చికెన్ తింటే....గుండె పనితీరు ఎక్స్ లెంట్!

న్యూయార్క్ యూనివర్శిటీ లాంగోన్ మెడికల్ సెంటర్ లోని పరిశోధకులు కోడిమాంసం అంటే చికెన్ పై నిరంతర పరిశోధనలు చేశారు. చివరకు గుండె వ్యాధులైన కరోనరీ హార్ట్ డిసీజ్ నుండి రక్షణ పొందాలంటే కోడి మాంసం లోని పోషకాలు అద్భుతంగా పని చేస్తాయని కనిపెట్టారు. ఈ పరిశోధనా అంశాన్ని యూరోపియన్ జర్నల్ ఆఫ్ న్యూట్రిషన్ ప్రచురించింది. కోడి మాంసంలో ఎంతో ప్యూర్ విటమిన్లు వున్నాయని, అంతేకాదు టర్కీ కోడిలోకూడా అమోఘమైన పోషాలున్నాయని వీటిలోని పోషకాలు చేప, షెల్ ఫిష్ వంటి వాటికంటే కూడా బలవర్ధకమైనవని తేల్చారు.

అధిక కొల్లెస్టరాల్ స్ధాయి వున్న యువతులు కోడి మాంసాన్ని నిరంతరంగా తింటూ వుంటే వారి రక్తంలోని కొల్లెస్టరాల్ స్ధాయి ఆశించిన దానికంటే కూడా బాగా తగ్గిందట. అయితే, తక్కువ కొల్లెస్టరాల్ వున్న వారికి మాత్రం వీటి ప్రభావం లేదన్నారు. అయితే, ఈ కోడి మాంసం ప్రభావం యువకులకంటే కూడా యువతులపై అధికంగా వుందని న్యూయార్క్ యూనివర్శిటీ కాలేజ్ ఆఫ్ డ్రగ్స్ నుండి రీసెర్చర్ యూ కెన్ తెలిపారు.

కరోనరీ గుండె జబ్బును కరోనరీ ఆర్టరీ వ్యాధి అని కూడా అంటారు. ఈ వ్యాధి రక్తనాళాలలో అడ్డంకులు ఏర్పడి గుండెకు పోయే రక్తాన్ని నిలుపుతుంది. ఈ వ్యాధి సరైన ఆహారాలు తినకపోతే మరింత వేగంగా విస్తరిస్తుంది. రీసెర్చర్లు తమ పరిశోధనను షుమారు 14,000 మంది మహిళలపై చేశారు. వీరి వయసులు 34 నుండి 65 సంవత్సరాలవరకు వున్నాయి. పరిశోధనలు సుమారుగా 1985 నుండి 1991 వరకు న్యూయార్క్ సిటీ లోని బ్రెస్ట్ కేన్సర్ స్క్రీనింగ్ సెంటర్ లో సాగాయి.

ఈ రీసెర్చిలో పరిశోధకులు కొల్లెస్టరాలు అధికంగా వున్న యువతులకు మాత్రమే కోడి ఉత్పత్తులను ఇచ్చారు. వారిలో షుమారు 60 శాతం వరకు ప్రయోజనాలను పొందినట్లు తెలిపారు. వివిధ రకాలుగా చేస్తున్న తమ పరిశోధనలు నిర్ధారించబడితే అధిక కొలెస్టరాల్ వున్న వ్యక్తులు ఇకపై కోడి మాంసాన్ని నిరాటంకంగా తినేయవచ్చని పరిశోధకుడు యూ కెన్ వెల్లడించారు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.