మీరు ఎంత కాలం బతుకుతారో..30 సెకన్ల ఈ కుర్చీ టెస్ట్ తో తెలుసుకోవచ్చు!

దీర్ఘకాలం పాటు ఆరోగ్యంగా జీవించాలని ఎవరికి ఉండదు? దీనికోసం మనం మంచి ఫుడ్, ఎక్సర్ సైజ్, తగినంత నిద్ర, రెగ్యులర్ హెల్త్ చెకప్‌ ల మీద ఎక్కువగా దృష్టి పెడతాం. కానీ మీరు ఎంత ఫిట్ గా ఉన్నారు? మీ ఆయుర్దాయం ఎంత? అనే విషయాలను కేవలం 30 సెకన్ల ఒక చిన్న పరీక్షతో తెలుసుకోవచ్చని తాజా పరిశోధనలు చెబుతున్నాయి. అదే చైర్ స్టాండ్ టెస్ట్ (Chair Stand Test). ఇది వినడానికి చాలా ఆశ్చర్యంగా ఉన్నా, వైద్యశాస్త్రం చెబుతున్న వాస్తవం.

అధ్యయనాలు ఏం చెబుతున్నాయి?
అమెరికాలోని బఫెలో యూనివర్శిటీ పరిశోధకులు 63-99 ఏళ్ల మధ్య వయసున్న దాదాపు 5000 మంది మహిళలపై ఒక అధ్యయనం చేశారు. ఇందులో ఒక ఆసక్తికరమైన విషయం బయటపడింది. ఎవరైతే కుర్చీలోంచి వేగంగా, పదేపదే లేచి కూర్చోగలిగారో, వారిలో రాబోయే ఎనిమిదేళ్లలో మరణించే ప్రమాదం చాలా తక్కువగా ఉన్నట్లు తేలింది.

గ్రిప్ స్ట్రెంగ్త్ (చేతి పట్టు) బలంగా ఉన్నవారిలో మరణాల ముప్పు 12 శాతం వరకు తగ్గినట్లు గుర్తించారు. దీన్ని బట్టి కండరాల బలం అనేది కేవలం బాడీబిల్డర్లకు మాత్రమే కాదు, సామాన్యుల ఆరోగ్యానికి ఒక ముఖ్యమైన సూచిక అని స్పష్టమైంది.

భారతీయులకు ఇది ఎందుకు ముఖ్యం?
వయసు పెరిగే కొద్దీ కండరాల బలం తగ్గడం సహజం. దీనివల్ల బ్యాలెన్స్ తప్పి కింద పడిపోవడం, ఎముకలు విరగడం, ఇతరులపై ఆధారపడాల్సిన పరిస్థితి వస్తుంది. భారతదేశంలోని పట్టణ, గ్రామీణ ప్రాంతాల్లో లక్షలాది మంది వృద్ధ మహిళలు ఒంటరిగా, స్వతంత్రంగా జీవిస్తున్నారు. వారు తమ దైనందిన పనులు ఎలాంటి ఆటంకం లేకుండా చేసుకోవాలంటే శారీరక బలం చాలా కీలకం.

ఈ 30 సెకన్ల పరీక్ష ఎలా చేయాలి?

ఒక సాధారణ కుర్చీలో నిటారుగా కూర్చోండి. వెనక్కి ఆనుకోవద్దు.
మీ రెండు చేతులను ఛాతీకి అడ్డంగా (క్రాస్‌ గా) పెట్టుకోండి.
ఇప్పుడు కుర్చీలోంచి పూర్తిగా లేచి నిలబడి, మళ్లీ కూర్చోండి. (చేతుల సహాయం తీసుకోకూడదు).
ఇలా 30 సెకన్ల పాటు మీరు ఎన్నిసార్లు సురక్షితంగా లేచి కూర్చోగలరో లెక్కించండి.

ఈ పరీక్ష మీ కండరాల బలాన్ని, బ్యాలెన్స్‌ ని, మీ శరీర ఓర్పును అంచనా వేస్తుంది. ఈ 30 సెకన్ల పరీక్ష మీరు ఎన్ని సంవత్సరాలు బతుకుతారో కచ్చితంగా చెప్పే మ్యాజిక్ కాదు. కానీ మీ శారీరక ఆరోగ్యం క్షీణిస్తుందేమో అని చెప్పే ఒక అలారం లాంటిది.

కండరాల బలం ఎందుకు అవసరం?

బ్రిటిష్ జర్నల్ ఆఫ్ స్పోర్ట్స్ మెడిసిన్ ప్రకారం.. కండరాలు బలంగా ఉంటే గుండె జబ్బులు, షుగర్, శ్వాసకోశ వ్యాధులు, కొన్ని రకాల క్యాన్సర్ల ముప్పు కూడా తగ్గుతుంది. కండరాల పరిమాణం కంటే, వాటి శక్తి వయసుతో పాటు వేగంగా తగ్గిపోతుంది కాబట్టి, ముందస్తుగా ఈ పరీక్ష ద్వారా మన శరీరం ఎలా ఉందో తెలుసుకోవచ్చు.

ఎవరు జాగ్రత్త పడాలి?
ఈ పరీక్ష అందరికీ సురక్షితమే. అయితే కీళ్ల నొప్పులు, బ్యాలెన్స్ తప్పే సమస్యలు, మోకాళ్ల నొప్పులు ఉన్నవారు, లేదా ఇటీవలే ఆపరేషన్ జరిగిన వారు డాక్టర్‌ను సంప్రదించాకే దీన్ని ప్రయత్నించాలి. 40 ఏళ్లు పైబడిన వారు ఇది చేసేటప్పుడు మద్దతు కోసం పక్కన ఎవరైనా ఉండటం మంచిది.

వయసుతో పాటే బలం పెరగాలంటే?
కండరాల బలం కోసం కఠినమైన వర్కవుట్స్ చేయాల్సిన పనిలేదు. ప్రతిరోజూ క్రమం తప్పకుండా నడవడం, యోగా, తేలికపాటి వ్యాయామాలు, స్క్వాట్స్ చేయడం అలవాటు చేసుకోవాలి. అలాగే ఆహారంలో ప్రోటీన్ ఎక్కువగా ఉండేలా చూసుకోవాలి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.