ఈ కూరను మీతో తయారు చేయించాలని ఆసక్తిగా దీనిని ఇస్తున్నాం. టొమాటో జీడిపప్పు కూర సాధారణమైన సాంబార్ పౌడర్ తో చేసేయవచ్చు. లేదంటే, చెట్టినాడు మసాలు లేదా ఇటాలియన్ మసాలాలతో కూడా చేయొచ్చు. దీనికి కావలసిన వస్తువులన్ని ఇంట్లోనే వుంటాయి. ఈ కూర ఏ ఐటమ్ తోనైనా సరే కలిపి తినేయవచ్చు. అంటే అన్నం, రోటి, అప్పం లేదా ఆఖరుకు బ్రెడ్ అయినా సరే పక్కన ఇది వుందంటే ఆనందంగా లాగించేయవచ్చు.

టమాటా కర్రీకి అవసరమైన పదార్ధాలు -
అర కేజి తరిగిన టమాటాలు
2 స్పూన్ల అల్లం పేస్టు
కాసిన యాలుకలు
కొంచెం దాల్చిన చెక్క
1 లవంగం
1 కప్పు జీడిపప్పు
అర కప్పు కొబ్బరి
1 స్పూను గరంమసాలా
1 స్పూను మిరపపొడి
కొద్దిగా పంచదార
రుచికి తగిన ఉప్పు
1 స్పూను ఆవాలు
1 స్పూను జీలకర్ర
2 స్పూన్లు నూనె

1. కొన్ని టమాటాలు మసాలాకు వాడండి. టమాటాలు, జింజర్ పేస్ట్, యాలకులు, దాల్చిన చెక్క, లవంగాలు, జీడిపప్పు, కొబ్బరి అన్ని గ్రైండర్ లో వేసి ముద్దగా చేయండి.
2. పెనం వేడి చేయండి. దానిపై ఒక స్పూను నూనె వేయండి. నూనె వేడెక్కిన తర్వాత ఆవాలు, జీలకర్ర దానిలో వేయండి.
3. ఇవి వేగిన తర్వాత, ఇప్పటికే నలిపి సిద్ధంగా వుంచిన ముద్దను, పంచదార, ఉప్పు అన్నికలిపి బాగా వేగే వరకు వుంచండి.
4. బాగా ఉడికిన కూరకు గరం మసాలా, మిరపపొడి కలపండి. దీనికి టమాటాలు, జీడిపప్పు కలపండి తరిగిన టమాటాలు మెత్తపడే వరకు ఉడికించండి. అంతే...రుచికరమైన కూర తినటానికి రెడీ!