జిమ్ వద్దు, కఠిన డైట్ వద్దు..3 నెలల్లో 12 కిలోలు తగ్గిన డాక్టర్ సీక్రెట్ ఇదే!

బరువు తగ్గడం అనగానే మనకు కఠినమైన డైట్ ప్లాన్స్, జిమ్‌ లో చెమటోడ్చడం, క్యాలరీలను లెక్కపెట్టుకోవడం వంటివే గుర్తొస్తాయి. ఖరీదైన ప్రోటీన్ షేక్‌ లు తాగకుండా, కఠినమైన వ్యాయామాలు చేయకుండా బరువు తగ్గడం సాధ్యమేనా?పూణేకు చెందిన డాక్టర్ మల్హర్ గాన్లా తన నిజ జీవిత అనుభవంతో ఇది సాధ్యమే అని నిరూపించారు. కేవలం మూడు నెలల వ్యవధిలో ఆయన ఏకంగా 12 కిలోల బరువు తగ్గారు. ఆయన బరువు తగ్గిన ప్రయాణంలోని దశలు ఎలా ఉన్నాయో ఇక్కడ చూడండి.

బ్లడ్ టెస్ట్ - మూలాలను గుర్తించడం

డాక్టర్ గాన్లా గుడ్డిగా డైట్ మొదలుపెట్టలేదు. ముందుగా రక్త పరీక్ష చేయించుకున్నారు. అందులో ఆయన ఫాస్టింగ్ ఇన్సులిన్ చాలా ఎక్కువగా ఉందని, అలాగే విటమిన్ B12, D3 లెవల్స్ దారుణంగా పడిపోయాయని గుర్తించారు. మనిషికి ఎందుకు పదే పదే ఏదైనా తినాలనిపిస్తుందో, ఎందుకు నీరసంగా ఉంటుందో ఈ రిపోర్టుల ద్వారా ఆయనకు అర్థమైంది. వెంటనే డాక్టర్ల పర్యవేక్షణలో సప్లిమెంట్లు, స్మూతీలు, సలాడ్లు తీసుకుంటూ ముందుగా శరీరంలోని పోషకాల లోపాన్ని సరిదిద్దారు.

జంక్ ఫుడ్‌ కు నెమ్మదిగా గుడ్ బై

శరీరానికి కావాల్సిన పోషకాలు అందడం మొదలయ్యాక ఆయన నెమ్మదిగా ఉప్పు, చక్కెర, నూనె వాడకాన్ని తగ్గించారు. రాత్రికి రాత్రే అన్నింటినీ మానేయలేదు. క్రమక్రమంగా బయటి ఆహారం మీద ఇష్టం పోయేలా చేసుకున్నారు. దీనికి ఆయనకు సుమారు ఒక నెల సమయం పట్టింది.

అద్భుతమైన 23-1 ఫార్ములా
ఆ తర్వాత ఆయన కార్బోహైడ్రేట్లకు (పిండి పదార్థాలు) బ్రేక్ వేశారు. రోజులో కేవలం ఒక పూట (రాత్రి భోజనంలో) మాత్రమే వాటిని తీసుకున్నారు. ఉదయం..ప్రోటీన్ అధికంగా ఉండే గుడ్లు తీసుకున్నారు. మధ్యాహ్నం..పప్పు, కూర, సలాడ్ (అన్నం, రోటీ అస్సలు తీసుకోలేదు).

దీనినే ఆయన 23-1 ఫార్ములా అన్నారు. అంటే రోజులో 23 గంటల పాటు శరీరం నిల్వ ఉన్న కొవ్వును కరిగించి శక్తిగా వాడుకుంటుంది. కేవలం 1 గంట మాత్రమే కార్బోహైడ్రేట్లు శరీరానికి అందుతాయి.

స్తబ్దతను బద్దలు కొట్టడం
ఇలా చేస్తూ 80 కిలోలకు చేరుకున్నాక ఆయన బరువు తగ్గడం ఆగిపోయింది. ఆ స్తబ్దతను అధిగమించడానికి ఆయన ఏకంగా తొమ్మిది రోజుల పాటు ఉపవాసం చేశారు. దీన్ని ఆయన స్వేచ్ఛ కోసం ఉపవాసం అని పిలుచుకున్నారు. దీంతో ఆయన బరువు మళ్లీ తగ్గడం మొదలైంది.

ఫలితం ఎలా ఉందంటే?
ఈ మార్పుల వల్ల ఆయన ఫాస్టింగ్ ఇన్సులిన్ సాధారణ స్థితికి వచ్చింది. 35 అంగుళాల నడుము సైజు కాస్తా 29 అంగుళాలకు తగ్గింది. ఇప్పుడు రోజంతా ఏమీ తినకపోయినా నాకు ఆకలి అనిపించదు అని ఆయన సగర్వంగా చెప్పారు.

మనం నేర్చుకోవాల్సింది ఏమిటి?
డైటింగ్ చేసే ముందు శరీరంలో ఏవైనా లోపాలు ఉన్నాయేమో పరీక్షించుకోండి. వాటిని సరిదిద్దుకోండి. క్యాలరీల లెక్కల కంటే, ఇన్సులిన్ లెవల్స్ మీద, ఆకలి మీద దృష్టి పెట్టండి. అకస్మాత్తుగా కాకుండా, మార్పులను క్రమంగా అలవాటు చేసుకోండి. బరువు తగ్గడం అనేది ఒక భారంగా కాకుండా, ఓ క్రమబద్ధమైన జీవనశైలి మార్పుగా చేసుకుంటే ఆరోగ్యంతో పాటు అద్భుతమైన ఫలితాలు మీ సొంతం చేసుకోవచ్చు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.