జిడ్డు చర్మానికి గుడ్‌ బై..వేసవిలో మెరిసే చర్మం కోసం 5 టిప్స్..హాయ్ హ్యాండ్సమ్ అనాల్సిందే

ఎండాకాలంలో అధిక వేడితో పాటుగా మరికొన్ని సమస్యలను కూడా తీసుకొస్తుంది. జిడ్డే చర్మం ఉన్నోళ్లు ఈ సీజన్ లో అనేక ఇబ్బందులు ఎదుర్కొంటారు. పెరిగిన ఉష్ణోగ్రతలు, అధిక చెమట కారణంగా ముఖ చర్మంపై నూనె గ్రంథులు మరింత చురుగ్గా పనిచేస్తాయి. ఫలితంగా అదనపు నూనె చర్మంపై పేరుకుపోయి ముఖం జిగటగా, నిర్జీవంగా కనిపిస్తుంది. ఇది మాత్రమే కాకుండా మొటిమలు, బ్లాక్ హెడ్స్, వైట్ హెడ్స్ వంటి చర్మ సమస్యలు కూడా ఈ కాలంలో అధికంగా వేధిస్తాయి. ఇలాంటి పరిస్థితుల్లో మన చర్మాన్ని జాగ్రత్తగా కాపాడుకోవడం అత్యవసరం. వేసవి తాపానికి మీ చర్మం బలికాకుండా రోజంతా ఫ్రెష్ గా, కాంతివంతంగా మెరిసిపోవాలంటే ఏం చేయాలో ఇక్కడ చూడండి.

తేలికపాటి ఫేస్ వాష్‌ తో క్లీన్
వేసవిలో మీ ముఖాన్ని రోజుకు కనీసం రెండు మూడు సార్లు కఠినమైన రసాయనాలు లేని, తేలికపాటి ఫేస్ వాష్‌ తో శుభ్రం చేసుకోవడం చాలా ముఖ్యం. ఇది చర్మం పొడిబారకుండా కాపాడుతూనే ముఖంపై పేరుకుపోయిన అదనపు నూనె, దుమ్ముధూళి, మలినాలను సమర్థవంతంగా తొలగిస్తుంది. సబ్బు ఆధారిత ఫేస్ వాష్‌ లకు బదులుగా జెల్ లేదా ఫోమ్ ఆధారిత క్లెన్సర్‌లను ఎంచుకోవడం ఉత్తమం. ముఖ్యంగా సాలిసిలిక్ యాసిడ్ లేదా వేప, తులసి వంటి సహజ పదార్థాలు కలిగిన ఫేస్ వాష్‌ లు జిడ్డు చర్మానికి అదనపు ప్రయోజనాలను అందిస్తాయి. ఇవి చర్మ రంధ్రాలను శుభ్రపరిచి, మొటిమలు రాకుండా నివారిస్తాయి.

రోజ్ వాటర్, నిమ్మకాయతో సహజ టోనర్
జిడ్డు చర్మం సమస్యను అధిగమించడానికి ఇంట్లోనే ఒక సహజసిద్ధమైన టోనర్‌ను తయారు చేసుకోవచ్చు. ఒక టీస్పూన్ స్వచ్ఛమైన రోజ్ వాటర్‌లో నాలుగైదు చుక్కల తాజా నిమ్మరసం కలపండి. ఈ మిశ్రమాన్ని ఒక దూది ఉండ సహాయంతో ముఖం, మెడపై నెమ్మదిగా అప్లై చేయండి. రోజ్ వాటర్ చర్మానికి చల్లదనాన్ని అందించి ఉపశమనం కలిగిస్తే, నిమ్మరసంలోని ఆమ్ల గుణాలు అదనపు నూనెను నియంత్రించి చర్మాన్ని ఫ్రెష్ గా, ప్రకాశవంతంగా ఉంచుతాయి. అయితే నిమ్మరసం పడని వారు దీనిని వాడకపోవడం మంచిది లేదా బాగా పలుచన చేసి వాడాలి.

నూనె రహిత, జెల్ ఆధారిత మాయిశ్చరైజర్
చాలా మంది జిడ్డు చర్మం ఉన్నవారు మాయిశ్చరైజర్ వాడటానికి వెనుకాడతారు.. దీనికి కారణం ఏంటంటే అది చర్మాన్ని మరింత జిడ్డుగా మారుస్తుందని అపోహ పడతారు. వాస్తవానికి ప్రతి చర్మ రకానికి హైడ్రేషన్ చాలా అవసరం. హైడ్రేషన్ లేకపోవడం వల్ల చర్మం పొడిబారి మరింత ఆయిల్ ని ఉత్పత్తి చేస్తుంది. కాబట్టి ఆయిల్ లేని, నీటి ఆధారిత లేదా జెల్ ఆధారిత మాయిశ్చరైజర్‌ను ఎంచుకోండి.

ముల్తానీ మట్టితో అదనపు ఆయిల్ కి చెక్
ముల్తానీ మట్టి.. జిడ్డు చర్మం ఉన్నవారికి ఒక వరం లాంటిది. ఇది చర్మం నుండి అదనపు ఆయిల్ ని సమర్థవంతంగా పీల్చుకుంటుంది,రంధ్రాలను లోతుగా శుభ్రపరుస్తుంది. చర్మాన్ని బిగుతుగా చేస్తుంది. వారానికి ఒకటి లేదా రెండు సార్లు ముల్తానీ మట్టి ఫేస్ ప్యాక్ వేసుకోవడం ద్వారా మీ చర్మం జిడ్డు లేకుండా ఫ్రెష్ గా ఉంటుంది. ముల్తానీ మట్టిని రోజ్ వాటర్ లేదా సాదా నీటితో కలిపి పేస్ట్ లా చేసి ముఖానికి పట్టించి ఆరిన తర్వాత గోరువెచ్చని నీటితో కడిగేయండి. ఇది చర్మానికి తక్షణ తాజాదనాన్ని అందిస్తుంది.

కలబంద జెల్‌ తో
కలబంద లేదా అలోవెరా జెల్ ఒక అద్భుతమైన సహజ చర్మ సంరక్షణి. ఇది చర్మానికి చల్లదనాన్ని అందించి, తేమను సమతుల్యం చేస్తుంది, చికాకును తగ్గిస్తుంది. ఇందులో ఉండే యాంటీ ఇన్‌ఫ్లమేటరీ గుణాలు వేసవిలో వచ్చే ఎరుపుదనం, దురద, సన్ బర్న్ నుండి ఉపశమనం కలిగిస్తాయి. ప్రతిరోజూ రాత్రి నిద్రపోయే ముందు శుభ్రమైన ముఖంపై తాజా కలబంద జెల్ యొక్క పలుచని పొరను రాయండి. కొన్ని రోజుల్లోనే మీరు మీ చర్మంలో స్పష్టమైన తేడాను గమనిస్తారు. ఈ చిట్కాలతో పాటు వేసవిలో పుష్కలంగా నీరు త్రాగడం, పండ్లు, కూరగాయలు ఎక్కువగా తీసుకోవడం, ఎండలోకి వెళ్లేటప్పుడు సన్‌స్క్రీన్ తప్పనిసరిగా వాడటం వంటివి కూడా మీ చర్మాన్ని ఆరోగ్యంగా, కాంతివంతంగా ఉంచడంలో సహాయపడతాయి.