అందరూ మిమ్మల్నే ఇష్టపడాలా? మిమ్మల్ని ప్రత్యేకంగా నిలబెట్టే సైకలాజికల్ సీక్రెట్స్!

మీరు ఉన్నచోట వెలుగు నింపాలని, పది మందిలో ప్రత్యేకంగా గుర్తింపు పొందాలని అనుకుంటున్నారా? అందరికీ నచ్చడం అనేది ఒక మాయ లేదా పుట్టుకతో వచ్చే వరం కాదు, అదొక సైకాలజీ. ఒక వ్యక్తిని చూసిన కొన్ని మిల్లీసెకన్లలోనే ,మన మెదడు వారిపై ఒక అభిప్రాయాన్ని ఏర్పరుచుకుంటుంది.

ఆత్మీయత, నిజాయితీ ఉంటే ఎవరి మనసునైనా సులభంగా గెలుచుకోవచ్చు. కుటుంబ సభ్యులైనా, ఆఫీసులో సహోద్యోగులైనా.. అద్భుతమైన బంధాలను ఏర్పరచుకోవడానికి కొన్ని సైకాలజీ ఆధారిత చిట్కాలు ఇక్కడ చూడండి.

సంభాషణల్లో ఆసక్తిని కనబరచండి
ఎదుటి వారితో మాట్లాడుతున్నప్పుడు అవునా?, తర్వాత ఏమైంది? వంటి ప్రశ్నలు అడగండి. ఇది వారు చెప్పేదానిపై మీకు ఎంత ఆసక్తి ఉందో తెలియజేస్తుంది. మీరు మాట్లాడే దానికంటే ఎక్కువగా వినడానికి ప్రాధాన్యత ఇవ్వండి. జిజ్ఞాస ఉన్న వ్యక్తులను సమాజం ఎప్పుడూ ఇష్టపడుతుంది.

పేరు పెట్టి పిలవండి
ప్రపంచంలో ఏ వ్యక్తికైనా అత్యంత మధురమైన శబ్దం తన పేరే. ఎవరినైనా పలకరించేటప్పుడు వారి పేరును వాడటం వల్ల వారి మెదడులోని రివార్డ్ సిస్టమ్ ఉత్తేజితమై మీపై ఆప్యాయత పెరుగుతుంది. ఉదాహరణకు, నమస్కారం వెంకయ్య గారూ, మిమ్మల్ని కలవడం ఆనందంగా ఉంది అని చిరునవ్వుతో పలకరించి చూడండి. భారతీయ సంస్కృతిలో గౌరవంతో కూడిన ఆప్యాయతను జనాలు ఎక్కువగా ఇష్టపడతారు.

మనస్ఫూర్తిగా నవ్వండి
మీరు పలకరించే తీరులోని చిరునవ్వు అవతలి వారిని ఇట్టే ఆకర్షిస్తుంది. మీ నవ్వు కళ్ళ వరకు చేరినప్పుడు (నిజమైన చిరునవ్వు) మెదడులో ఆక్సిటోసిన్‌ అనే హార్మోన్‌ విడుదలై, తక్షణమే ఒక ఆత్మీయ బంధం ఏర్పడుతుంది. అయితే నకిలీ నవ్వులను జనాలు ఇట్టే పసిగట్టేస్తారు. కాబట్టి మీ నవ్వు ఎప్పుడూ సహజంగా, హృదయపూర్వకంగా ఉండాలి.

అడ్డుకోకుండా.. శ్రద్ధగా వినండి
మంచి వక్త కంటే, మంచి శ్రోతకే సమాజంలో ఎక్కువ గుర్తింపు ఉంటుంది. సంభాషణల్లో మీ గురించే గొప్పలు చెప్పుకోవడం కంటే ఎదుటివారు చెప్పేది శ్రద్ధగా వినండి. వారి కళ్లలోకి చూస్తూ, వారి మాటలకు తలూపుతూ ఉండండి. వారు మాట్లాడుతున్నప్పుడు మధ్యలో అడ్డుకోకండి. ఇది ఎదుటివారికి మీరు ఇచ్చే అతిపెద్ద గౌరవం.

హృదయపూర్వకంగా ప్రశంసించండి
డోపమైన్ అనే సంతోషకరమైన హార్మోన్‌ ను విడుదల చేయడంలో ప్రశంసలు అద్భుతంగా పనిచేస్తాయి. అయితే పొగడ్తలు అస్పష్టంగా, కృత్రిమంగా కాకుండా నిర్దిష్టంగా ఉండాలి.

ఈ రోజు మీరు వేసుకున్న డ్రెస్ రంగు చాలా బాగుంది లేదా ఆ మీటింగ్‌లో మీరు మాట్లాడిన తీరు అద్భుతం అని మనస్ఫూర్తిగా అభినందించండి. పరోక్ష లేదా వ్యంగ్య పొగడ్తలకు దూరంగా ఉండండి.

మీ చిన్న లోపాలను పంచుకోండి
మనం ఎప్పుడూ పర్ఫెక్ట్ అనిపించుకోవాలని ప్రయత్నించడం కంటే మన చిన్న చిన్న లోపాలను లేదా వైఫల్యాలను ఇతరులతో పంచుకోవడం వల్ల బంధాలు బలపడతాయి. నేను కూడా మొదటిసారి ఈ పనిలో ఇబ్బంది పడ్డాను లాంటి మాటలు మిమ్మల్ని వారికి మరింత చేరువ చేస్తాయి. ఇది మీలోని సహజత్వాన్ని చూపిస్తుంది.

కృతజ్ఞత చూపండి
ప్రతిఫలం ఆశించకుండా చేసే చిన్న సహాయం కూడా ఇతరుల మనసులో చెరగని ముద్ర వేస్తుంది. నేను ఏమైనా సాయం చేయగలనా? అని అడగడం ఆత్మీయతను పెంచుతుంది. అలాగే ఎవరైనా చిన్న సాయం చేసినా చాలా థాంక్స్ అని చెప్పడం అలవాటు చేసుకోండి.

పాజిటివ్ బాడీ లాంగ్వేజ్
మీ మాటల కంటే మీ శరీర భాషే ఎక్కువగా మాట్లాడుతుంది. చేతులు కట్టుకుని బిగుసుకుపోయి ఉండటం కంటే, కొద్దిగా ముందుకు వంగి ఆత్మీయంగా మాట్లాడటం నమ్మకాన్ని పెంచుతుంది. అలాగే ఎదుటి వ్యక్తి మాటల శైలికి, ఎనర్జీకి తగ్గట్టుగా మన ప్రవర్తనను కొద్దిగా మార్చుకోవడం వల్ల అనుబంధం 67 శాతం మెరుగుపడుతుందని అధ్యయనాలు చెబుతున్నాయి.